MAROMU 6

Uhayati mukamilifu ha uv̄umoja na Insa-Kristi

1Ẽhẽ v̄av̄o rirongowe trini? Hali riɓaki hari mwa madhambi, pare ineema ya Mungu izidishihe? 2Ata hata! Yahusu dhambi, wasi rifu. Ɓasi v̄av̄o ha namuna jeje ritsoẽshio raha moni mwalo? 3Afa kamwajua amba piyasi raɓaĩshiwa ha uv̄umoja na Kristi Insa, v̄av̄o riɓaĩshiwa hari mwa ufa wahe? 4Hari mwa umuɓaĩsho|uɓaĩsha wa ufa uwo, v̄av̄o ridzihwa v̄umoja na waye, ile pare mauri ɗe inamuna Kristi aregezewa hayi ha ulawa hari mwa ufa ha utukufu wa Ɓaɓa, wasi wajau rikane maendreleo ya uhayati muv̄ia.

5Kweli amba neka rifanyiha shitru shi moja na waye hari mwa ufa mauri ɗe wahe, v̄av̄o ritsofanyiha tsena shitru shi moja na waye hari mwa umuregezeo hayi mauri ɗe wahe. 6Risujua amba utru watru wa ãswili uremwa mizumari v̄umoja na waye hari mwa umuri wa pawa, ile itaɓia ndziãswifu yatru iangamidziwe, rasuke tsena warumwa wa dhambi. 7Mana mutru afa ukombolwa na ushindzi wa dhambi.

8Ɓadi neka rifu v̄umoja na Kristi, v̄av̄o rina uaminifu wa kusudi amba ritsoẽshi v̄umoja na waye wajau. 9Mana risujua amba rangu Kristi alawa hari mwa ufa, aregezewa hayi, waye katsofa tsena, wala uufa kawamutawalia tsena. 10Mana ufa yahe, ushindzi wa yamadhambi ɗe aufilia mara moja, amma ha daima; na uẽshi yahe, ha Mungu ɗe aẽshio.

11Ɗe ha inamuna iyo wanyu wajau, namudzihetsiye mauri uhusu dhambi mufu, tsena mauri mwa hayi ha Mungu ha uv̄umoja wanyu na Kristi-Insa. 12Ɓasi musulishe dhambi latawalia yimili yanyu yitsofao, mwatuĩ zingushauku zayo. 13Wala musuv̄elehe ziga za mwili zanyu zarumishia dhambi, zarendreha zombo za mbovu. Ɓadi namudziv̄e wanyu-wanyu mumurumishiye Mungu, amba watru mulio hayi mwalawa hari mwa ufa, tsena muv̄e ziga zanyu zike zombo zimurumishiao Mungu, zifanye zilio za haki. 14V̄av̄o dhambi kalitsomutawaliani, mana kamusi utsini na iSharia, ɓadi hari mwa urehema.

Nafasi ya ufanya izo Mungu atsahao

15Ɓasi v̄av̄o rirongowe jeje? Rifanye madhambi iv̄o karatawaliwa na iSharia, ɓadi amba ra hari mwa urehema? Ata hata! 16Afa kamusujua amba mwamodziv̄a mutru, mumutuĩ mauri warumwa, v̄av̄o mwa warumwa wa ule mumutuĩo? Neka amba ɗe lidhambi liv̄ingao hari mwa ufa, au wa utuĩvu uv̄ingao hari mwa uhaki. 17Ɓadi himida Mungu, iv̄o ilio amba ɓaanda mwaka warumwa wa dhambi muja mutuĩ, ha piya iroho yanyu, hali ya musomo ilio amba mungia dhwamanani hayo. 18Ɓasi iv̄o mwakombolwa na ushindzi wa dhambi, muja mufanyishiha warumwa wa uhaki.

19Nisulagua shi unadamu, ha siɓaɓu ya udziro wa uelewa wa shiuɓinadamu wanyu. Mauri ɗe inamuna mwaka mwafanya ziga za umwili wanyu warumwa wa tsama na upeu uengedzehao ha upeu, v̄av̄o namufanye av̄asa ziga zanyu warumwa wa ihaki iv̄ingao hari mwa utwaharifu. 20Mana uka yanyu warumwa wa dhambi, mukana nafasi musufanye zilio za haki. 21Mavuna mwakopara trini, iv̄o mwakofanya trongo zilio amba musuzionea haya leo? Mana mwiso wazo ɗe ufa. 22Ɓadi av̄asa mukombolwa na ushindzi wa dhambi, mufanyiha warumwa wa Mungu; mavuna mulionayo ɗe utwaharifu, na umwiso ɗe uhayati mukamilifu wa daima. 23Mana muliv̄o wa dhambi ɗe ufa, ɓadi ineema yadjaãliwa na Mungu ɗe uhayati mukamilifu wa daima hari mwa uv̄umoja na Kristi-Insa, Raɓi watru.

Currently Selected:

MAROMU 6: swb

Highlight

Copy