MAROMU 12
12
Maendreleo mutru alazimu akanewo hari mwa urumishi ha Mungu
1Ɓasi wananyangu, ha siɓaɓu ya urehema wa Mungu, nisumutriani ɓari muelehe umwili wanyu ha Mungu amba kafara lilio hayi, twahara limujiv̄iao Mungu. Iyo ɗe ĩɓada ya kweli yamulazimuni. 2Musudzilinganise na ulemengu wa leo, ɓadi namudzilishe mugaudziwe ãkili yanyu ike pia, ile mushindre mujuwe yamav̄endzeleo ya Mungu, ne ɗe izo zilio ndjema zimujiv̄iao, tsena zarahara.
3Ha ineema nadjaãliwayo, nisuambia kula moja hanyuju: musudzione uju rahana yalazimu, ɓadi kula moja nadzione na ikiasi yalingana na uaminifu Mungu amukadiriawo. 4Mana mwili, uwo moja, ɓadi una ziga nyengi, na hazi zazo tsi moja. 5Ɗe ha inamuna iyo wajau wasi rilio wengi, ra mwili moja ha uv̄umoja watru na Kristi, iv̄o piyasi rilio ziga kula moja ha wanyahe. 6Rina tafauti za neema, zalingana na urehema radjaãliwawo. Monyewe udjaãliwa ineema ya ujudza marongozi ashukidziwa, naifanye ha uɗunga uuaminifu. 7Uwo adjaãliwa ineema ya urumishi, narumishiye, na uwo alio amba ya usomedza, nasomedze. 8Uwo adjaãliwa ineema ya utria ɓari, naifanye; uwo av̄ao, nav̄e ɓila hisaɓu; uwo av̄ingao wanyahe, naifanye v̄umoja na djitihadi, na uwo adjaãliwa ineema ya uonesa poreho, nav̄orehe v̄umoja na furaha.
9Uv̄endza yanyu naike ya kweli, ɓadi tsi ya unafiki. Namuenge uovu, musike hodari uwema. 10Namuv̄endzane wanyu na wanyu ha huɓa ya shi unanya; namukane djitihadi ya uhishimiana. 11Namukane djitihadi ɓadi tsi shiɗa, muke washangirifu wa roho, murumishiye Mola. 12Hari mwa itama mulionayo, namufurahi, moni na taãɓu, namuke na suɓira, mudzifungamanise na mamilio. 13Namusaidiye wanyanyu waaminifu na zingusongefu zawo, muke na djitihadi ya ukariɓisa.
14Namuɓarikishe wao wamutresaoni, muwamiliye ɓaraka, ɓadi musuwaapize. 15Namufurahi v̄umoja na wao wafurahio, mulile na wao walilao. 16Namuafikiane wanyu na wanyu. Musudzitsashiye utru uhu, ɓadi namudzishuhulise na uwatiti. Musudzione wendza ãkili matsoni hanyu.
17Mwasuliv̄e mbovu ha mutru yotsi amufanyiani mbovu. Namudzihetsi ufanya ndjema mbeli za piya uwatru. 18Neka trongo mukinishiha, ha ikadiri itrongo itsokao djukumani hanyu, namuẽshi hari mwa amani v̄umoja na watru piya. 19Musudziliv̄iye kiswa, wandzani wa roho wangu, ɓadi namulishe ihadhaɓu ya Mungu irendre, mana v̄uangihwa moni na uMuangishio: «Uliv̄a kiswa, iyo yangu, wami ɗe nitsoliv̄isao,» asurongoa Mola. 20Ɓadi tsena:
«Neka ãduwi yaho isuona ndza, iv̄e shahula;
neka isuona nyora, iv̄e ya unwa.
Mana wamorendra namuna iyo,
maha ya moro ɗe utsomungulidziao shitswani hahe#12:20 maha ya moro... shitswani hahe Yaãni, utsomuonesa haya..»#12:20 Namuangaliye Wasiya 25:21-22.
21Usudzilishe washindrwa na imbovu, ɓadi shindra imbovu ha uwema.
Currently Selected:
MAROMU 12: swb
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
