लुका 15
15
लुक् तोर्नरे पी च्यीक् १-७
1हुनी येशुगी केच्च्यल नेन्दु सीन्न गोलदर् घयेत् धङ् दीक्च्येन् ॱयोङ्म घयेत् खोङ् च्येल्ल गज्येन् युङ्न यो़प्प बेत्। 2ॱनी फरीसी घयेत् धङ् छ्यो़डीम्गी चयेलम घयेक्की हुगो थोङ्नी, हुब तव लङ्न खोङ्गी ढीक्ल हीगी मी हीगी दीक्च्येन् घयेत् युङ्दु ची़त्न हुबदङ् सम सगुक् झ्यीब बेत्। 3ॱनी हुगी लेम्बुल येशुगी पी च्यीक् हीन्दुक् सीन्न ॱसुङ बेत्। 4खीत्रङ्गी छीक्न मी ॱसुल लुक् ज्य च्यीक् यो़दङ् ॱनी हुनी च्यीक् तोर्न खुर्न ॱनी, हुगी लुक् गुप्च्यु घोर्कुब दी पक्कदु स्यक्नी हुगी च्यीक्पु दी ॱयेङ्दु मीत् डोगेन् दी खीत् ॱसु दी यो़प्प? 5ॱनी तोर्नर दी ॱङीत्नी, हुगो ज्यप्ल खुर्न गेसक्की 6लोक्न युङ्गेन् बेत्। हुनी हुगी रोरङ्गी दगु ॱनम्बु धङ् खीम्जीब घयेत् दीब रोरङ्गी खीम्ल भो़न हुबल हज्यरङ् गेस झ्यीदोङ्। ङे लुक् तोर्नर दी ॱङीच्च्युङ् सीन्न सीक्केन् बेत्। 7ङे खीत्रङ्ल ॱस्येत् योङ्। हुगो डस्सीरङ् को़न्ज्योक्की मी ढङ्बु, ॱसीम् ज्युर् मीत् गो़गेन्, गुप्च्यु घोर्कुले दीक्च्येन् च्यीक् ॱसीम् ज्युर्न युङे ढीक्ल गेस छ्यीया तेङ् यी़दु युङ्गेन् बेगो।
टङ्ग तोर्नरे पी च्यीक् ८-१०
8यङ् भुमु च्यीक्ल ॱङुगी टङ्ग च्यु यो़प्प बेत्। हुनी च्यीक् तोर्न खुर्न ॱनी, हुगी बत्ती पेक्न खीम्गी ढज्यक् ढुज्युक् छ्यान ॱस्यीप्पोक्म ॱयेङ्गेन् बेत्। 9ॱनी हुगो ॱङीत्नी, रोरङ्गी दगु ॱनम्बु धङ् खीम्जीब दीब भो़न हुबल हज्यरङ् गेस झ्यीदोङ्। ङे टङ्ग तोर्नर दी ॱङीच्च्युङ् सीन्न सीक्केन् बेत्। 10ङे खीत्रङ्ल ॱस्येत् योङ्। हुगो डस्सीरङ् दीक्च्येन् च्यीक् ॱसीम् ज्युर्न युङ्न ॱनी, इगीदु को़न्ज्योक्की भङ्ज्येम्ब घयेत् हुगी ढीक्ल गेस झ्यीक्केन् बेत् सीन्न ॱसुङ बेत्।
पब धङ् भु ॱङीगी पी च्यीक् ११-३२
11हीनी हरुङ्द येशुगी हीन्दुक् ॱसुङ बेत्। मी च्यीक्ल भु ॱङी यो़प्प बेत्। 12ॱनी भु च्युङा दीगी पब दील पब ङल थोप्केङ्गी फक् दी ह ङल गो़न ॱनङ्रो झ्यी सीन्न स्यी़ब बेत्। ॱनी पब दीगी रोरङ्गी नोर् घयेत् दी गो़न भु ॱङीबु दील टेप्प बेत्।
13हुनी भु च्युङा दी धोबा च्यीक्नी रोरङ्ल थोबे नोर् घयेत् दी खुर्न थक्रीङ्मी़ लुङ्ब च्यीक्ल टप्नर बेत्। ॱनी हुदु हुगी ॱनो़दोक् झ्यीक्कीन् थेच्चो़त् झ्यीनी, नोर् घयेत् दी जेङ् सेत्नर बेत्। 14हुनी हुगी लुङ्ब दील तोरी ॱस्योर बेत्। ॱनी हुल घन्ड अक् मीप्पल भत्त छ्यर बेत्। 15हुनी हुगो हुगी लुङ्बे मी च्यीक्की ॱयोक्पु च्यीक्ल स्युब बेत्। ॱनी हुगी ज्यीन्दक् दीगी हुगो स्यीङ्गल फक्प ॱसोदु तङ बेत्। 16ॱनी हुगो ढोप्प तोबे फक्तो ओक् सगीन् थेप्प झ्युङ बेत्। ॱनी फक्तो दी इक् मत् नोङ बेत्। ॱयोङ्मागी इक् हुल ॱसी़ इक् घन्ड अक् ॱमत् टेप्प बेत्। 17हुनी क हुल ॱनोक्सम् ॱलीब बेत्। हुनी हुगी ॱसीम् दील ङे पबे खीम्दु ॱङलक्प घयेत्ल अक् ढोप्प डङ् डङ् सज्ये ॱनोङ्न ॱल्हक्मु उक् लेगेन् बेत्। ङ ॱनी हीन तोबे ॱस्यीयेत्। 18ङ बोर पब च्याल लोक्न खोङ्ल हीन्दुक् सीक्केन्। पब, ङे तेङ् यी़न स्युगेल्ल धङ् पबरङ्गी थुल मीप्पे ले ङे ङीब दीक्प झ्यीबेन्। 19ङ ह नीज्यरङ्गी भु बेत् सीरल ओ़ब मीत्। ॱनी हीन्न अक्, नीज्यरङ्गी ॱयोक्पुजो़त् च्यीक्ल ॱसम्न स्योक्रो झ्यी सीच्च्ये ॱनो़ब छ्यर बेत्। 20हुनी हुगो पब दी च्याल लोक्न युङ बेत्।
युङ्नी, पब दीगी हुगो पीगीनी छुल्ल युङ थोङ बेत्। ॱनी पब दी ॱङीङ् छये, हुगी दोङ्ल ज्युन फीम्ब बेत्। हुनी ठेत्नी, हुल फङ्ब तप्न च्युप् झ्यीब बेत्। 21ॱनी भु दीगी रोरङ्गी पब दील पब, ङे तेङ् यी़न स्युगेन् धङ् पबरङ्गी थुल मीप्पे ले ङे ङीब दीक्प झ्यीबेन्। ङ ह नीज्यरङ्गी भु बेत् सीरल ओ़ब मीत् सीन्न झ्यीब बेत्। 22ॱनी पब दीगी रोरङ्गी ॱयोक्पु दीबल खीत्रङ्गी ज्योक्सी झ्यीन घो़ गस्स्यो च्यीक् खुर्न हील को़न्। ॱनी ॱसोत्तोक् च्यीक् धङ् जुत्त च्यीक् खुर्न हील को़न्न टो़त्। 23हुनी ॱलङ्डुक् गस्स्यो च्यीक् ॱसो़त्लेत्। हुगो सेन ग ग ढो़त् ढो़त् झ्यीदोङ्। 24घन्ड हीन् सीन्न ङे भु हीगो ॱस्यीनर डस्सीनी ॱसोम्बुल लोङ्ज्युङ्। तोर्न खुर यङ् ॱङीच्च्युङ् सीन्न झ्यीब बेत्। हुनी ग ग ढो़त् ढो़त् झ्यीब बेत्।
25ॱनी हुगी यङ्ल भु छ्यीया दी स्यीङ्गल यो़प्प बेत्। ॱनी हुगो खीम्ल लोक्न युङ्नी, फच्चो़त्नी स्यप्र फक्पे केत् धङ् घन्ड ज्युको़र्त्न अक्, ज्युरे केत् च्यीक् ॱह घोव बेत्। 26हुनी हुगी ॱयोक्पु च्यीक् रोरङ् च्याल भो़न हुल उन घन्डे ढीक्ल हुन्दुक् झ्यीगुक्क? सीन्न ढीब बेत्। 27ॱनी ॱयोक्पु दीगी लेल्ल नीज्यरङ्गी मीङ्बु लोक्न ॱलीच्च्युङ्। हुगो थङ्बुव ज्याबुव यो़प्प ठेत्नी, नीज्यरङ्गी पबे ॱलङ्डुक् गस्स्यो च्यीक् ॱसेत्न, ग ग ढो़त् ढो़त् झ्यीक्केन् बेत् सीन्न ॱस्येप्प बेत्। 28हुनी हुगो सीगुक् लङ्न, हुगी ङ खीम्ल मीत् स्युक् सीन्न छ्यीदु देत् तङ बेत्। ॱनी पब दी छ्यील थो़न्न युङ्न हुल नङ्ल ॱस्योक् सीन्न स्युव ज्यब बेत्। 29ॱनी हुगी पब दील ङ नीज्यरङ्गी ॱयोक्की ले झ्यीन युङ्नी, लो गज्येन् ॱसोङ्। हजो़त् थुक्ल ङ नीज्यरङ्गी क धङ् धम्ल चीन देप्पेन्। ॱनी हीन्न अक्, नीज्यरङ्गी ङल ङे दगु घयेत्तङ् दल ग ग ढो़त् ढो़त् झ्यीच्च्येल नम्ल अक् रालोक् च्यीक् इक् टेत् ॱमत् ॱनोङ्। 30नीज्यरङ्गी भु हुगो छ्येमु घयेत्तङ् दल दो़क्केन् धङ् नीज्यरङ्गी नोर् घयेत् पुर्केन् हुन्दुक् झ्यीबे ढीक्ल यङ् नीज्यरङ्गी ॱलङ्डुक् गस्स्यो दीरङ् ॱसो़क्केन् सीक्केन्? झ्यीब बेत्। 31ॱनी पब दीगी हुल ङे भु खो़त् त ङदङ् दल फुगी दो़क्केन् बेत्। ङल घङ् यो़प्प हीगो कुरीक् रङ्गी बेत्। 32रङ्गी मीङ्बु ॱस्यीनर डस्सील ॱसोङ ॱसोम्बुल लोङ्ज्युङ्। तोर्न खुर यङ् ॱङीच्च्युङ्। हुगो झ्यीनी गेस मत् झ्यीबे ॱनी सीन्न सीक्केन् बेत्।
Currently Selected:
लुका 15: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
