मत्ती 20
20
गोङ्गोङ्गी स्यीङ्गे ॱङलक्पे पीदम् च्यीक् १-१६
1हीनी येशुगी हरुङ्द ॱस्येप्प बेत्। तेङ् यी़गी ज्यागक्की लेमु हीगो डस्सी च्यीक् युङ्गेन् बेत्। गोङ्गोङ्गी स्यीङ्गे दक्पु च्यीक्की रोरङ्गी स्यीङ्गल ले झ्यीक्केन् ॱङलक्प ॱयेङ्दु सीन्न थोर्च्याल डोगेन् बेत्। 2ॱनी ॱङलक्प दीबल दक्पु दीगी ङीन् च्यीक्की ॱङलक् दी टङ्ग दीनार् च्यीक् छ्यो़त्न, लेल तोङ्गेन् बेत्। 3ॱनी यङ् छ्युजो़त् गुजो़त् च्यीक्ल दक्पु दी फीच्च्य ठोम्ल डोगेन् बेत्। ॱनी हुदु ले मीप्पे मी यरी ठेक्केन् बेत्। 4ठेत्नी, हुबल दक्पु दीगी खीत्रङ् ङे गोङ्गोङ्गी स्यीङ्गे लेल ज्युक्। खीत्रङ्ल घङ् थोबे ॱङलक् ङे टेत् योङ् सीन्न तोङ्गेन् बेत्। हुनी हुब डोगेन् बेत्। 5हुनी यङ् दक्पु दीगी ङीमे घुङ्ल धङ् छ्युजो़त् ॱसुम्गी छो़त्ल आक् हुन्दुक् दीरङ् झ्यीन ॱङलक्प ॱयेङ्न तोङ्गेन् बेत्। 6ॱनी हुनी इक् यङ् दक्पु दी फीच्च्य छ्युजो़त् ॱङे छो़त्ल आक् ठोम् दीलरङ् डोगेन् बेत्। ॱनी हुदु यङ् ले मीप्पे मी यरी ठेक्केन् बेत्। ठेत्नी, हुबल दक्पु दीगी खीत् घन्डल ङीङ्गङ् ले मीत् झ्यीप्प, नुक्रङ् दो़क्को़प्प? सीन्न ढीगेन् बेत्। 7हुबे लेम्बुल ङीत् ॱसी़ लेल अक् ठीक्मोङ् सीक्केन् बेत्। ॱनी हील दक्पु दीगी खीत्रङ् ङे गोङ्गोङ्गी स्यीङ्गे लेल ज्युक् सीन्न तोङ्गेन् बेत्।
8ॱनी गोङ्ज्योगी छो़त्ल दक्पु दीगी ॱङलक्प घयेक्की गो़न्जीङ दील हीन्दुक् सीन्न ॱङाब बेत्। ॱङलक्प घयेत्ल ॱङलक् दी रङ्गी तीङ्स्युक्ल युङ दीनी ॱएन्स्युक्ल टेत्न फीन्नी, हुनी ॱएन्स्युक्ल युङ दीबल तीङ्स्युक्ल टो़त् झ्यीब बेत्। 9ॱनी तीङ्स्युक्ल छ्युजो़त् ॱङबल युङ दीबल टङ्ग दीनार् री री टेत्न युङ बेत्। 10ॱनी हुन्दुक् झ्यीन टेत्न युङ्नी, हुनी तीङ्ला ॱएन्स्युक्ल युङ दीबे पालो दील ॱलीत्नी, हुबे ङीत्ल त हुले ॱल्हक्मा थोप्को़ट्टो ॱनो़ब छ्यर बेत्। ॱनी टङ्ग दीनार् री रीबु दीरङ् क थोब बेत्। 11-12हुगो झ्यीनी हुबे दक्पु दील ङीत् ङीमे छीक् छीक् ॱसम्ब ङीङ्गङ् कले च्यो़क्केन् दीबल अक् हुगोरङ्, यङ् तीङ्स्युक्ल युङ्गेन् छ्युजो़त् च्यीक्रङ् ले झ्यीक्केन् दीबल अक् हुगोरङ् हीम्बक्? सीन्न कोल्लोक् ॱलङ बेत्। 13ॱनी हुगी लेल्ल दक्पु दीगी हुबे छीक्नी च्यीक्ल ॱवे दगु खो़त्ल ङे मत् दीम्ब घन्ड झ्यीज्युङ ॱनी? खो़त्ल ङे टङ्ग दीनार् च्यीक्लरङ् छ्यो़प्प मेम्बेक्क ॱनी? 14रङ्गी ॱङलक् दी खुर्ल लोक्ल ज्युक्। रङ्ल टेप्प डस्सी तीङ्स्युक्ल युङ्गेन् हुबल अक् ङे टो़च्च्ये ॱनो़नी टेप्पेन्। 15ॱनी ङरङ्गी पयीसक्ल ङरङ्गी ॱवङ् मीत् युङ्गेन् बेक्क ॱनी? ङे मील गये ले झ्यीबल खो़त् सीगुक् लङ्गुक्क ॱनी? झ्यीब बेत्। 16ॱनी हीन्दुक् झ्यीन तीङ्मा दीब एल्ला थो़न् डोगेन् बेत्। ॱएम्मा दीब तीङ्ल झर् डोगेन् बेत् सीन्न ॱस्येप्प बेत्।
येशु रोरङ् ढोङे केच्च्य १७-१९
17हीनी येशुसो यरुशलेम्ल डोगीन् यो़प्पे यङ्ल खोङ्गी रोरङ्गी ॱलोप्टुक् च्युन्नीबु दी फच्चो़त् च्यीक् ठीक्न हुबल हीन्दुक् सीन्न ॱस्येप्प बेत्। 18तेदे हुन्दो हज्यरङ् यरुशलेम्ल डोगीन् यो़क्केन् बेत्। ॱनी हुदु कोलीमीगी ॱरेबु छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेक्की लक्ल ॱस्योर्न, हुबे ॱसो़त् गोगेङ्गी छ्येप्प को़गेन् बेत्। 19हुनी ज्यी़त् ॱयोङ् ॱयोङ्गी मी घयेक्की लक्ल टेत्न, हुगी मी दीबे खोङ्ल छ्यस्सी़त् ज्यप्न डेङ्ज्यक् बेन्न हुनी कुरुस्ल तान ॱसो़क्केन् बेत्। हुनी स्यक्पु ॱसुम् ॱसोङे ङीन् दी यङ् खोङ्जो ॱसोम्बुल लोङ्गेन् बेत् सीन्न ॱस्येप्प बेत्।
जब्दीगी भु ॱङीबी़ केच्च्य २०-२८
20हुनी येशु च्याल जब्दीगी नङ्जङ् दीगी रोरङ्गी भु ॱङीबु दी ठीक्न युङ्न खोङ्ल स्युदेन् ज्यक्च्येल खोङ्गी ढुङ्दु पीमुङ् चुब बेत्। 21ॱनी हुल खोङ्गी घन्ड सीच्च्येम यो़प्प ॱस्यो़त्लेत् सीन्नी, हील हुगी ङे भु ॱङीबु हीगो नीज्यरङ्गी ज्यागक्तु च्यीक् नीज्यरङ्गी ॱये छ्योदु धङ् च्यीक् ॱयेन् छ्योदु दो़च्च्ये यो़प्प ॱनङ्रो झ्यी सीन्न स्यी़ब बेत्। 22हीगी लेल्ल खोङ्गी हुबल खीक्की घन्डे केच्च्य च्यीक् लीङ्गो़प्प हुगो ॱस्यो़च्च्ये यो़प्पक्? ङे थुङ्ज्येमे फोप्प हुनी खीक्की थुङ् छुबेक्कक्? सीन्न ढीब बेत्। हीगी लेल्ल हुबे ङीक्की छुबेत् झ्यीब बेत्। 23ॱनी यङ् खोङ्गी हुबल ङे फोप्पनी खीत्रङ्गी थुङ दी त थुङ्गेन् बेत्। ॱनी हीन्न अक्, ङे ॱये छ्योदु धङ् ॱयेन् छ्योदु दो़त्तु ची़च्च्येमे ॱवङ् ङल मीत्। हुगो ङे यप्की ॱसी़ ढीक्ल स्यक्न यो़दङ् हुगोरङ् दो़क्केन् बेत् सीन्न झ्यीब बेत्। 24ॱनी हीगी केच्च्य हीगो ॱलोप्टुक् च्युबु दीबे ॱह घोनी, हुब घयेत् हुगी पी़न् ॱङीबु दील सीगुक् लङ बेत्।
25हुनी येशुगी ॱलोप्टुक् दीब कुरीक् रोरङ्गी लोल भो़न हुबल हीन्दुक् झ्यीब बेत्। ज्यी़त् ॱयोङ्म घयेक्की घुङ्दुरङ् मी चो छ्यीया घयेत् धङ् ॱवङ् च्येम्म घयेक्की ॱवङ् धङ् ॱवङ्यो़त् तोङ्गेन् बेत्। हुगो खीत्रङ्ल ॱस्यो़च्च्ये यो़क्केन् बेत्। 26ॱनी हुगो डस्सीगी लेमु खीत्रङ्गी घुङ्दु झ्यीच्च्ये मीत् युङ्गेन् बेत्। खीत्रङ्गी घुङ्नी ॱसु छ्यीयाल थो़न्ज्ये ॱनो़ब यो़दङ् हुगी ॱयोङ्म कुरीक्ल स्यप्च्यी़ ज्युक् गोगेन् बेत्। 27ॱनी यङ् खीत्रङ् ॱसु छ्यीस्स्योल थो़न्ज्ये ॱनो़ब यो़दङ् हुगो ॱयोङ्म कुरीक्की ॱयोक्पु डस्सी झ्यीत् गोगेन् बेत्। 28ॱनी हीगो डस्सी कोलीमीगी ॱरेबु उक् स्यप्च्यी़ लीन्दु युङ मेम्ब, स्यप्च्यी़ ज्युक्तु धङ् मी गज्येन् ॱलुये ढीक्ल रोरङ्गी ॱरोक् च्यो़दु युङ हीन् सीन्न ॱसुङ बेत्।
स्यर्च्योक् ॱङी थोङ्गेल्ल सो़ब २९-३४
29हुनी तीङ्ला येशुसो यरीहोनी थो़न्न डोये यङ्ल मी छेत्मीत् तीङ् दीत्न युङ बेत्। 30ॱनी ज्यलम्गी छीगन स्यर्च्योक् मीरङ् ॱङी यो़प्प बेत्। ॱनी येशु हुनी फल्ल डोगुक् सीर हुबे ॱह घोनी हुबे खोङ्ल ॱवे दाऊद्गी ज्यी़त् चोव ज्यीन्दक् ङीत्ल ॱङीङ्ज्यी जेत्रो ॱनङ् सीन्न केत् ज्यब बेत्। 31ॱनी उन यो़क्केन् मी ॱयोङ्म दीबे हुब ॱङीबुल ॱहरक्प दो़त् सीन्न लप्स्य तङ बेत्। ॱनी तङ्न आक्, हुबे हरुङ् केत् छ्यीदु तो़न्न ॱवे चोव ज्यीन्दक् दाऊद्गी ज्यी़त् ङीत्ल ॱङीङ्ज्यी जेत्रो ॱनङ् सीन्न झ्यीब बेत्। 32हुनी येशु फच्चो़त्तु थीन्जो़त् च्यीक् देत्न हुब ॱङीबु रोरङ्गी लोल भो़न ङ खीत्ल घन्ड झ्यीच्च्ये गो़गुक्क? सीन्न ढीब बेत्। 33हील हुबे चोव ज्यीन्दक्, नीज्यरङ्गी ङीस्सो़ ॱमीक् हीगो थोङ्ज्ये यो़प्प सो़न ॱनङ्रो झ्यी सीन्न स्युव पुब बेत्। 34हुनी येशु हुबल ॱङीङ् छन हुबे ॱमीक् दील रेक्नी, हुनी ॱस्यर्च्यक् हुबे ॱमीक् दी थोङ्गेल्ल ॱसोङ बेत्। ॱनी हुब अक् येशुगी तीङ्ल टप्नर बेत्।
Currently Selected:
मत्ती 20: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
