युहन्ना 8
8
ॱयोङ्दङ् ङीब झ्यीबे भुमु च्यीक् सुङ्न ठीक्प १-११
1हुनी येशु ओलीप्की लदोक् दील जेन फीम्ब बेत्। 2ॱनी नेम्बेत् दी ॱङेन्ज्याल येशु यङ् छ्यो़गङ्ल लोक्न युङ बेत्। ॱनी हुदु च्यारी दीदु यङ् खोङ् च्येल्ल मी गज्येन् जोम्न युङ्नी, खोङ् देत्न हुबल ॱलोप्स ज्यप्न टेप्प बेत्।
3ॱनी हुदु छ्यो़डीम्गी चयेलम धङ् फरीसी घयेत् दीबे भुमु च्यीक् येशु च्याल खोङ्गी दोङ्दु ठीक्न युङ बेत्। हुगी भुमु दी ॱयोङ्दङ् ङीब झ्यीप्प ठेप्प हीङ्गो़प्प बेत्। 4ॱनी हुबे येशुल चयेलम हीगी भुमु हीगो ॱयोङ्दङ् ङीन दो़प्प मी यरीगी थोङ्दुक्। 5ॱनी मोशागी ढीबे छ्यो़डीम्गी कल हीन्दुक् झ्यीबे मील रुप्न दोर्तुङ् बेन्न ॱसो़त् गोगेन् बेत् सीर दुक्। ॱनी हील खोक्की घन्ड सीक्केन्? झ्यीब बेत्। 6हीगो म दी हुबे येशुल ॱङेत्त ॱयेङ्ज्येगी ढीक्ल छो़त् तेब हीङ्गो़प्प बेत्। ॱनी येशु चोक् चोक्ल देत्न ॱसल जुक्मी़ यीगी ढीगील्ल देप्प बेत्। 7ॱनी हुबे येशुल खेत् गेन्न तम् ढीनी, हुनी खोङ् टङील लोङ्न हुबल खीत्रङ्गी छीक्न दीक्प ॱस्युली मत् झ्यीबे मी दी ॱसु यो़प्प हुगी ॱएन्स्युक्ल हील दोर्तुङ् बेन् झ्यीब बेत्। 8हुनी यङ् खोङ् गुक् दीरङ् झ्यीन ॱसल जुक्मी़ यीगी ढीब बेत्। 9ॱनी हुगो घोनी, हुब गेन्स्यो़न्नी झ्यीन रीम् री रीम् टप्नर बेत्। ॱनी भुमु दीरङ् येशुगी लोदु टङील लेब बेत्। 10हुनी येशु लोङ्न भुमु दील रङ्ल हुबे घन् दीगी इक् छ्येप्प केमोङङ् ॱनी? झ्यीब बेत्। 11ॱनी भुमु दीगी लेल्ल ला ॱसी़ इक् केमोङ्। हुनी येशुगी ङ अक् रङ्ल छ्येप्प ॱमीत् को़। ह लोक्ल ज्युक्। हीनी झ्यीब दी फीच्च्य यङ् दीक्प मत् झ्यीत् झ्यीब बेत्।]
येशुल पङ्बु गो़ब धङ् मीत् गो़बे ढीक्ल १२-२०
12हुनी येशुगी च्यारी दीदु जोम्बे मी घयेत् दील हीन्दुक् सीन्न ॱस्येप्प बेत्। जम्बुलीङ्गी मी घयेत्ल युङे मेङ्ग दी ङ हीन्। ॱनी ङे लम्ल युङ्गेन् दी मेन्नक्ल गीर् मीत् गो़ब, हुगोल छी टो़क्केङ्गी मेङ्ग युङ्गेन् बेत् झ्यीब बेत्।
13ॱनी उन यो़प्पे फरीसी दीबे येशुल रङ्गी ढीक्ल रङ्रङ् पङ्बु झ्यीन ॱस्येप्पे तम्गी घन्दुक् झ्यीन धक्केन्? झ्यीब बेत्। 14ॱनी येशुगी लेम्बुल ङे ढीक्ल ङरङ्गीरङ् पङ्बु झ्यीन ॱस्येत्न आक्, ङे तम् हीगो धक्केन् बेत्। घन्ड हीन् सीन्न ङ घनी युङ बेक्क, घल डोगेन् बेक्क हुगो ङल ॱस्यो़च्च्ये यो़त्। खीत्रङ्ल हुगो ॱस्यो़च्च्ये मीप्प बेत्। 15खीत्रङ्गी कोलीमीगी लुसे ठीम् च्यो़क्केन् बेत्। ङे ॱसुल आक् हुन्दुक् झ्यीबे ठीम् ॱमीत् च्यो़प्प यो़त्। 16ङे च्यो़त् गो़ झ्युङ्न, हुगो धक्तेन् युङ्गेन् बेत्। घन्ड हीन् सीन्न ङ छ्युवक् मेम्ब, ङ तोङ्गेन् यप् धङ् ङ कङ्ज्यीक्ल झ्यीन च्यो़क्केन् बेत्। 17खीत्रङ्गी छ्यो़डीम्ल
पङ्बु ॱङीगी तम् दी डीक्सोङ्न ॱनी, हुगो धक्केन् बेत् सीन्न ढीन यो़क्केन् बेत्। (ठीम्लु १९:१५)
18ॱनी ङे ढीक्ल पङ्बु च्यीक् त ङरङ् यो़त्। च्यीक् ङ तोङ्गेन् यप् यो़क्केन् बेत् झ्यीब बेत्। 19हुनी हुबे येशुल हुगो हीन्न, खोक्की यप् दी घन यो़प्प ॱनी? सीन्न ढीब बेत्। हील येशुगी खीत्रङ्गी ङ अक् ङु ॱमीत् ॱस्यीगेन् बेत्। ङे यप् अप् ङु ॱमीत् ॱस्यीगेन् बेत्। खीत्रङ्गी ङ ङु ॱस्यीन क, ङे यप् ङु ॱस्यीबेत् क झ्यीब बेत्।
20हीगी तम् हीगो छ्यो़गङ्गी च्यारीदु पयीसक् पुसे लोदु येशुगी ॱलोप्स ज्यप्न ॱस्यो़प्पे यङ्ल झ्यीब बेत्। ॱनी हुदु कुरीक्की थोङ्सल ॱस्येत्न आक्, खोङ्गी धी़ दी ॱमत् ॱलीबल ॱसी़ इक् मत् सुङ बेत्।
येशु को़न्ज्योक्की ॱरेबु हीम्ब तो़ङ्गेन् २१-३०
21ॱनी येशुगी फीच्च्य हुब घयेत्ल ह ङ हीनी टप् डोगेन् बेत्। हुनी खीत्रङ्गी ङ ॱयेङ्गेन् बेत्। ॱनी ङ झ्यीस्सल युङ् ॱमीत् छुब, खीत्रङ् हीदु ॱसोस्सोरङ्गी दीक्पल भीङ्न ॱस्यीगेन् बेत् झ्यीब बेत्। 22हुनी उन यहुदी छ्यीया दीबे रोरङ्सो ॱनम्बु हुगी रो झ्यीस्सल हज्यरङ् युङ् ॱमीत् छुगेन् बेत् सीक्केन् हीगो घन्ड बेक्क? हुगी रोरङ्गी रोरङ् ॱसो़क्केन् न घन्ड ब अक्? झ्यीब बेत्। 23ॱनी हुबल येशुगी खीत्रङ् हीगी बेत्। ङ इगी तेङ्गी बेत्। खीत्रङ् जम्बुलीङ् हीगी बेत्। ङ जम्बुलीङ् हीगी मेम्बेत्। 24हीगो झ्यीनी, ङे खीत्रङ्ल दीक्पल भीङ्न ॱस्यीगेन् बेत् सीक्को़त्। ङ ॱसु हीन् सीगुक्क हुल छ्य मत् स्यक्न ॱनी, खीत्रङ् गन्दीय ॱसोस्सोरङ्गी दीक्पल भीङ्न ॱस्यीगेन् बेत् झ्यीब बेत्। 25ॱनी हुबे येशुल खो़त् म दी ॱसु हीम्ब ॱनी? सीन्न ढीनी, येशुगी ङे एल्लानी ॱस्येत्न युङेन्। ङ हुगोरङ् हीन्। 26खीत्रङ् घयेक्की ङीबे ढीक्ल ठीम् च्यो़च्च्येम धङ् तम् ॱस्यो़च्च्येम गज्येन् यो़त्। ॱनी यो़त्न अक्, हुन्दो ङ तोङ्गेन् खोङ्गी च्यानी ङे घङ् ॱह घोव घयेत् दीरङ् ङे जम्बुलीङ्गी मी घयेत्ल ॱस्यो़क्को़त्। ङ तोङ्गेन् खोङ् धक्तेन् यो़क्केन् बेत् झ्यीब बेत्। 27येशुगी केच्च्य हीगो खोङ् रोरङ्गी यप्की ढीक्ल ॱस्येप्प हीम्ब हुबे ॱह मत् घोव बेत्। 28हुगो झ्यीनी, येशुगी यङ् हुबल कोलीमीगी ॱरेबु खीत्रङ्गी ॱनम्ल तानी क, हस्सो़त् ङ ॱसु बेक्क हुगो धङ् ङरङ् च्यीक्पी़ घन्ड अक् मीत् झ्यीप्प, यप्की ङल घङ् ॱङाब दीरङ् ॱस्यो़क्को़त् झ्यीब दी हुगी यङ्ल क खीत्रङ्गी ॱह घोगेन् बेत्। 29ङ तोङ्गेन् खोङ् ङदङ् दल यो़क्केन् बेत्। ङे छीगङ् खोङ् गुवे ले झ्यीक्केन् झ्यीनी, खोङ्गी ङ च्यीगी च्यीक्पु मीत् स्योक्केन् बेत् झ्यीब बेत्। 30हीगो ॱस्येत्नी, हुनी मी गज्येङ्गी येशुल छ्य स्यक्प बेत्।
अब्राहाम् धङ् येशुगी केच्च्य ३१-५९
31हुनी येशुगी रोरङ्ल छ्य स्यक्न यो़क्केन् यहुदी छ्यीया घयेत् दील ङे केच्च्य ॱस्येप्पल खीत्रङ् थीरीय देत्न ॱनी, खीत्रङ् ङे ॱलोप्टुक् खुङ् हीम्बल युङ्गेन् बेत्। 32हुनी हस्सो़त् खीत्रङ्गी दीम्ब दी ॱह घोगेन् बेत्। ॱनी दीम्बे खीत्रङ् रङ्मो़ल तो़ङ्गेन् बेत् झ्यीब बेत्। 33ॱनी हुबे लेम्बुल ङीत् अब्राहाम्गी ज्यी़त् हीन्। हजो़त् थुक्ल ङीत् ॱसी़ ॱयोक्ल आक् ॱमत् ॱस्योर, रङ्मो़ च्येम्म यो़त्। खोक्की घनी दी तो़ङ्गेन् सीक्केन्? झ्यीब बेत्। 34ॱनी येशुगी हुबल ङे खीत्रङ्ल गन्दीय ॱस्येत् योङ्। मी ॱसी़ दीक्प झ्यीगुक्क हुगो दीक्पे ॱयोक्ल ॱस्योर्न, रङ्मो़ मीत् युङ्गेन् बेत्। 35ॱयोक्पुल ॱहक् घन्ड अक् मीत् युङल हुगो खीम्ल फुगी मीत् दो़क्केन् बेत्। ॱनी भु दी हस्सो़त् फुगी दो़क्केन् बेत्। 36हीगो झ्यीनी, ॱरेबी़ खीत्रङ् रङ्मो़ल तो़न्न ॱनी, हुनी गन्दीय रङ्मो़ च्येम्मल युङ्गेन् बेत्। 37खीत्रङ् अब्राहाम्गी ज्यी़त् हीम्ब ङल ॱस्यो़च्च्ये यो़त्। ॱनी हीन्न अक्, खीत्रङ्गी ॱसीम्ल ङे केच्च्य दीरङ् मीत् स्युक्पल ङ ॱसो़च्च्येमल झ्यी़ तगेन् बेत्। 38ङे ङरङ्गी यप्की च्यादु घङ् थोङ घयेत् दीरङ् ॱस्यो़क्को़त्। खीत्रङ्गी इक् खीत्रङ्गी पबे च्यानी घङ् घोव दी डस्सीरङ् झ्यीक्केन् बेत् झ्यीब बेत्। 39ॱनी हुबे लेल्ल ङीक्की पुबु दी ॱनी अब्राहाम् हीन् झ्यीब बेत्। हील येशुगी खीत् अब्राहाम्गी ज्यी़त् हीन्न, खोङ्गी झ्यीब दी डस्सीरङ् झ्यीप्पेत् क ॱनी। 40खीत्रङ्ल ङे को़न्ज्योक् च्यानी घोवे दीम्बे केच्च्य ॱस्येप्पल खीत्रङ्गी ङ ॱसो़च्च्येमल झ्यी़ तगेन् बेत्। ॱनी अब्राहाम्गी हीगो डस्सी मत् झ्यीब बेत्। 41खीत्रङ्गी पबे झ्यीब दी डस्सी खीत्रङ्गी इक् झ्यीक्केन् बेत् झ्यीब बेत्। ॱनी हुबे लेल्ल ङीत् पब ॱयोङ्गी नली मेन्। ङीत्ल पब को़न्ज्योक् च्यीक् मेन्द मीत् झ्यीब बेत्। 42ॱनी येशुगी हुबल खीत्रङ्गी पब को़न्ज्योक् खुङ् हीन्न ॱनी, ङ को़न्ज्योक् च्यानी युङल खीक्की ङल झ्यम्ब झ्यीप्पेत् क ॱनी। ङ ङरङ् ॱनो़बागी युङ मेम्ब, खोङ्गी तङ्नी युङेन्। 43खीत्रङ्गी ङे केच्च्यल नेन्ज्ये ॱनो़बे ॱसीम् दीरङ् ॱमीत् खुरे, घन्दुक् झ्यीन ॱह घो छुगेन्? 44खीत्रङ् म दीरङ् दी़क्की चोवे भीज बेत्। ॱनी खीत्रङ्गी पबे धेत्मो़ दी डस्सी खीत्रङ्गी इक् झ्यीच्च्ये ॱनो़ब यो़क्केन् बेत्। हुगो धङ्बुनीरङ् मीस्सेन् यो़क्केन् बेत्। हुल म दीरङ् दीम्बे ज्यी़त् दीरङ् मीप्पल दीम्बदङ् दल दो़त् ॱमीत् छुगेन् बेत्। हुगो ॱएलम घयेक्की पब बेत्। हुगो ॱएलमे छङ् झ्यीनी, ॱएलम हुगी खोक्नी लेगी थो़ङ्गेन् बेत्। 45ॱनी खीत्रङ् हुगो ङो़गी झ्यीनी, ङे दीम्ब ॱस्येप्पल खीक्की घन्दुक् दी झ्यीन छ्य स्योक् छुगेन्? 46ॱस्यो़त्ते त। ङे दीक्प झ्यीसोङ् सीन्न, हुगो खुङ् च्यो़ छुगेन् दी खीत् ॱसु दी यो़प्प? हीगो मेन्न, ङे दीम्ब ॱस्येप्पल खीत् घन्डल छ्य मीत् स्योक्केन्? 47को़न्ज्योक् ङो़गी मी दीगी को़न्ज्योक्की केच्च्यल नेङ्गेन् बेत्। खीत्रङ् को़न्ज्योक् ङो़गी मेम्बल मीत् नेङ्गेन् बेत् झ्यीब बेत्।
48हुनी हुगी यहुदी छ्यीया दीबे येशुल रङ् सामरीयागी मी रङ्ल ॱनो़प्प अयेक्प स्यीम्ब हीङ्गो़प्पेत्। बेगङ् ॱनी? झ्यीब बेत्। 49ॱनी येशुगी लेम्बुल ङे ङरङ्गी यप्ल तो़प्प झ्यीबल ङल घन्दुक् झ्यीन ॱनो़प्प अयेक्प स्यीन्दुक् सीक्केन्? खीत्रङ्गी ङल हीगो ङेन्दम्गी तम् बेत्। 50ङे ङरङ्ल तो़प्प ॱमीत् ॱयेङ यो़त्। ङल तो़प्प युङ्दु ची़क्केन् धङ् ङल ठीम् तगेन् दी ॱयोङ् च्यीक् यो़क्केन् बेत्। 51ङे खीत्रङ्ल गन्दीय ॱस्येत् योङ्। मी ॱसी़ ङे केच्च्यल नेन्न झ्यीगुक्क हुगोल नम्ल अक् ॱस्यीव मीत् युङ्गेन् बेत्। 52हीगी लेल्ल हुगी यहुदी छ्यीया दीबे येशुल रङ्ल ॱनो़प्प अयेक्प दीरङ् स्यीन्न खुर्तुक्। ह त ङीक्की दीम्बरङ् ॱह घोज्युङ्। पुबु अब्राहाम् ढोङ् छर। ॱनी धङ्बी़ कलुङ् ॱस्यो़क्केन् घयेत् एत् ढोङ् छर। ॱनी खोक्की घन्दुक् झ्यीन ङे केच्च्यल नेन्न झ्यीक्केन् दी नम्ल अक् ॱमीत् ॱस्यीय यो़त् सीक्केन्? 53खो़त् कलुङ् ॱस्यो़क्केन् घयेत् धङ् पुबु अब्राहाम्ले एक् छ्यीया हीन् ॱनो़गो़प्प ॱनी? हुब घयेत् ढोङ् छर बेत्। खो़त् म दी रङ्गी रङ्ल घन्ड हीन् ॱनो़ब ॱसम्गो़प्प? झ्यीब बेत्। 54ॱनी येशुगी लेम्बुल ङे ङरङ्ल तो़प्प ॱयेङ्गो़त्न, हुगो घो ॱमीत् छ्यो़क्की तो़प्प बेत्। ङल तो़प्प ङरङ्गी यप् च्यानी युङ्गेन् बेत्। ॱनी खीत्रङ्गी खोङ्ल ङीक्की को़न्ज्योक् हीन् सीन्न सीगुक्। 55ॱनी म दी दीम्बरङ् ङु दी ॱमीत् ॱस्यीगेन् बेत्। ॱनी ङेरङ् क खोङ् ङु ॱस्यीगो़त्। ॱनी ङे ङु ॱमीत् ॱस्यीब यो़त् सीक्को़त्न, ङ अक् खीत्रङ् डस्सीरङ् ॱएजङ युङ्गेन् बेत्। ॱनी हीगो मेम्ब, ङे दीम्बरङ् ङु ॱस्यीगो़त्। ॱनी खोङ्गी ॱसुङ्रप्ल आक् नेन्न झ्यीक्को़त्। 56खीत्रङ्गी पुबु अब्राहाम्गी ङ थो़न्न युङल दो़न्दो़त् तगीन् थेप्प झ्युङ बेत्। ॱनी थोङ्नी, गेस गन्दीक्म झ्युङ बेत् झ्यीब बेत्। 57ॱनी हुबे लेल्ल खो़त् फोलो ॱङप्च्यु ॱमत् ॱलीबे मी घन्दुक् झ्यीन अब्राहाम् थोङ्ज्युङ् सीगो़प्प? झ्यीब बेत्। 58ॱनी येशुगी ङे खीत्रङ्ल गन्दीय ॱस्येत् योङ्। अब्राहाम् ॱमत् कीबे एल्लानीरङ् ङ यो़क्केल्ल झ्यीब बेत्। 59हीगो सीन्नी, हुब घयेक्की येशुल दोर्तुङ् बेन्ज्येम दो डुब बेत्। हुनी येशु मी घयेक्की छीक्नी फल्ल इप्तामु झ्यीन च्यारीनी छ्यील थो़न्न टप्नर बेत्।
Currently Selected:
युहन्ना 8: LHM
Highlight
Share
Copy
Want to have your highlights saved across all your devices? Sign up or sign in
© 1995 Wycliffe Bible Translators, Inc. and Nepal Bible Society
