युहन्ना 7
7
येशु धङ् खोङ् रोरङ्गी मीङ्बु १-९
1हीनी येशु गालीलागी लुङ्बे नङ्दुरङ् गीर्न देप्प बेत्। यहुदीयागी नङ्ल यहुदी छ्यीया घयेक्की येशु ॱसो़च्च्येल ॱयेङ्गेन् झ्यीनी, खोङ् हुदु डोगीन् ॱमत् थेप्प बेत्। 2हीनी यहुदी घयेक्की दीङ्गीम्ल दो़प्पे धी़रीम् दी ॱस्यच्चल ॱलीत् छर हीङ्गो़प्प बेत्। 3ॱनी येशुगी मीङ्बु दीबे खोङ्ल रङ् यहुदीयागी लुङ्बल ज्युक्, हुदु उक् रङ्गी झ्यीप्पे ले घयेत् दी रङ्गी ॱलोप्टुक् घयेक्की थोङ्ज्येल। 4मी ॱसी़ रोरङ्गी मीङ् छ्यीयाल थो़न्ज्ये ॱनो़गो़दङ् हुगी गोङ्न ले मीत् झ्यीक्केन् बेत्। रङ्गी हुन्दुक् झ्यीत् छुगो़त्न ॱनी, रङ् ॱसु हीम्ब हुगो जम्बुलीङ्गी मी कुरीक्ल तो़न् सीन्न झ्यीब बेत्। 5ॱनी म दी येशुगी मीङ्बु दीबे एक् येशुल छ्य मीत् स्योक्को़प्प बेत्। 6ॱनी येशुगी हुबल हुन्दो ङ हुदु डो मत् रेम्ब बेत्। खीत्रङ् घयेत् नम् फीन्न आक्, डीक्केन् बेत्। 7जम्बुलीङ्गी मी घयेक्की खीत्रङ्ल ॱङीङ्मदुक् मीत् झ्यीक्केन् बेत्। मी घयेक्की ले ङेम्ब घयेत् ङे तो़ङ्गेन् झ्यीनी, ङलरङ् ॱङीङ्मदुक् झ्यीक्केन् बेत्। 8खीत्रङ् धी़रीम्ल ज्युक्। ङ हुन्दो डोये धी़ ॱमत् ॱलीबल मीत् डो सीन्न 9हुनी येशु गालीलादुरङ् देप्प बेत्।
दीङ्गीम्दु दो़प्पे धी़रीम्गी यङ्ल १०-५३
10खोङ्गी मीङ्बु दीब ॱसोङ्नी, हुनी येशु उक् हुबे तीङ्ल ॱमत् थोङाल यरुशलेम्ल फीम्ब बेत्। 11ॱनी हुगी धी़रीम् दी ॱस्यर्नी, यहुदी छ्यीया घयेत् दीबे हुगी मी हुगो घन दुक्क? सीन्न घल अक् ॱयेङ बेत्।
12हुगी धी़रीम्गी यङ्ल यरुशलेम्दु मी कुरीक्की येशुगी ढीक्ल रोरङ्सो ॱनम्बु यरीगी हुगी मी हुगो गङ्ज्येन् दुक् झ्यीब बेत्। ॱनी यरीगी यङ् हुगो घन्डे गगो़प्पेक्क। हुगी मी घयेत्ल ॱयोङ्गोर् ज्यक्केन् बेत् सीन्न केत्मीत्ल लप्री चीय बेत्। 13यहुदी छ्यीया घयेत्ल ज्यीबे, येशुगी ढीक्की केच्च्य हुबे मी ॱयोङ्मागी घोस्सल घन्ड अक् मत् लब बेत्।
14तीङ्ला धी़रीम् दी छ्यीक्क यो़नी, हुनी हस्सो़त् येशु छ्यो़गङ्गी च्यारील फीन्न मी घयेत्ल ॱलोप्स ज्यब बेत्। 15ॱनी हुदु यहुदी छ्यीया घयेत् दीब येशुगी केच्च्यल ॱह लेन, रोरङ्सो ॱनम्बु हीगी मी हीगी चयेलमरङ् ॱमत् तीम्बल घन्दुक् झ्यीन नुक्मे तम् खेब ॱस्यीगेन् बेक्क? झ्यीब बेत्। 16ॱनी येशुगी हुबल ङे ॱस्येप्पे ॱलोप्स हीगो ङे मेम्ब, ङ तोङ्गेङ्गी बेत्। 17ॱनी हीगो को़न्ज्योक् च्यानी झ्युङे ॱलोप्स हीन् धङ् ङरङ्गी हीन् मी ॱसी़ को़न्ज्योक्की थुल यो़प्पल चीगुक्क हुगीरङ् हीगो ॱयुव पीक् ॱस्यीगेन् बेत्। 18ॱसी़ इक् को़न ॱमत् तङ, रोरङ् रङ्स्यीगी तम् ॱस्यो़क्केन् दीगी रोरङ्ल तो़प्प ॱयेङ्गेन् बेत्। ॱनी ॱसी़ रोरङ्ल मेम्ब, रोरङ् तोङ्गेल्ल तो़प्प ॱयेङ्गुक्क हुगो धक्केन् बेत्। हुल मीत् दीम्बे ढङ् च्यीक्तङ् मीत् युङ्गेन् बेत्।
19छ्यो़डीम् हुगो खीत्रङ्ल धङ्बुदु मोशागी ॱनङ मेम्बेक्क ॱनी? ॱनी हुल खीत्रङ् ॱसी़ इक् मीत् नेङ्गेन् बेत्। हरुङ्द खीत्रङ्गी ङ ॱसो़क्केन् सीगुक्। घन्डे ढीक्ल ॱसो़क्केन्? झ्यीब बेत्। 20ॱनी हुबे येशुल रङ्ल ॱनो़प्प अयेक्प स्यीम्ब हीङ्गो़प्पेत्। खो़त्ल ॱसु दीगी ॱसो़क्केन् सीगुक्क? झ्यीब बेत्। 21ॱनी येशुगी लेल्ल ङीत्तुवल ङे मी च्यीक् ढक्तु ची़प्पे ले झ्यीबल खीत्रङ् ॱह लेबे ॱस्यीसोङ्। 22मोशागी कल यो़प्पल भीजल यहुदीगी दक् ज्यक् गोगेन् बेत् सीर यो़क्केन् बेत्। ॱनी हुगी क हुगो दीम्बरङ् मोशागी ॱनङ मेम्ब, हुले एल्ला पुबु ॱमुमी़ ङोनीरङ् झ्युङ्न युङ बेत्। ॱनी खीत्रङ्गी हुगो ङीत्तुवलरङ् खीन आक्, ज्यक्केन् बेत्। 23हीगी दक् ज्यक्पे ङीन् दी ङीत्तुवल खीन, खीत्रङ्गी दक् ज्यक् गोगेन् मोशागी क दी छ्यीयाल ॱसम्न ङीत्तुवलरङ् ज्यक्केन् बेत्। ॱनी दक् हुले त गा ङीत्तुवल ङे मी च्यीक् जेङ् ढक्तु ची़प्पल खीक्की ङल घन्डल खोङ्डोक् झ्यीक्केन्? 24खीत्रङ् ॱहोप् ॱनो़बे ठीम् ॱमत् च्यो़प्प, ॱनोक्सम् तङ्न ठीम् ढङ्बु च्यो़त् झ्यीब बेत्।
25ॱनी उन यो़क्केन् यरुशलेम्गी मी यरीगी रोरङ्सो ॱनम्बु हज्यरङ्गी लुङ्बे ॱवङ् च्येम्म चो छ्यीया घयेक्की ॱसो़च्च्येल ॱयेङ्गेङ्गी मी दी हुगो मेम्बेक्क ॱनी? 26हुबे ॱनी हुल घन्ड अक् मीत् झ्यीप्पेत् न ॱनी। तो़ न। रोगी हुन्दुक्म ॱहब दुब मीप्प, केच्च्य ॱस्यो़क्कुक् न ॱनी। हुबे हुगो को़न्ज्योक्की को़बे च्यप्को़न् ख्रीष्ट् दीरङ् हीम्ब ॱह घोन छ्य स्योक्को़प्प न घन्ड च्यीक् न? 27को़न्ज्योक्की को़बे च्यप्को़न् ख्रीष्ट् दी थो़न्न ॱनी, हुगो घनी युङ् धङ् युङ् मीप्प थो़ङ्गेन् बेत्। ॱनी हुन्दो हीगी थो़न्से फयु हज्यरङ् कुरीक्ल ॱस्यो़च्च्ये यो़क्केल्ल हुगो ख्रीष्ट् हीन् ॱमीत् ॱस्यीगेन् बेत् झ्यीब बेत्।
28हीनी छ्यो़गङ्गी च्यारीदु मी घयेत्ल ॱलोप्स ज्यक्पे यङ्ल येशुगी केत् छ्यीम्मु तो़न्न हुगी मी दीबल खीत्रङ्गी ङ ङु ॱस्यीगो़त् सीगुक्। ङ थो़न्से फयु उक् ॱस्यो़च्च्ये यो़त् सीगुक्। ङ ङरङ् नुक्रङ् ॱनो़बागी युङ मेन्। ङ तोङ्गेन् खोङ् दीम्ब च्येम्म यो़क्केन् बेत्। खोङ् खीत्रङ्गी ङु ॱमीत् ॱस्यीगेन् बेत्। 29ङ खोङ् च्यानी खोङ्गी तङ्न युङ झ्यीनी, ङेरङ् क खोङ् ङु ॱस्यीगो़त् सीन्न ॱस्येप्प बेत्। 30हीगो ॱह घोनी, हुगी मी दीबे येशु सुङ्ज्येम गीम्ब बेत्। ॱनी को़न्ज्योक्की थुल यो़प्पे धी़ दी ॱमत् ॱलीबल ॱसी़ इक् येशुल लक् ज्यक् ॱमत् छुब बेत्। 31ॱनी हीन्न अक्, उन यरी गज्येङ्गी येशुल छ्य स्यक्प बेत्। हुबे रोरङ्सो नङ्दु को़न्ज्योक्की को़बे च्यप्को़न् ख्रीष्ट् दी हीगो मेम्ब, तीङ्ला ॱयोङ् च्यीक् युङ्गो़त्न ॱनी, हीगी झ्यीबले एक् ॱल्हक्मागी यीक् छ्यीम्मी़ लेगी ता घयेत् त हुगी तो़न् ॱमीत् छुगो़ट्टो झ्यीब बेत्।
32ॱनी हीगो डस्सी येशुगी ढीक्ल मी गज्येङ्गी केत्मीत्ल तम्स्यु लब फरीसी घयेक्की ॱह घोव बेत्। ॱह घोनी, हुब घयेत् धङ् छ्यो़प्पो़न् चो छ्यीया घयेक्की छ्यो़गङ्गी गोराब यरीबल येशु सील्लेत् सीन्न तङ बेत्। 33ॱनी उन मी घयेत्ल येशुगी हुन्दो ङ ॱरीप्चो़त् च्यीक् खीत्रङ्दङ् दल दो़क्केन्। हुनी ङ तोङ्गेन् च्याल डोगेन्। 34हुनी खीत्रङ्गी ङ ॱयेङ्गेन् बेत्। ॱनी ॱयेङ्न आक्, ॱमीत् ॱङीक्केन् बेत्। घन्ड हीन् सीन्न ङ झ्यीस्सल खीत्रङ् युङ् ॱमीत् छुगेन् बेत् झ्यीब बेत्। 35ॱनी उन यो़क्केन् यहुदी छ्यीया दीबे रोरङ्सो नङ्दु हीगो घल डोगेन् सीन्न, हज्यरङ्ल ॱमीत् ठेप्प यो़त् सीक्केन् बेक्क? हीगो लुङ्ब ॱयोङ्ल यो़प्पे यहुदी घयेत्ल धङ् ज्यी़त् ॱयोङ् ग्रीक्की मी घयेत्ल ॱलोप्से केच्च्य ॱस्यो़त्तु डोगेन् सीक्केन् हीम्ब न? 36स्येन् हुगी तम् हुगो घन्ड हीन् सीक्केन् बेक्क? हज्यरङ्गी ॱयेङ्गेन् बेत्। ॱनी ॱयेङ्न आक्, रो ॱमीत् ॱङीब यो़त् सीगुक्। ॱनी यङ् रो झ्यीस्सल हज्यरङ् युङ् ॱमीत् छुगेन् बेत् सीगुक् झ्यीब बेत्।
37हीनी हुगी धी़रीम् जोबे ङीन् छ्यीस्स्यो दीगी यङ्ल येशु लोङ्न खोङ्गी केत् छ्यीम्मु तो़न्न खीत्रङ् ॱसुल कोम्ब दुक्क हुगो ङ च्याल युङ्न थुङ्। 38ॱनी ॱसी़ हुगी छ्यु हुगो थुङ्न ङल छ्य स्योक्कुक्क हुगी ढीक्ल को़न्ज्योक्की ॱसुङ्रप्ल हीन्दुक् सीर थो़ङ्गेन् बेत्।
हुगी ॱसीम्बे नङ्नी छ्यु ॱसोम्बु छ्युम्बुक् डस्सी थो़न्न युङ्गेन् बेत् सीन्न झ्यीब बेत्।
39हीगो म दी येशुगी रोरङ्ल छ्य स्योक्केन् घयेत्ल धम्बे थु थोप्केङ्गी ढीक्ल ॱस्येप्प बेत्। ॱनी हीगी यङ्ल येशु खोङ् रोरङ्गी तो़त्वङ् च्येम्मे ओ़च्च्यल मत् लोक्पल धम्बे थु तङ्न मत् युङ बेत्।
40ॱनी उन मी यरीगी हीगो गन्दीय को़न्ज्योक्की कलुङ् ॱस्यो़क्केन् च्यीक् थो़ङ्गेन् बेत् सीक्केन् दी हीङ्गो़प्पेत् झ्यीब बेत्। 41ॱनी यरीगी यङ् हीगो को़न्ज्योक्की को़बे च्यप्को़न् ख्रीष्ट् दी हीङ्गो़प्पेत् झ्यीब बेत्। ॱनी यरीगी यङ् हुगो मेम्बेत्। ख्रीष्ट् गालीलानी थो़न्न युङ् ॱमीत् ॱस्यीगेन् बेत्।
42को़न्ज्योक्की ॱसुङ्रप्ल को़न्ज्योक्की को़बे च्यप्को़न् ख्रीष्ट् दाऊद्गी ज्यी़त्ल दाऊद्गी फयु बेथ्लेहेम्नी थो़ङ्गेन् बेत् सीर मीन्दुक्क ॱनी? झ्यीब बेत्। (मीका ५:२)
43हुन्दुक् झ्यीन येशुगी ढीक्ल तम् मत् डीक्पल हुगी मी घयेत् दी भीनर बेत्। 44ॱनी यङ् मी यरीगी येशु सुङ्ज्ये ॱनो़ब झ्यीब बेत्। ॱनी हीन्न अक्, म दी ॱसी़ इक् लक् मत् ज्यब बेत्।
45हीनी येशु सुङ्दु तङे छ्यो़गङ्गी गोराब दीब छ्यो़प्पो़न् चो छ्यीया धङ् फरीसी घयेत् दीब च्याल लोक्न फीम्ब बेत्। ॱनी गोराब दीबल हुब घयेक्की खीक्की हुगो घन्डल सुङ्न मत् युङ? सीन्न ढीब बेत्। 46गोराब दीबे लेल्ल हुगी तम् ॱस्येप्प हुगो डस्सी हुन्दो थुक्ल मी ॱसी़ इक् ॱस्यो़प्प थोङ् ॱमत् ॱनोङ् झ्यीब बेत्। 47हुनी फरीसी दीबे खीत् इत् हुगी ॱयोङ्गोर्ल थुम्ज्युङ ॱनी? 48हीन ॱवङ् च्येम्म चो छ्यीया घयेत् धङ् ङीत् फरीसी घयेक्की ॱसी़ इक् हुल छ्य मीत् स्योक्प खीक्की थोङ्मोङ? 49ॱङुव सुक्नर छ्यो़डीम् ॱमीत् ॱस्यीगेङ्गी मी हीब घयेक्कीरङ् हुल छ्य स्योक्केन् बेत् झ्यीब बेत्।
50ॱनी हुब घयेक्की छीक्नी एल्ला लेन् च्यीक् येशु च्येल्ल ठेत्तु युङे मी नीकोदेमस् दीगी रोरङ्गी दगु दीबल 51हज्यरङ्गी छ्यो़डीम्गी लेमुल ॱअल एल्ला हुगी मी दील ङीब यो़प्प मीप्प दी तेनी क, हस्सो़त् हुल छ्येप्प को़ छुगेन् बेत्। स्येन् हुल घन्दुक् झ्यीन छ्येप्प को़गेन्? झ्यीब बेत्। 52ॱनी हीगी लेल्ल हुब घयेक्की रङ् अङ् गालीलागी मी हीङ्गो़प्पेत् व। ॱसुङ्रप्ल नम् च्यो़त्ल तो़दे त। हीनी क गालीलानी कलुङ् ॱस्यो़क्केन् ॱस्युली ॱमीत् थो़ङ्गेन् हीम्ब दी रङ्गी ॱह घोगेन् बेत् झ्यीब बेत्। 53[हुनी हुब घयेत् ॱसोस्सोरङ्गी खीम्ल लोक्न खुर बेत्।
Currently Selected:
युहन्ना 7: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
