MATTHEW 14

Baptiz Kishiu John Kithi

(Mk 6:14-29; Lk 9:7-9)

1Tipa ghuloki lo Galilee Tokukujo yepeu Herod no Jisü jekipi chilu, 2pa qholo akeqo vilo pa no pi, “Hi ye Baptiz kishiu John ke. Pa ye akithi lono xüputhuve ke gheno akümzapu küka hipaqo no pa lolo mla ani kena.” 3Kughengu Herod no John küghaluve no tshüpe akughu shive keu ye pa thiküzüu Philip nipu Herodias ghenguno ke, 4John no Herod vilo piche, “Nono li valuve keu ye Ayezah kiqilo kumoe.” 5Herod no John pithiveni shiche kemu timiqo no pa ye tungkupu kepi kihiche, ikehu Herod ye msa cheke. 6Ikemu kughou Herod punu tsala ighi keno, Herodias nga no timiqo zülo ilheno Herod mlo piqitsü, 7ikehu Herod no anga vilo kiukiu mu li no khukeu tsünie pi ashoqhi tsa piqhive. 8Aza no kite ketoi li no pi, “Baptiz kishiu John kütsü akhu lono pewo hileno I tsülo.” 9Akükau ye pa mlo lo akipimi shive, ikemu pa shoqhi eno kuküsümi ghenguno pa no tishi penike azah tsüve. 10Pa no John kütsü süghi penike akughuki lo timi puwu, 11eno kuchou no pa kütsü hu akhu lono pewo anga tsüve, eno li no ti pesü paza lau ighi. 12Tithiu John khopemi no ighi no pa kumo pewo qhove, eno panoqo no wu püzü Jisü vilo pive.

Jisü no Qhethonhe Pungu Loji

(Mk 6:30-44; Lk 9:10-17; Jhn 6:1-14)

13Kughou Jisü no hipau chilu keno, pa ye tileno wuve no ashuka lono pa likhi yenguyi ke-a lo wuve. Ikemu kughou aqokitikhi no ti chilu keno panongu no pano-a qhive no apukhu lono chesü pa papewu. 14Pa no ashuka lono amkü tokelo aqokitikhi ithulu no panoqo jupe amlo ighiqhiyive püzü panoqo gholo küsükinimi shipivitsü. 15Tipani avelau pa khopemi no ighi no pa vilo pi, “Hi ye yenguyi ke-a eno tsüzüvae; timiqo puwu no aphuqo lono achuqupu qhü chulu pelo.” 16Jisü no panoqo vilo pi, “Panongu no wu masa keu kumoe, nongu no kiuala chu kepu panongu tsülo,” 17Panongu no pa khochile, “Hila ningu ye ashopa pungu eno akha kini likhi ani.” 18Jisü no pi, “Tipaqo I lau süghilo.” 19Tileno timiqo vilo atsüni shou iqalo pi pa no azah tsüve. Ashopa pungu eno akha kini ikhipe pa no atsütsü lo jupuku no Alhou shikimthi tsü. Tishino pa no asho süphope pa khopemi tsüno akhopemi no tipaqo pesü timiqo kijetsü. 20Panongu kümtsü no aghapiqi chuve. Tile akhopemi no chukha kumo ashoghi chighikini chhitoi kiche kütsülu. 21Eno tile chukemi kihiju kelo, totimi ngo itimi sümono timi 5,000 kutolo ae.

Jisü no Azü shou Alache

(Mk 6:45-52; Jhn 6:15-21)

22Jisü no timiqo küghüxa puwo akelo pa züuno cheghi peniye pa no mtazü ashuka lono pa khopemi puwuve. 23Timiqo puwove kethiu pa ye akighini shiniye pa likhi naghuto lo iqho. Tsüzüve kethiu ghi Jisü ye pa likhi tile ae, 24ikehu tipa dolo ashuka ye amkü lono kusholo azü fukukucho no sailove, kughengu amülhü no tipau fudaqhi ake. 25Tsükutho lau ayi küthü kihe qhalo Jisü no azü shou no alachesü panoqo lau ighi. 26Kughou akhopemi no pa no azü shou alache chekeu ithulu keno, panongu ye shishe thüghüive no pi, “Hi ye aghawu lakhie!” eno akümsa lono ighau khave. 27Ikemu tipa mtsa Jisü no panoqo pütsa no pi, “Nongu mlo mtolo; ni ke msa kevilo.”

28Peter no pi, “Ampeu, no shiaghi aye I pelo azü shou no o lau ighi penike azah tsülo.” 29Jisü no, “Ighilo” ipi. Ikehu Peter no ashuka lono ipe püzü azü shou no alachesü Jisü lau ighi. 30Ikemu amülhü ithulupe pa ye msave no azü lo ilo cheghive, eno pa no ighamku pi, “Ampeu, I xalulo.” 31Jisü no pai pa u chhope pa tsüqü luve eno pa vilo pi, “O no aküpülü kükühau, kushiye no ye lipive kea?” 32Pama no ashuka lo ilove kelo amülhü no tave. 33Ashuka lo akeqo no Jisü sheqhe ghi pi, “Kuchou no no ye Alhou Nue.”

Gennesaret lo Küsükinimi Shipivi

(Mk 6:53-56)

34Panongu no azüghi kathasü Gennesaret tolu. 35Kughou timiqo no Jisü michilu keno panongu no tipa cheaxü kümtsü lo timi puwu no küsükinimi pa lau saghipe, 36eno küsükinimi pelo pa phishe likhimu bulu pelopi qhüiniju. Kuchou no pa phishe bulu kemi kümtsü viluve.

Currently Selected:

MATTHEW 14: SUMRVBSI

Highlight

Copy