लुका 7
7
ॱमक्पो़न् च्यीक्की छ्य गस्सी स्यक्प १-१०
1खोङ्गी हुन्दुक् झ्यीन ॱस्येत् छर्नी, हुनी खोङ् कफर्नहुम् सार्की नङ्ल स्युब बेत्। 2ॱनी उन ॱमक्पो़न् च्यीक्की ॱयोक्पु फङ्सी च्येम्म च्यीक् नन ॱस्यीज्येम ॱयेङ्न यो़प्प बेत्। 3ॱनी हुगी ॱमक्पो़न् दीगी येशु हुदु ॱलीब ॱह घोनी हुगी यहुदीगी गेम्बा चो छ्यीया यरी येशु च्याल हीन्दुक् सीन्न ॱङान तङ बेत्। ङे खीम्ल युङ्न ङे ॱयोक्पु हीगो ढक्तु ची़त्रो झ्यी सीन्न स्युव पुलेत् झ्यीब बेत्। 4-5ॱनी हुब फीन्नी हुबे येशुल हुगी ॱमक्पो़न् हुगो हज्यरङ्गी ज्यी़त्ल झ्यम्ब झ्यीक्केङ्गी मी बेत्। हुगी छ्यो़गी छोगङ् च्यीक् इक् सो़न बीन्न यो़क्केन् बेत्। नीज्यरङ्गी हुगी ढीक्ल हुन्दुक् जेत्न टेप्पल हुगो ओ़ब यो़क्केन् बेत् सीन्न स्युदेन् ज्यब बेत्। 6हुनी येशु हुबदङ् कङ्ज्यीक्ल फीम्ब बेत्।
ॱनी खीम् दील ॱमत् ॱलीच्चो़त्तु हुगी ॱमक्पो़न् दीगी रोरङ्गी मी यरील हीन्दुक् झ्यीबे तम् ॱङान तङ बेत्। चोव ज्यीन्दक् नीज्यरङ् ओप्च्या जेत्रो ॱमत् ॱनङ्। ङे खीम्गी नङ्ल नीज्यरङ् झ्यो़म्बल ओ़ब च्येम्मे मी ङ मेन्। 7ङरङ् यङ् नीज्यरङ्गी ढुङ्दु युङल मीत् ओ़ब यो़त्। बोर नीज्यरङ्गी ढक्ल ज्युक् सीन्न छीक् च्यीक् ॱसुङ्नरङ्, ङे ॱयोक्पु हीगो ढक् डोगेन् बेत्। 8ङरङ् अङ् ॱयोङ्गी ॱवङ्गी होक्ल दो़क्को़त्। ॱनी ङरङ्गी ॱवङ्गी होक्ल अक् ॱमक्मी गज्येन् यो़त्। च्यीक्ल ज्युक् सीन्न डोगेन् बेत्। ॱनी यङ् च्यीक्ल ॱस्योक् सीन्न युङ्गेन् बेत्। ॱयोक्पु च्यीक्ल हीगो झ्यी सीन्न झ्यीक्केन् बेत् सीन्न तङ बेत्। 9ॱनी हीगी केच्च्य हीगो घोनी येशु हील ॱह लेब बेत्। हुनी तक्ल लोक्न खोङ्गी तीङ्ल युङ्गेन् मी घयेत् दील खोङ्गी हीन्दुक् ॱसुङ बेत्। ङे खीत्रङ्ल ॱस्येत् योङ्। नुक्मे छ्य गय स्योक्केङ्गी मी ङे इस्राएली घयेक्की घुङ्दु उक् थोङ्मोङ् सीन्न ॱस्येप्प बेत्। 10ॱनी हुगी लो़न् खुर्न डोगेन् दीब खीम्ल लोक्न फीन्नी, हुगी ॱयोक्पु दी ढक्नरदङ् ठेप्प बेत्।
मोरेङ्मु च्यीक्की भु ॱसोम्बुल ॱलोङ ११-१७
11हुनी यङ् ॱस्यर्च्यक् येशु नैन् सार्ल फीम्ब बेत्। खोङ्गी दल ॱलोप्टुक् दीब धङ् मी ॱयोङ्म आक् छेत्मीत् फीम्ब बेत्। 12ॱनी हुगी सार्की च्यारीगी गोच्च दील ॱलीच्च्येम ॱयेङे यङ्ल हुदु रो च्यीक् तो़न्न युङदङ् ठेप्प बेत्। ॱनी रो च्यो़गेन् मी गज्येन् यो़प्प बेत्। ॱनी हुगी मी ॱस्यीगेन् दी उन मोरेङ्मु च्यीक्ल यो़प्पे भु च्यीगी च्यीक्पु दी हीङ्गो़प्प बेत्। 13ॱनी चोव ज्यीन्दक्ल हुगी आम दी ठेत्नी, ॱङीङ् छये, खोङ्गी हुल मत् ङु झ्यीब बेत्। 14हुनी रो खुरे ज्योज्यङ् दील खोङ्गी सुङ्नी, रो खुर्केन् दीब देप्प बेत्। हुनी रो दील येशुगी ॱवे स्यो़म्ब, ङ रङ्ल सीक्केन्। रङ् लोङ् सीन्न झ्यीब बेत्। 15हुनी ॱस्यीनर दी जोक् जोक्ल लोङ्न युङ्न तम् लब बेत्। ॱनी हुगी आम दील येशुगी ॱय ह रङ्गी भीज सीन्न टेप्प बेत्। 16ॱनी उन यो़प्पे मी घयेत् दी ज्यीक्टक् लङ्न हुबे ॱवे हज्यरङ्गी घुङ्दु कलुङ् ॱस्यो़क्केन् छ्यीम्मु च्यीक् थो़न्दुक् व सीन्न हीगी ढीक्ल को़न्ज्योक्ल तो़प्प पुन हुबे को़न्ज्योक् खोङ् रोरङ्गी मीस्सीर्ल रोरम् जेत्तु झ्यो़न्दुक् सीन्न झ्यीब बेत्। 17खोङ्गी जेप्पे हीगी केच्च्य हीगो यहुदीयागी नङ्ल घल अक् धरे ॱमत् छ्योक्, हुगी छीग ॱनमुल आक् धर्न खुर बेत्।
युहन्ना बप्तीस्की येशुल तम् ढीदु तङ १८-३५
18ॱनी हीगी केच्च्य घयेत् हीगो युहन्नागी ॱलोप्टुक् दीबे युहन्नाल ॱस्येप्प बेत्। हुनी युहन्नागी रोरङ्गी ॱलोप्टुक् ॱङी भो़न हुबल 19खीत्रङ् चोव ज्यीन्दक् च्याल ज्युक्ल खोङ्ल तीङ्ला झ्यो़ङ्गेन् बेत् सीक्केन् दी नीज्यरङ्रङ् हीम्ब न, न ङीत् ॱयोङ्ल गुक् गोगेन् बेक्क? सीन्न ढीलेत् सीन्न तङ बेत्। 20ॱनी हुब ॱङीबु येशु च्याल युङ्न खोङ्ल युहन्ना बप्तीस्की ङीत् नीज्यरङ्ल तम् च्यीक् ढीदु तङ्ज्युङ्। झ्यो़ङ्गेन् सीक्केन् दी नीज्यरङ् हीम्ब न, न ङीत् ॱयोङ्ल गुक् गोगेन् बेक्क? सीगुक् झ्यीब बेत्। 21हुगी धी़ल येशुगी नज ॱनजो ढक्तु ची़क्कीन् धङ् ॱनो़प्प अयेक्प घयेत् तो़न्न दीक्कीन् धङ् स्यरीय घयेत् थोङ्गेल्ल सोगीन् यो़प्प बेत्। 22ॱनी खोङ्गी लेन् दील हुबल खीत्रङ् लोक्ल ज्युक्ल खीत्रङ्गी घङ् थोङ धङ् घङ् घोव घयेत् दी युहन्नाल ॱस्येत्न टो़त्लेत्। स्यरीय घयेत् थोङ्गेल्ल सोगुक्। घोङ्रीय घयेत् लोङ्न छ्यम्गुक्। जीस्सो़ घयेत् ढक्न चङ्मल सोगुक्। ओ़न्ज्यङ घयेक्की घो डोगुक्। ॱस्यीनर घयेत् ॱसोम्बुल ॱलोङ्गुक्। मी दुक्च्या घयेत्ल केच्च्य ॱनेम्बु ॱस्यो़क्कुक्। 23ॱसु ङे ढीक्ल ॱहब दुब मीप्प झ्यीन युङ्गुक्क हुगो ॱसोदी च्येम्म युङ्गेन् बेगो सीन्न ॱस्येत्न तङ बेत्।
24हीनी युहन्नागी लो़न् खुर्केन् दीब ॱसोङ् छर्नी, उन यो़प्पे मी घयेत् दील येशुगी युहन्नागी ढीक्ल हीन्दुक् सीन्न ॱस्येप्प बेत्। पक्क झ्यङ्दङ्ल तदु फीन्नी, खीत् घयेक्की घन्ड थोङ्ज्युङ? ॱलुङ्ल ॱनुक्म योक् योक् झ्यीप्प च्यीक् थोङ्ज्युङ? 25न घन्ड च्यीक् थोङ्ज्युङ? न घो़ गङ्ज्येन् घो़म्ब च्यीक् थोङ्ज्युङ? मेम्बेत्। घो़ गङ्ज्येन् घो़न्न सप्केन् धङ् नोर्की लोङ्ज्यो़त् झ्यीक्केन् ज्यागङ्गी नङ्लरङ् युङ्गेन् बेत्। 26ॱनी हीगो ओक् मेन्न ॱनी, घन्ड च्यीक् थोङ्ज्युङ? कलुङ् ॱस्यो़क्केन् च्यीक् थोङ्ज्युङ? ङे ॱस्येत् योङ्। हुगो कलुङ् ॱस्यो़क्केल्ले एक् छ्यीया बेत्। 27हुगी ढीक्ल ॱसुङ्रप्ल हीन्दुक् सीर को़न्ज्योक्की ॱस्येत्न यो़क्केन् बेत्।
ङे लो़न् टो़क्केन् च्यीक् रङ्गी एल्ला लम् ॱसेदु तोङ्गेन्। (मलाकी ३:१)
28खीत्रङ्ल ङे ॱस्येत् योङ्। कोलीमील कीब घयेक्की छीक्नी छ्यीस्स्योल युहन्ना हुगो ॱनेगेन् बेत्। ॱनी हीन्न अक्, को़न्ज्योक्की ज्यागक्तु यङ् युहन्नाले त हुगी ज्यागक्की च्युङ्स्यो च्यीक् छ्यीया युङ्गेन् बेत् सीन्न ॱस्येप्प बेत्।
29गोलदर् धङ् उन यो़प्पे मी घयेत् दीबे कुरीक्की येशुगी केच्च्य हीगो ॱह घोनी, हुबे ॱसीम्ल को़न्ज्योक्की लेमु घयेत् डीक्सी दुक् व ॱनो़ब छ्यर बेत्। घन्ड हीन् सीन्न हुब युहन्नागी बप्तीस्ल स्युब हीङ्गो़प्प बेत्। 30हीगो डस्सी फरीसी घयेत् धङ् छ्यो़डीम्गी चयेलम घयेत् हुबे को़न्ज्योक्की थुल यो़प्पे ढो़ल ॱमत् ॱसम्बल हुब युहन्नागी बप्तीस्ल मत् स्युब हीङ्गो़प्प बेत्।
31खोङ्गी हुबल हीगी धी़ धीङ्सङ्गी मी हीबे ढीक्ल घन्दुक् झ्यीबे पी च्यीक् ॱस्यो़च्च्ये ब अक्? हीब घन्ड च्यीक्तङ् डगो़द अक्? 32हीब भीज ठोम्दु जोम्न च्यीक्तङ् च्यीक्ल हीन्दुक् सीक्केन्दङ् डगेङ्गी मी बेत्। ङीक्की ॱलीमु ज्युर्न बीन्न अक्, खीत् गेस लङ्न स्यप्र अक् ॱमीत् फक्केन्। ॱनी च्योलु लीन्न बीन्न अक्, खीत् ङुच्च्यङ् ॱमीत् ॱस्योर्केन्। 33हीगोदङ् छ्येत्मीत् दी क युहन्ना बप्तीस् थो़न्न युङ्नी, हुगी गोङ्ज्यङ् ॱमीत् थुङ धङ् सम गज्येन् च्यो़ट्टम् झ्यीप्प ॱस्यीनी, खीत्रङ्गी हुल हुगी मी हुगो ॱनो़प्प अयेक्प स्यीन्नरे मी हीङ्गो़प्पेत् सीन्न सीगुक्। 34ॱनी कोलीमीगी ॱरेबु सगीन् धङ् थुङ्गील्ल युङ थोङ्नी, खीत्रङ् घयेक्की यङ् हुगी मी हुगो सदोङ, च्युक्कोङ, गोलदर् धङ् दीक्च्येन् ॱयोङ्म घयेक्की छ्यीट्टो बेत् सीन्न सीक्केन् बेत्। 35ॱनी म दी ङीक्की छ्यली़ लेमु दी झ्यी़रीक् च्येम्मे भीज घयेक्की धक्पर् हीम्ब तो़ङ्गेन् बेत्।
येशुगी कङ्बल भुमु च्यीक्की ॱनुम् ॱही़म्ब ३६-५०
36हुनी फरीसी च्यीक्की येशु डो़ल्ल भो़ब बेत्। ॱनी खोङ् हुगी फरीसी दीगी खीम्ल झ्यो़न्न सम सज्येल स्युदेल्ल स्युब बेत्। 37ॱनी येशु उन यो़प्प दी हुगी सार्की भुमु दीक्च्येन् च्यीक्की ॱह घोनी, हुगी दोलोक्पल सो़बे ॱनो़च्च्य च्युङेत्मु च्यीक्ल ॱनुम् ढीम स्यीम्बोक्म ॱहीक्केन् च्यीक् खुर्न युङ बेत्। 38ॱनी हुगो येशुगी तक् ङो़गी कङ्स्यम्दु देत्न ङी़ब बेत्। हुगी ॱमीक्च्यु दी येशुगी कङ्बल घप्न खुर्नी, हुगी भुमु दीगी रोरङ्गी ट दीगी फीन च्युप् झ्यीन हुगी ॱनुम् दी खोङ्गी कङ्बल ॱही़न्न टेप्प बेत्।
39ॱनी हुगी ॱनेजङ फरीसी दीगी हुगो थोङ्नी हुगी ॱसीम्ल हीगी येशु हीगो कलुङ् ॱस्यो़क्केन् खुङ्देन् हीन्न ॱनी, रोरङ्ल सीङ्गेन् भुमु हुगो घन्दुक् झ्यीबे मी दीक्च्येन् बेक्क हुगो ॱह घोयेत् क ॱनी ॱनो़ब छ्यर बेत्। 40ॱनी येशुगी हुल ॱवे शीमोन्, रङ्ल ङ तम् च्यीक् ॱस्यो़च्च्ये ॱनो़गुक् झ्यीब बेत्। ॱनी हील शीमोन् दीगी चयेलम ॱसुङ्रो ॱनङ् झ्यीब बेत्।
41हुनी खोङ्गी हीन्दुक् ॱसुङ बेत्। भी़न्दक्प च्यीक्ल मीरङ् ॱङीगी भुलीन् जप्च्येम यो़प्प बेत्। च्यीक्की टङ्ग दीनार् ज्यब ॱङ धङ् च्यीक्की टङ्ग दीनार् ॱङप्च्यु जप् गोगो़प्प बेत्। 42ॱनी ॱङीक्कर्की हुगो जप् ॱमत् छुबल भी़न्दक्प दीगी हुब ॱङीक्कर्ल नुक्रङ् ॱलो़ तङ् तङ बेत्। ॱनी भी़न्दक्प दील हुब ॱङीबी़ घन् दीगी मङा ढीन् ॱसम्न झ्यम्ब खुर्केन् बेक्क? सीन्न ढीब बेत्। 43ॱनी शीमोन् दीगी लेल्ल ङे ॱनो़बल भुलीन् मङा च्येम्म दीगी झ्यीब बेत्। ॱनी येशुगी हुल हो हुगो दीम्बरङ् बेत् झ्यीब बेत्।
44हुनी येशु भुमु दी ङो़ल दोङ् ज्युर्न शीमोन् दील हीन्दुक् ॱसुङ बेत्। तो़दे, हीगी मी हील। खोक्की खीम्ल स्युक्पे यङ्ल ङल कङ्ब टी़च्च्येमे छ्यु च्यीक् इक् टेत्मोङ्। हीगी भुमु हीगी क ङे कङ्ब रोरङ्गी ॱमीक्च्यी़ टी़न रोरङ्गी टे फीज्युङ्। 45खोक्की ङल च्युप् झ्यीमोङ्। हीगी भुमु हीगी क ङ देच्चो़त्नी ङे कङ्बल च्युप् झ्ये झ्येब देच्च्युङ्। 46खोक्की ङे गोल ॱनुम् च्यीक् इक् ॱही़म्मोङ्। हीगी क ङे कङ्बल ढीम स्यीम्सी ॱहीक्केङ्गी ॱनुम् ॱही़न्न बीन्ज्युङ्। 47हीगी ढीक्ल ङे रङ्ल ॱस्येत् योङ्। हीगी ङल झ्यम्ब मङा झ्यीच्च्ये दी हील दीक्प मङा यो़प्प दी धक्न खुर्नी, झ्यीक्केन् बेत्। ॱसी़ दीक्प नुङा धक् यो़दङ् हुगी ढीन् दी इक् नुङा ॱसम्न झ्यम्ब दी इक् नुङारङ् झ्यीक्केन् बेत् सीन्न झ्यीब बेत्। 48हुनी भुमु दील येशुगी रङ्गी दीक्प घयेत् ह धक् छर बेत् सीन्न झ्यीब बेत्।
49हीगो सीन्नी उन यो़प्पे डोम्बु ॱयोङ्म दीबे रोरङ्सो ॱनम्बु दीक्प अक् धक्तु ची़क्केङ्गी मी हीगो घन्दुक् झ्यीब ब अक्? सीन्न लप्री चीय बेत्। 50ॱनी हुगी भुमु दील येशुगी रङ्गी छ्य स्यक्प दीगी रङ्ल छी थर्व झ्युङ बेत्। ह रङ् ॱसीम् दीव झ्यीन ज्युक् सीन्न तङ बेत्।
Currently Selected:
लुका 7: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
