MARKUSI 2

Insa asuzihira shirewe

(Mat 9:1-8; Luk 5:17-26)

1Ɓaanda v̄wav̄ira wana suku, Insa aregea Kafarnaumu; na watru wapara ihaɓari amba a ɗagoni. 2V̄uka v̄ungulidzana dunia ɓole ya wanadamu, ata kav̄waka v̄waɓaki tsena ɓandza mulongoju. Akowajudza urongozi wa Mungu. 3V̄umujilia watru waka wav̄inga shirewe yaka yatrihwa na watruɓaɓa wanne. 4Ha iv̄o kawakoshindra wamuv̄inga ata wamupare Insa ha siɓaɓu ya idunia, waɓua ndzia utroju ulingana na v̄ahanu Insa aka, washukidza liɗalo shirewe ile alilalia, ha uliv̄irisa v̄ahanu v̄ale waka wav̄uɓua. 5Wakati Insa aona uaminifu wawo, aambia shirewe ile: «Mwananyangu, madhambi yaho yaswamihiwa.»

6V̄uka ɓaãdhwi ya Mafundi ya Sharia waka waketsi v̄ale, wakodziambia rohoni hawo: 7«Manatrini mutru unu alaguao namuna ini? Asukufuru! Mbani ashindrao aswamihi madhambi, neka tsi ɗe Mungu weke wahe?»

8Sa ile kamwe Insa ajua rohoni hahe izo watru wale wakofikiri, ɓasi awadzisa: «Manatrini muliona fikira mauri ɗe izo rohoni hanyu? 9Iv̄i ɗe ndzangu ya uambia ishirewe: ‹Madhambi yaho yaswamihiwa›, au ɗe umuambia: ‹Hima, urenge ɗalo laho, wendre›? 10Ɓadi ile mujuwe amba uMwana wa Mwanadamu|Mwana wa Mwanadamu ana yezi ya uswamihi madhambi shiv̄andreju mwa tsi...» Aambia shirewe ile marongozi yanu: 11«Nisuhuambia, hima urenge ɗalo laho, wendre ɗagoni haho!» 12Sa na isa ile ahimi, arenge ɗalo lahe, alawa mbeli za piya watru waka v̄ale, ha namuna ya uka amba piyawo waremwa na ushangavu na umutukuza Mungu ha urongoa: «Karaparoona trongo mauri ɗe ini!»

Insa asumuhira Lawi amuɗunge

(Mat 9:9-13; Luk 5:27-32)

13Ha mara yangina tsena Insa andre wangoni na iɓahari#2:13 iɓahari: Yaãni, iƁahari ya Galilaya, au liDzia la Maji la Galilaya.. Piya idunia yakomujilia, na waye akowasomedza. 14Uv̄ira yahe ndziani, amuono Lawi, mwana wa Halifa, aketsi moni na pa la uliv̄isa latete. Amuambia: «Niɗunge!» Sa ile Lawi ahimi, amuɗungu.

15Suku Insa akoɗya ɗagoni ha Lawi, v̄uka wengi wa maliv̄isa-latete|muliv̄isa-latete na maãswifu, wakoɗya v̄umoja na waye na maswihaɓa yahe; mana wengi ɗe wakomuɗunga. 16Wakati Mafundi ya Sharia na watru wa ishama ya *Mafarisayo wamuona amba akoɗya na maãswifu na maliv̄isa-latete, wadzisa maswihaɓa yahe: «Manatrini aɗyao na unwa v̄umoja na maliv̄isa-latete na wendza zitrendro mbovu?»

17Insa ukia yahe trongo zile, awaambia: «Tsi ɗe walio wanono watsahao twaɓiɓu, ɓadi ɗe wawaɗe. Tsaja nahira watuĩvu, ɓadi ɗe maãswifu.»

Misomo ya Insa hari mwa itrongo ya ufunga

(Mat 9:14-17; Luk 5:33-39)

18V̄uka suku maswihaɓa ya Yahaya Muɓaĩshizi na watru wa ishama ya Mafarisayo waka wafungu. Ɓas, v̄uja watru wamudzisa Insa: «Manatrini maswihaɓa ya Yahaya na ya Mafarisayo yafungao, na yaho maswihaɓa kayafungu?»

19Sa ile Insa awadjiɓu: «Hali wadjeni wakariɓisiwa harusini ujua wafunge wakati ɓwana-harusi alio v̄umoja na wao? Piya uwakati ɓwana-harusi atsokao na wao, kawatsojua wafunga. 20Ɓadi v̄utsoja wakati amba watsorengewa ɓwana-harusi; ɓasi uwo ɗe wakati watsofungao.

21Kav̄u mutru asonao gudru la shitamba pia hari mwa nguo yaɗuhwa. Mana neka ɗe namuna iyo, gudru la shitamba pia lile litsorandrua inguo ile yaɗuhwa, na ligatra litsoka ɓole zaidi. 22Wala mutru katria trembo lajemwa av̄asa moni na ziya zaɗuhwa za ngwezi. Mana neka ɗe namuna iyo, litrembo pia lile lamovundra, litsopasua ziya za ngwezi zile, tsena litrembo na ziziya zitsoangamia. Ɓadi ilazimu trembo lajemwa av̄asa litrilwe moni na ziya pia za ngwezi.»

Misomo ju la iSuku ya Uv̄umuzi

(Mat 12:1-8; Luk 6:1-5)

23V̄uka Suku ya Uv̄umuzi, Insa akov̄ira moni na mindra ya murama-mutsa. Maswihaɓa yahe waandrisa ndziani v̄ale uv̄arua wana make. 24Ɓas, watru wa ishama ya Mafarisayo wamuambia: «Ngalia, manatrini wafanyao trongo kayaruhusiwa Suku ya Uv̄umuzi?»

25Insa awadjiɓu: «Kamwaparosoma itrongo Daudu aifanya wakati aka hari mwa usongefu, aka asikwa na ndza, waye na uwatru waka na waye? 26Namuna aka angia moni na iNyumba ya Mungu, wakati wa Aɓiathari Muɓole wa yaMatolezi-Masadaka|Mutolezi-Masadaka, aɗya yamadipe yaka yatamaniwa Mungu, wala ukana kayaka yaruhusiwa mutru atsokao yotsi uyaɗya neka tsi ɗe Matolezi-Masadaka, av̄a tsena wale waka na waye.»

27Amwesa awaambia raha: «iSuku ya Uv̄umuzi ifanyiwa ya mwanadamu, ɓadi tsi mwanadamu amba wa iSuku ya Uv̄umuzi. 28Ha izo, uMwana wa Mwanadamu ɗe Muɓole, ata wa iSuku ya Uv̄umuzi.»

Currently Selected:

MARKUSI 2: swb

Highlight

Copy