लुका 6
6
येशु ङीत्तुवे दक्पु १-११
1हुनी तीङ्ला ङीत्तुवे ङीन् च्यीक् येशुसो ढे घुङ्नी फक्की लम् च्यीक्ल फीम्ब बेत्। ॱनी डोये यङ्ल ॱलोप्टुक् दीबे ढे ॱही़ तोन ॱमुर्न सेब बेत्। 2ॱनी फरीसी यरीगी हुबल ङीत्तुवे यङ्ल हुन्दुक् झ्यीच्च्ये मीत् युङ्गेन् बेत् सीरे कल घन्डल ॱमीत् चीय, हुन्दुक् झ्यीक्केन् ॱनी? सीन्न झ्यीब बेत्। 3हुगी लेल्ल येशुगी धङ्बु दाऊद् धङ् दाऊद्गी दल यो़प्पे मी दीब ढोप्प तोनी, हुबे घन्ड झ्यीब बेक्क खीक्की हुगो डोन ॱमत् तेब ॱनी? 4खोङ् को़न्ज्योक्की सीङ्गङ्ल स्युन को़न्ज्योक्ल पुबे ढोप्ची घयेत् खोङ्जो़ डुन से तङ बेत्। हुनी रोरङ्गी दगु दीबल अक् बीन्न, हुबे एक् सेब बेत्। हुगो स्येन् छ्यो़प्पो़न् घयेत् दीगी मेन्द, सज्ये मीत् युङ्गेन् बेत् सीन्न ॱस्येप्प बेत्। 5ॱनी हरुङ्द खोङ्गी हुबल कोलीमीगी ॱरेबु ङीत्तुवे दक्पु उक् बेत् सीन्न ॱस्येप्प बेत्।
6हुनी तीङ्ला ङीत्तुवे ङीन् च्यीक् येशु छ्यो़गी छोगङ् च्यीक्ल स्युन हुदु मी घयेत्ल ॱलोप्स ज्यप्न टेप्प बेत्। ॱनी उन लक्प ॱयेब ॱस्योर्नरे मी च्यीक् यो़प्प बेत्। 7ॱनी हुदु छ्यो़डीम्गी चयेलम यरी धङ् फरीसी यरीगी हरीङ् ङीत्तुवल येशुगी नेप्प हुगो ढक्तु ची़क्कुक्क न ॱमीत् ची़प्पेक्क तेदोङ् सीन्न खोङ्ल च्यीव झ्यीब बेत्। 8ॱनी हुबे ॱसीम्बे ॱनोक्सम् दी येशुगी ॱह घोनी हुगी लक्प ॱस्योर्नर दील रङ् लोङ्ल हीदु कुरीक्की थोङ्सल टङील दो़त् सीन्न ॱङाब बेत्। हुनी हुगो लोङ्न देप्प बेत्। 9हुनी येशुगी हुबल ङ खीत्रङ्ल तम् च्यीक् ढीगेन्। ङीत्तुवे ठीम्ल घङ्गो दी झ्यीन युङ्गेन् बेक्क? गय झ्यीन न, न अयेक्प झ्यीन? ॱरोक्च्यप् झ्यीन न, न खरप्ल तङ्न? सीन्न 10खोङ्गी हुबल फोरी तेब बेत्। हुनी हुगी लक्प ॱस्योर्नर दील रङ्गी लक्प दी च्योङ् झ्यीब बेत्। हुनी हुगी लक्प दी च्यङ्नी, ॱस्युम् थोगी ढक्नर बेत्। 11हुनी हुब घयेत् खोङ्डोक्की मी बर्न, रोरङ्सो ॱनम्बु ह हज्यरङ् हुल घन्ड झ्यीक्केन्? सीन्न ढो़ झ्यीब बेत्।
ठीक्नल च्युन्नी दम्न को़बे तम् १२-१६
12हुनी ङीन् च्यीक् येशु लदोक् च्यीक्ल जेन हुदु छेङ्गङ् को़न्ज्योक्ल ॱसुव तोप्कीन् देप्प बेत्। 13ॱनी ॱङेट्टो दी खोङ्गी रोरङ्गी ॱलोप्टुक् घयेत् दी भो़न हुबे छीक्नी मीरङ् च्युन्नी दम्न हुबल ठीक्नलल को़ब बेत्। 14हुब च्युन्नीबी़ मीङ् दी च्यीक्ल शीमोन् सीक्केन् बेत्। हुल यङ् पत्रुस् सीन्न खोङ्गी मीङ् ॱयोङ्म पो़ब बेत्। ॱनी च्यीक् हुगी पी़न् अन्द्रीयस् बेत्। ॱनी ॱयोङ्म दीब याकुब्, युहन्ना, फीलीप्, बार्थोलोमै, 15मत्ती, थोमा, अल्फयस्की भु याकुब्, शीमोन् जेलोतेस्, 16याकुब्गी भु यहुदा, डलक्ल तोङ्गेन् यहुदा इस्करीयोत् झ्यीब हीजो़त् च्यीक् बेत्।
नेप्प घयेत् ढक्तु ची़प्प १७-१९
17हुनी ठीक्नल च्युन्नीबु दीदङ् दल खोङ् हुगी लदोक् दीनी मल्ल भप्न हुदु थङ्ग च्यीक्तु टङील स्युब बेत्। ॱनी उन खोङ्गी ॱलोप्टुक् ॱयोङ्म आक् गज्येन् यो़प्प बेत्। ॱनी यहुदीयानी, यरुशलेम्नी धङ् छ्यु ज्यम्जो छ्यीम्मी़ छीगल ॱनेगेन् टायर् धङ् सीदोन्गी लुङ्बनी इक् मी छेत्मीत् 18येशुगी केच्च्य नेन्दु धङ् नेप्प घयेत् ढक्तु ची़च्च्येल सीन्न उन युङ्न यो़प्प बेत्। ॱनी हुदु ॱनो़प्प स्यीलोक्पोक्म स्यीन्नरे मी घयेत् दी कुरीक् ढक्नर बेत्। 19ॱनी हुगी मी घयेत् दी कुरीक् येशुल रेक्तु सीन्न खोङ्गी लोल युङ् छुब झ्यीब बेत्। घन्ड हीन् सीन्न खोङ् च्येन्नी ॱस्यीक् छ्यीम्मु थो़न्न युङ्न, हुगी ॱस्यीक् दीगी मी घयेत् कुरीक् ढक् डोगो़प्प बेत्।
ॱसोदी यो़प्प च्येम्म घयेत् २०-२६
20हुनी खोङ्गी ॱलोप्टुक् दीबल तेन हीन्दुक् सीन्न ॱस्येप्प बेत्।
खीत्रङ् दुक्स्यो घयेत् ॱसोदी च्येम्मल ॱनेगेन् बेगो। घन्ड हीन् सीन्न खीत्रङ् को़न्ज्योक्की ज्यागक्की मीस्सीर् हीम्बल युङ्गेन् बेत्। 21खीत्रङ् हुन्दो तोब धङ् कोम्ब यो़प्प च्येम्म घयेत् ॱसोदी च्येम्मल ॱनेगेन् बेगो। घन्ड हीन् सीन्न खीत्रङ्ल डङ दी को़न्ज्योक् च्यानी युङ्गेन् बेत्। खीत्रङ् हुन्दो ङुगेन् घयेत् ॱसोदी च्येम्मल ॱनेगेन् बेगो। घन्ड हीन् सीन्न तीङ्ला खीत्रङ् स्येक्केत् झ्यीक्केन् बेत्। 22कोलीमीगी ॱरेबी़ धो़ल्ल खीत्रङ्ल मी ॱयोङ्गी ड झ्यीन ॱमो़म्बी़त् तङ्न पी़त्न स्यक्न खीत्रङ्गी मीङ्ल ॱङीङ्मदुक् झ्यीन युङ्न ॱनी, हुगो झ्यीबल खीत्रङ् ॱसोदी च्येम्मल ॱनेगेन् बेगो।
23हुन्दुक् सीरे ङीङ्गी यङ्ल खीत्रङ् गव झ्यीन गेसक्की फीर्च्यीत्। घन्ड हीन् सीन्न हीगो गुरे ढीक्ल खीत्रङ्ल तेङ् यी़दु ॱल छ्यीम्मु थोप्केन् बेत्। कलुङ् ॱस्यो़क्केन् घयेत्ल अक् हुबे पुबु ॱमुमु घयेक्की धङ्बुनीरङ् नुक् दीरङ् दुक्प तङ्न युङ बेत्।
24ह खीत्रङ् छ्युक्पु घयेत् घन्डे दुक्प। घन्ड हीन् सीन्न खीत्रङ्ल ह कीप् जो डोगेन् बेत्। 25खीत्रङ् हुन्दो कोगेन् डङ्गेन् घयेत् घन्डे दुक्प। घन्ड हीन् सीन्न खीत्रङ्ल तोब धङ् कोम्ब युङ्गेन् बेत्। खीत्रङ् हुन्दो स्येक्केत् झ्यीक्केन् घयेत्ल घन्डे दुक्प। घन्ड हीन् सीन्न तीङ्ला खीत्रङ्ल नङेन् नोङ्न ङुच्च्यङ् ॱस्योर्केन् बेत्। 26मी ॱयोङ्म घयेक्की खीत्रङ्ल तो़च्च्य झ्यीन, हुगो घन्डे दुक्प। घन्ड हीन् सीन्न धङ्बुदु उक् कलुङ् जी़म ॱस्यो़क्केन् घयेत्ल हुबे पुबु ॱमुमु घयेक्की नुक् दीरङ् झ्यीन युङ बेत् सीन्न ॱसुङ बेत्।
मी ॱयोङ्ल झ्यीत् गोगेङ्गी लेमु २७-३६
27खीत्रङ् ङे तम्ल नेङ्गेन् घयेत्ल ङे हीगो ॱस्येत् योङ्। खीत्रङ्ल ड झ्यीक्केन् घयेत्ल झ्यम्ब झ्यीज्यीत्। खीत्रङ्ल ॱङीङ्मदुक् झ्यीक्केन् घयेत्ल गय झ्यीज्यीत्। 28खीत्रङ्ल ॱमो़त्मु ज्यक्केन् घयेत्ल ॱमेल्लम् स्यी़न बीन्ज्यीत्। खीत्रङ्ल डस्स्यी डनक् झ्यीक्केन् घयेक्की ढीक्ल को़न्ज्योक्ल ॱसुव तोप्च्यीत्। 29रङ्गी डम्ब च्यीक्ल डम्ज्यक् बेन्ज्युङ्न ॱनी, डम्ब च्यीक्पु दी इक् जीच्च्यीत्। मी ॱसी़ रङ्गी ली़ज्ये छ्यी घो़ ठोक्तु युङ्गुक्क हुल रङ्गी ली़ज्ये नङ् घो़ दी इक् बील्लोङ्। 30ॱनी ॱसु रङ्ल ॱनङ् सीत्तु युङ्गुक्क हुल बीन्ज्यीत्। ॱनी यङ् मी ॱसी़ रङ्गी नोर् ठो डोगुक्क हुल ॱलोक्लेत् मत् सीच्च्यीत्। 31ॱनी खीत्रङ्गी ॱसीम्बे ॱयोङ् च्यानी घन्दुक् झ्यीबे रीगो झ्यीक्को़दङ् हुगो डस्सी ॱयोङ्मल आक् खीत्रङ्गी झ्यीत् गोगेन् बेत्। 32खीत्रङ्गी रङ्ल झ्यम्ब झ्यीक्केल्लरङ् क खीक्की झ्यम्ब झ्यीक्को़त्न ॱनी, हील घन्डे तो़प्प दी युङ्गो़त् सीक्केन्? हीगो डस्सी रोरङ्ल झ्यम्ब झ्यीक्केन् घयेत्ल झ्यम्ब त दीक्च्येन् घयेक्की इक् झ्यीक्केन् बेत्। 33खीत्रङ्गी रङ्ल गा झ्यीक्केल्लरङ् क खीक्की गय झ्यीक्को़त्न ॱनी, हील घन्डे तो़प्प दी युङ्गो़त् सीक्केन्? हीगो डस्सी रोरङ्ल गा झ्यीक्केन् घयेत्ल गा त दीक्च्येन् घयेक्की इक् झ्यीक्केन् बेत्। 34खीत्रङ्गी जप्केन् घयेत्लरङ् क कीम्ब तोङ्गो़त्न ॱनी, हील घन्डे तो़प्प दी युङ्गो़त् सीक्केन्? हीगो डस्सी जेङ् जप्केल्ल त दीक्च्येन् घयेक्की इक् रोरङ्सो नङ्दु तोङ्री चीगेन् बेत्। 35हुगो डस्सी मेम्ब, खीत्रङ्गी ड घयेत्ल झ्यम्ब धङ् गय झ्यीज्यीत्। घन्डे जप्च्ये आ ॱनो़न आक्, कीम्ब तोङ्ज्यीत्। हुनी क हीगी ढीक्ल गलेन् छ्यीम्मु थोप्केन् बेत्। हुनी खीत्रङ् इगी थोरी चीदु स्युगेन् को़न्ज्योक्की भीज ॱङो़न्ने हीम्बल डोगेन् बेत्। घन्ड हीन् सीन्न ढीन् ॱमीत् ॱसम्गेन् धङ् मी ङेम्ब घयेत्ल खोङ्गी गय जेक्केन् बेत्। 36खीत्रङ्गी यप् ॱङीङ्ज्यी च्येम्म यो़प्प डस्सी खीत्रङ् ॱअङ् युङ झ्यीज्यीत्।
ॱयोङ्गी गोल थो़न्न च्यो़न्स्यो़त् ॱमत् तो़न्ज्यीत् ३७-४२
37खीत्रङ् ॱयोङ्गी गोल थो़न्न च्यो़न्स्यो़त् ॱमत् तो़न्ज्यीत्। तो़न्न ॱनी, खीत्रङ्ल को़न्ज्योक्की ठीम् च्येत्न छ्येप्प को़गेन् बेत्। खीत्रङ्गी ॱयोङ्ल छ्येप्प ॱमत् को़ज्यीत्। केन ॱनी, को़न्ज्योक्की खीत्रङ्ल आक् छ्येप्प को़गेन् बेत्। खीत्रङ्ल ॱयोङ्गी ङीब झ्यीज्युङ्न, हुगो धक्तु ची़च्च्यीत्। हुनी क को़न्ज्योक्की इक् खीत्रङ्गी ङीब धक्तु ची़क्केन् बेत्। 38टो़च्च्यीत्। हुनी क खीत्रङ्ल आक् दीङ्न ॱस्योक्क पीज्योङ्म ज्यप्न च्यक् च्यक् झ्यीन तीक्केन् बेत्। घन्ड हीन् सीन्न खीत्रङ्गी घन्दुक् झ्यीबे ॱस्योक्क ज्यप्न तीक्कुक्क हुगो डस्सी खीत्रङ्ल आक् ज्यप्न तीक्केन् बेत् सीन्न ॱसुङ बेत्।
39खोङ्गी हुबल पी च्यीक् इक् हीन्दुक् सीन्न ॱसुङ बेत्। स्यर्च्योक् च्यीक्की स्यर्च्योक् च्यीक्रङ् लक्टी़त् तप्न ठीक् छुगो़प्प बेक्कक् ॱनी? ठीक्न ॱनी हुब ॱङीक्कर् जरोक्ल जक्केन् हीन्डो न ॱनी। 40चयेलमले ॱलोप्टुक् खेबा मीत् युङ्गेन् बेत्। हुगी कुरीक् ॱलप्न ॱस्यीनी क, हुगो चयेलमजो़त् युङ्गेन् बेत्।
41रङ्गी ॱमीक्ल त दुङ्मक् यो़क्केल्ल घन्दुक् झ्यीन पी़न्ज्या ॱयोङ्गी ॱमीक्ल यो़प्पे झ्यीत्तुक् थोङ् छुगेन्? 42रङ्गी ॱमीक्ल यो़प्पे दुङ्मक् दी त ॱमीत् थोङे, पी़न्ज्या ॱयोङ्ल घन्दुक् झ्यीन ङे रङ्गी ॱमीक्की झ्यीत्तुक् हुगो तो़ङ्गी सीन्न सीर् छुगेन्? ॱवे छ्यीलेल नङ् मत् लेब, ॱअल रङ्गी ॱमीक्ल यो़प्पे दुङ्मक् दी तो़न्न पुर्न ॱसेबोक्म थोङ्गेल्ल सो़। हुनी क हस्सो़त् पी़न्ज्या ॱयोङ्गी ॱमीक्ल यो़प्पे झ्यीत्तुक् दी रङ्गी तो़न् छुगेन् बेत्।
दोङ्बुल पीबे डेबु छ्यागेन् ४३-४५
43दोङ्बु ॱस्यीङ्दोक् गङ्ज्येल्ल डेबु आक्पा छ्यागो़प्प बेक्कक् ॱनी? दोङ्बु आक्पाल यङ् डेबु गङ्ज्येन् छ्यागो़प्प बेक्कक् ॱनी? 44दोङ्बु ॱस्यीङ्दोक् गा धङ् आक्पा हुगी डेबु दील तेन खीत्रङ्गी ॱह घो छुगेन् बेत्। अप्ले डेबु धङ् गोङ्गोङ्गी डेबु चीन्देरेक्पे दोङ्बुल छ्यागो़प्प बेक्कक् ॱनी। 45ॱसीम्ल घन्डे घेङ्न यो़दङ् हुगो ख दीनी इक् थो़ङ्गेन् बेत्। मी सङ्बी़ ॱसीम्बे जो़त्ल गागी ढङ् घङ् देन यो़प्प घयेत् दी तो़ङ्गेन् बेत्। मी ङेम्बे यङ् रोरङ्गी ॱसीम्बे जो़त्ल अयेक्पे ढङ् घङ् देन यो़प्प घयेत् दी तो़ङ्गेन् बेत्।
खीम् सोवल ॱसप्स्योङ्गी लेमु ४६-४९
46ङे क दीलरङ् ॱमीत् चीये, खीक्की ङल घन्डल चोव ज्यीन्दक्, चोव ज्यीन्दक् सीक्केन्। 47ङ च्येल्ल युङ्न ङे केच्च्य ॱस्येप्पल नेन्न हुगो डमु झ्यीक्केन् दी घन्दुक् झ्यीबे मी युङ्गेन् बेक्क ङे ॱस्येत् योङ्। 48हुगी रोरङ्गी खीम् दी तीङ्रीङ्मु ॱसप्स्योङ् ज्यप्न दो तीङ्दो़ खल सोगेन् बेत्। हुनी छ्युरोक् यङ्रोक् युङ्न अक्, हुगो ॱसप्तेन् डम्बोक्मल सो़नी, हुगी खीम् हुगो योक् योक् ठी़त् ठी़त् मीत् झ्यीक्केन् बेत्। 49ॱनी ङे केच्च्य घोनी इक्, हुगो डमु मीत् झ्यीक्केन् दी यङ् हीगो डस्सी युङ्गेन् बेत्। हुगी रोरङ्गी खीम् दी ॱसप्स्योङ् मत् ज्यब, नुक्रङ् सोगेन् बेत्। हुनी छ्युरोक् युङ्नी, हुगो च्यप् च्यीक्ल वयङ् रुम् डोगेन् बेत् सीन्न ॱसुङ बेत्।
Currently Selected:
लुका 6: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
