MARKUSI 1

Maĩdhwa yatolwa na Yahaya Muɓaĩshizi

(Mat 3:1-12; Luk 3:1-18; Yuh 1:19-28)

1Tsunu umwandro wa iIndjili yapatana na Insa-Kristi|Kristi, Mwana wa Mungu.

2Mauri ɗe iheli yaangihwa na mutrume Izaya:

«Tsunu, nisumuv̄eleha muv̄ingizi-haɓari wangu ahutranguliye,

mutru atsohurengeledzeao indzia yaho.»

3«Lini ɗe liji la mutru ashelemedzao padzaju:

‹Namutayarishe indzia ya Mola,

muondzowe wana ndzia wahe.› »

4 Yahaya|Yahaya Muɓaĩshizi av̄enuha amba akoɓaĩsha padzaju, akoĩdhia watru umuɓaĩsho uɗungao itoɓa, ile waswamihiwe madhambi yawo. 5Piya itsi ya Yudeya na wakazi wa Yerusalemu wakomujilia; wakov̄enua madhambi yawo, amwesa wakoɓaĩshiwa na waye muroni Jurdani. 6Yahaya akopindra nguo yafanyiwa ha madzivuzi ya ngamia, na mukandra wa ngwezi trengaju. Akoɗya maɗatra na ngizi ya nyoshi. 7Akoĩdhia ha urongoa: «Nyuma hangu v̄usuja mutru mwendza ushindzi rahana wami. Tsastahiki ata unyama amba nimuɓuliye ngwe za kaɓwa zahe. 8Tsimuɓaĩshani ha maji, ɓadi waye atsomuɓaĩshani ha iRoho Ndzitwaharifu.»

Muɓaĩsho wa Insa

(Mat 3:13-17; Luk 3:21-22)

9Ɓasi wakati uwo Insa aja ulawa Nazareti, ɗago la Galilaya, aja aɓaĩshiwa na Yahaya muroni Jurdani. 10Ulawa yahe majini v̄ale, sa na isa ile aono zimbingu ziɓuha, na iRoho iv̄o yakomushukia ha mufano wa shukuru. 11Na v̄ale v̄ulawa ji mbinguni, lirongoa: «Wawe ɗe uMwana wangu muv̄endzewa; wami ujiv̄iwa halisi na wawe.»

Shetwani asudjereɓu umuzaini Insa

(Mat 4:1-11; Luk 4:1-13)

12V̄ale kamwe iRoho imuv̄ingi Insa padzaju. 13Na hule pandza la suku aruɓaini Shetwani akodjereɓu umuzaini. Aka v̄umoja na zinyama nyeha, tsena malayika zakomurumishia.

Insa asuhira walozi wanne wamuɗunge

(Mat 4:12-22; Luk 4:14-15; 5:1-11)

14Ɓaanda ya Yahaya ufungwa, Insa andre Galilaya, akojudza iHaɓari Ndjema ya Mungu. 15Akorongoa: «Wakati wahetsiwa upara, Utawalizi wa Mungu ukuruɓia! Namwendre toɓa, tsena muamini iHaɓari Ndjema!»

16Uv̄ira yahe wangoni na iƁahari ya Galilaya|Ɓahari ya Galilaya, aono Simoni na mwananyahe Andreasa, wakotria wavu ɓaharini, mana waka walozi. 17Sa ile Insa awaambia: «Namuniɗunge, na wami nitsomufanyani walozi wanadamu.» 18Ɓas, sa ile kamwe walishi wavu zawo, wamuɗungu.

19Atsengelea mbeli mwanapav̄i, amuono Yakoɓu mwana wa Zuɓudu, na mwananyahe Yuhani, waka wajau moni na laka, wakorengeledza wavu zawo. 20Sa ile kamwe awahiri. Ɓas, wamulishi ɓaɓawo Zuɓudu moni na ilaka v̄umoja na uwatru wa hazi, wamuɗungu.

Mwendza djini la peu asuzihirwa moni mwa iNyumba ya Uswali

(Luk 4:31-37)

21Wawaswili ɗagoni Kafarnaumu, na iSuku ya Uv̄umuzi uja yayo, Insa angia moni na iNyumba ya Uswali, akosomedza. 22Watru wakoshanga na yimisomo yahe, mana akosomedza shi mutru mwendza yezi, ɓadi tsi mauri ɗe yaMafundi ya Sharia. 23Na v̄ale kamwe moni na iNyumba ya Uswali yawo ile, v̄uka mutru akana djini la peu, ashelemedza: 24«Trini ɗe uritsahao nayo, Insa wa Nazareti? Uja uriangamidze? Nisuhujua amba wawe mbani: wawe ɗe uMutwaharifu wa Mungu.»

25Sa ile Insa alagulia djini lile ha urongoa: «Ɓuriha, ulawiye mutru uwo!» 26Ɓasi lidjini limugudzusa mutru ule ha kusudi, amwesa limuɓaushia na ulatsa keme ha ji lendza nguvu.

27Piya watru wasikwa na ushangavu, ata wakodzisana: «Ini trongo trini? Musomo muv̄ia! Asuãmurisha ha yezi ata madjini ya peu, na yao yasumutuĩ!» 28Kayahoma haɓari zahe zienea kula v̄ahanu, hari mwa piya yimikaɓala ya Galilaya.

Insa asumuzihira nyadzahe wa Simoni, na wawaɗe wangina wengi

(Mat 8:14-17; Luk 4:38-41)

29Ulawa yawo moni na iNyumba ya Uswali, wandre ɗagoni ha Simoni na Andreasa; waɗungana na Yakoɓu na Yuhani. 30Nyadzahe wa Simoni aka shitrandrani, mana akana ɓuhuo. Ɓas uja yahe v̄ale, wamuambia Insa trongo ile. 31Atsengelea, amusiki umuhono, amumidzi. Sa na isa ile liɓuhuo limulawia, ata akowayeleshea.

32Jua utswa yalo mahariɓi, watru wamuv̄ingia Insa piya wawaɗe, na wendza mazetwani. 33Na piya liɗago lika lingulidzana mulongoju. 34Azihira watru wengi wakana maradhi ya mbali na mbali, atowo tsena mazetwani mengi, wala kakoyalisha yalagua, mana yakomujua.

Insa asutoa maĩdhwa hari mwa liɓavu la Galilaya

(Luk 4:42-44)

35Na alifadjiri shidza, Insa alawa, andre v̄ahanu v̄watengeha, ile afanye mamilio. 36Sa ile Simoni na wale waka na waye waandrisa umuzunguha. 37Wakati wamupara, wamuambia: «Piya watru wasuhuzunguha.»

38Awadjiɓu: «Narendre v̄wangina, hari mwa yamalago madjirani, ile najudze ihaɓari oho wajau, mana iyo ɗe imana ata naja.» 39Ɓas, andre aĩdhia moni na ziNyumba za Uswali hari mwa piya iGalilaya, tsena atowo mazetwani.

Insa asuzihira mwendza uwaɗe wa uwenefu

(Mat 8:1-4; Luk 5:12-16)

40Suku, Insa aka ajiliwa na muenefu, avundzu malondro mbeli zahe, amwesa amumia zini: «Neka usutsaha, wawe ushindra unirahatse.»

41V̄ale Insa aremwa na poreho, av̄eleha umuhono, amusiki, amwesa amuambia: «Nisutsaha, rahatsishiha!» 42Sa ile kamwe uwenefu umuɓaushia, arahatsishiha. 43Na wakati ɗe uwo ule Insa amuambia andre dzahe, ɓaanda amufahamisha ha kusudi 44ha umuambia: «Vulishia, usuambiye ata mutru trongo izo. Ɓadi endra wadzionese ha uMutolezi-Masadaka|Mutolezi-Masadaka, amwesa utowe lisadaka laãmurishiwa na Musa, ile ike ushahidi mbeli za watru amba urahatsishiha.» 45Ɓadi mutru ule alawa, aandrisojudza kula v̄ahanu itrongo, na uenedza zihaɓari, ha namuna amba Insa kakoshindra tsena ungia ha hadhwira hari mwa ɗago, ɓadi akoɓaki tu v̄ondze hari mwa mikaɓala yatengeha, na watru wakomujilia ulawa kula v̄ahali.

Currently Selected:

MARKUSI 1: swb

Highlight

Copy