MAROMU 7

Maeledzo yarengwa hari mwa mufano wa ndrolo

1Wananyangu, afa kamusujua amba iSharia utawalia mutru tu v̄ale alio hayi? Mana v̄anu nisulagua na watru wajuao iSharia. 2Ha mufano, iSharia iyo ufungamanisa mutrumushe na mume wahe piya wakati mutrumume ule alio hayi; ɓadi neka umutrumume afu, v̄ale umutrumushe aɓuliwa na iSharia yakomufungamanisa na mutrumume wahe ule. 3Ɓasi ha izo, neka andre adziv̄a mutru wangina wakati mume wahe alio hayi, v̄av̄o atsorongolwa amba muzindzi. Ɓadi neka mume wahe afu, v̄ale aɓuliwa na iSharia, tsena amololwa na mutru wangina katsoka muzindzi.

4Ɗe ha inamuna iyo wanyu wajau wananyangu: mufu mbeli za iSharia ha uv̄umoja wanyu na umwili wa Kristi, pare av̄asa muke wa mutru wangina, ule aregezewa hayi ulawa ha uwafu, ile pare rimuv̄ingiye Mungu mavuna. 5Mana wakati raka ratawaliwa na zitaɓia za shi unadamu zatru, zingushauku za ufanya dhambi zitsongeshewao na iSharia zakoruma ziga za umwili watru, ha namuna amba rakotoa mavuna yav̄ingao hari mwa ufa. 6Ɓadi av̄asa riɓuliwa mbeli za iSharia, mana rifu ha itrongo ile yakorifunga, ha namuna amba av̄asa risumurumishia Mungu ha utawalizi muv̄ia wa iRoho, ɓadi tsi ɗe ha indzia ya utawalizi wa hale, ne ɗe iSharia yaangihwa.

iSharia isuriv̄enulia lidhambi

7Ɓasi v̄anu rirongowe jeje? Amba Sharia, lilo dhambi? Ata hata! Ɓadi tsatsojua amba dhambi ɗe liv̄i, neka tsi ha iSharia. Mana tsatsojua amba udzihafukanisa iyo mbovu, na djeli iSharia kayaka yarongoa: «Usudzihafukanise.» 8Ɓadi ha iãmuri ile, dhambi lipara nafasi ya utsonga kula namuna ya uhafukanifu moni hangu. Mana neka kav̄u Sharia, v̄av̄o dhambi lifu. 9Hale oho, ɓaanda raha iSharia kayaka, tsika hayi. Ɓadi wakati iSharia yaja, v̄av̄o dhambi liv̄enuha amba la hayi, 10na wami tsifu. Mana iãmuri yakolazimu iv̄inge uhayati, hanguju iniv̄ingia ufa. 11Mana dhambi lipara inafasi linidanganya, ha ndzia ya iãmuri, na ha indzia ya iãmuri, liniulu. 12V̄av̄o kweli amba iSharia ya ndzitwaharifu, na iãmuri wajau ya ndzitwaharifu, ya haki, tsena ndzuzuri.

13Ɓasi v̄anu trongo ndzuzuri ile ɗe hanguju yafanyiha ufa? Ata hata! Ɓadi lidhambi, ha indzuzuri ɗe laniv̄ingia ufa, ile liv̄enuhe na udhambi walo, pare ha indzia ya iãmuri lidhambi lizidi uv̄enuha amba dhambi.

Moni ha mwanadamu v̄wa kondro kinyume na dhambi

14Risujua amba Sharia, iyo trongo ya shiroho; ɓadi wami shiumbe mwendza mwili, tsa murumwa wa dhambi. 15Tsisuelewa trongo niifanyao. Mana tsisufanya iyo niitsahao, ɓadi iyo niiengao ɗe niifanyao. 16Neka iyo niifanyao ɗe ile tsisutsaha, v̄av̄o tsikuɓali amba Sharia, iyo ndjema. 17Ɓasi ha izo, tsi tsena wami ɗe nifanyao trongo iyo, ɓadi ɗe lidhambi lilio moni hangu. 18Nisujua amba kav̄u ndjema ilio moni hangu, yaãni v̄av̄o, hari mwa ihali ya shiuɓinadamu yangu. Kweli amba inia ya ufanya ndjema ya v̄av̄o, ɓadi ushindzi wa uifanya ɗe kav̄u. 19Mana tsisufanya indjema niitsahao, ɓadi nisufanya imbovu ile tsisuitsaha. 20Na neka nisufanya iyo tsisuitsaha, v̄av̄o tsi wami ɗe niifanyao, ɓadi ɗe lidhambi lilio moni hangu.

21Ha izo, tsimaizi isharia ini hanguju: namotsaha nifanye ndjema, mbovu ɗe inijiliao. 22Mana moni na umo wangu, wami ujiv̄iwa na iSharia ya Mungu. 23Ɓadi nisuona sharia yangina hari mwa ziga za umwili wangu iwanao kinyume na ile ya iãkili yangu, na isharia iyo isunifanya mufungwa wa isharia ya dhambi ilio hari mwa ziga za umwili wangu. 24Masikini wami! Mbani ɗe atsonikomboao na umwili unu univ̄ingao hari mwa ufa? 25Natukuzihe Mungu, ha ndzia ya Insa-Kristi Raɓi watru!

Ha izo ɓasi, ini ɗe iheli nilio: wami-wami ha iãkili yangu, tsa murumwa wa iSharia ya Mungu, na ha ihali ya shiuɓinadamu yangu, murumwa wa isharia ya dhambi.

Currently Selected:

MAROMU 7: swb

Highlight

Copy