ZECHARIAH 12
12
Ampeu no Xakulu Tsü nani
1Israel ghenguno Ampeu tsa: Ampeu khuu atsütsü xachhope qhino ayeghi lhophe eno timi lolo aghungu sütsü keno Pa no hitoi sheshu ani: 2“Julo, I no Jerusalem pesü hokümxa lo ashiaye kümtsü lau hevülalai keu jukhu lakhi shi tsüniye ani. Jerusalem leluve aye Judah ghi qhasü luve nani. 3Tipa tsalani I no ashiaye kümtsü ghenguno Jerusalem pesü atu kimshi toi shitsü nani. Mtsüqheino ti peqheju kemi kümtsü no izave nani. Ayeghiqha lo shiye kümtsü no hekütsü pe tipau mjochile nani. 4Tipani, Ampeu no asheshu, I no khurshi kümtsü kichimamaive peno ti sakichemi pelo izüvuive penani. Ikemu I no ashiayeqow khurshi nhethi kighicheve tsüno Judah lagha ghenguno I nhethi tsükhope anani. 5Tileno Judah laghami no ishi pikile nani, ‘Jerusalem lo küamiqo ye aqokitikhi Mpeu, panongu Lhou vecheo aküka anie.’”
6“Tipa tsalani I no ami kuchughei hipe asü dolo sükeshi Judah laghami pesü aghijini pholo akulu küqüsü nani. Eno panongu no hokümxa lo ashiaye ajeu ngo piyiu akeqo kümtsü kütsave no Jerusalem ye itaghi tipa-a lo küghünauve nani.”
7“Ampeu no Judah phikiqo lau paghi xakulu tsü nani, tishianguno David lagha juküvü eno Jerusalem lo küami juküvü ye Judah kiyeve pemo niye ke. 8Tipa tsalani Ampeu no Jerusalem lo küami süsho nani, tishianguno pano dolo miqemlei kemi no tipa tsalani David toi nani, eno David laghami no Alhou toi, eno AMPEUw kungumi no panongu züu wucheke toi nani. 9Tipa tsalani Jerusalem mjochile ighi keu shiye kümtsü I no kütsaveni ke phu nani.”
Panongu no Qhuqhi keu
10“I no David laghami eno Jerusalem lo küami shou kimiyekini ghungu eno küpükini kighini lepuku tsü nani, tishianguno kughou panongu no I shou jupukuni, pano no qhuqhive keu shou jupukuni keno, panongu no anu lakhi likhi akeu ghenguno mloqa akeshi pa ghenguno mloqa nani, eno anu anoghiu ghenguno kukhukimji shi qa keshi nani. 11Tipa tsalani Jerusalem lo akumlo ye Megiddo lo Hadad-rimmon ghenguno mloqa ketoi nani. 12Ayeghi no mloqa nani, pütüta kibo lo mloqa nani: David laghami kütashi, pano nipuqo kütashi; Nathan laghami kütashi, pano nipuqo kütashi; 13Levi laghami kütashi, pano nipuqo kütashi; Shimei kibolomi kütashi, pano nipuqo kütashi; 14eno kütami kibolomi aghi keqo kütashi, pano nipuqo kütashi, pütüta müzülo mloqa nani.”
Currently Selected:
ZECHARIAH 12: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
