ZECHARIAH 11
11
Ghiqhini ye akeu Mbeloji
1O hukikhaqo khaqhilo, O Lebanon, tishino ami no
ow cedarboqo pitileve penie!
2Mloqa lo, O Cypressbo, kughengu cedarbo ye ikiqivae,
ajekipi süboqo ye kütsavae!
Mloqa lo, Bashan phisüboqo,
kughengu aghasü ye yeqhivae!
3Ambekhemi no mloqa igha ani,
kughengu pano jekipi ye kütsavae! Abongshuuqo no
ighamku ani, kughengu Jordan
lo aghasü ye kütsavae!
4Ikehu Ampeu I Lhou no pi: “Ambe loji ghiqhini ye akeqo lau ambekheu shilo. 5Panongu qhüluve keqo no pano ghiqhive kemu aghime tsümono wuvepe, eno khunono panongu jeve keno tipaqo no pi, ‘Ampeu sheqhelo, ni ye kinimi shivae,’ pano mbekhemi no pano küpümoe. 6Kughengu hipa ghakhu lo küxümiqo lau Ni ye küpükeu kühavae, ipi Ampeu no asheshu. Julo, I no timi lakhikhi pelo pa kisüghüu u lo, eno pa kükau u lo ikiqi ilovepe nani, panongu no ayeghi kütsale nani, eno Ni ye panongu u lono khumu xaphemo nani.”
7Tighenguno ambe küqhümi no ambeloji ghiqhini ye akeqo lau I no akheu shiluve. Eno I no aküsü kini ikhiluve, lakhi je no Qhuivülai keu kuvetsü eno lakhiu je no Küqhakulu kuvetsü. Eno I no ambe jukuto luve. 8Aqhi lakhi lono I no ambekhemi küthü kütsave. Ikemu panongu lau Ni ye kheakulu shimlave eno panoqo ghi I jumithive. 9Tighenguno I no pi, “Ni ye nongu kheu shimoae. Kiu no thiveni ye ani keno, thive peni. Kiu no kütsaveni ye ani keno, kütsave peni. Eno khunoqo achili shini keno lakhino lakhi phiashi chuve peni.” 10I no Iw Qhuivülai keu küsü ikhiluve no ashiaye kümtsü sasü puloshoqhi shikeu hexave ghi ti süchheve. 11Ikehu puloshoqhi ye tipa tsala lono hexave, eno ambe küqhümi, khunoqo I ju akeno, tipaqo no hi ye Ampeu tsa kepi ithive. 12Tileno I no panoqo vilo pi, “Hi no nongu ghenguno alokeu shi aghi aye, I jume I tsülo; ikemu tishimo aye, tipaqo qhiluve lo.” Eno panongu no I jume ghükayi shighi ahu shiphetsü. 13Tile Ampeu no I vilo pi, “Panongu no amekusho shi I jume shitsü keu—ayeghi li kümlau lau ti vepuwuve lo.” Ikehu I no ghükayi shighi ikhipe Ampeu kilo ayeghi li kümlau lau vesüve. 14Tishino I no Judah ngo Israel dolo athiküzü azükighi shi achekeu hexave ghi I küsü akiniu Küqhakulu süchheve.
15Tithiu Ampeu no I vilo pi, “Itaghi ghuthu lakhi mbomzü mbekheu nanu ikhilulo. 16Kughengu julo, I no aghakhu lo ambekheu lakhi saputhuni cheni, pa ye kütsave keqo hijumo, alhotheqo phumo, aghüzaku shipivimo, ashiaji kivishi akeqo lojimo nani, ikemu atha pubeyi akeqo tsüchu eno apukhu shobapu keqo mütsü hexüve tsü nani.
17“Iw ameküküha mbekheu khuu
ambeloji qhive keno ahasapue!
Azütakikihi no pa u ajeu eno
pa nhethi ajeu ghive peniu!
Pa umlo qhoi thizümüive,
pa nhethi ajeu icheve peniu!”
Currently Selected:
ZECHARIAH 11: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
