MATTHEW 13

Apitikiveu Kimghikipiye

(Mk 4:1-9; Lk 8:4-8)

1Tipani Jisü no aki lono ipeve no azüghi phivilo ngoa. 2Ikelo aqokitikhi kije no pa süho luve kehu pa no ashuka lo iku iqave. Eno aqokitikhi kümtsü no azümkü lo puthugho ngove. 3Pa no kimghikipiye lono thime kutomo pesü panoqo vilo pi, “Apitikiveu no apiti veniye wu. 4Pa no veche kelo, hami no ala lo ikiqive, eno aghauqo no yeighi no mighipe wuve. 5Hami no ayeghi ghüma lo kumono atuli lo ikiqi ikuve, tipaqo ye ayeghi kutho lo kumo kehu paikhavi no thuikughi, 6ikemu kughou khetsünhe ipeghi keno, tipaqo ye püghaqhive. Eno akuhu qüsümo keke tipaqo ye thizümüi hailove. 7Apiti hami no asahuli lo ikiqi iloluke tipaqo ye asahubo no thuikughi püzü ghüsüve. 8Apiti hami no aghüma kivi lo ilolu eno athi pithilu, hami no aqhe piqi, hami no lhotsügho, hami no shighi. 9Khuu no akini ani keno pa no chilu pelo.”

Kimghikipiye Kimji

(Mk 4:10-12; Lk 8:9-10)

10Tileno akhopemi no Jisü lau ighi no pa vilo pi, “Kushiye no ye kimghikipiye lono timiqo pütsa cheni kea?” 11Pa no khochile, “Kungugha yekipe tuqhou ithi penike nongu lau tsüvae, ikemu panoqo lau ye tsümphi. 12Kughengu khuu lau tsüpüani keno, alau tsü küpha nani, eno pa ye kupukuno shi anani, ikemu khuu no kiumu küha keno, pa no kitila aghikeu ghi luve tsü nani. 13Hi ghenguno I no kimghikipiye lono timiqo pütsa cheni, kughengu panoqo ye ju animu ithulu chemo, ini animu chilu chemo, momu ithikuthulu chemoe. 14Panoqo tsa loye Isaiah no tungkuptsa pikeu kuchou no shikupuvae:

“‘Nongu no chilu nani kemu khilemu ithikuthumo nani,

eno nongu no ithulu nani kemu khilemu vethalumo nani.’

15Kughengu timi hipaqo mlo ye kiumu shikalu moae,

pano kini ye ini kushughivae,

pano nhethi ye miyi luvae,

tikumo aye pano nhethi no ithulu,

pano kini no chilu,

eno pano mlo no ithikuthulu no

tsüghü ighi kelo I no panoqo shipivilu nosa kehue.”

16Ikemu nongu nhethi no ithulu aphike akümghapue, titoi nongu kini no chilu aphike akümghapue. 17Kughengu I no kuchou no nongu vilo piani, nongu no kiu ithulu ani keno tungkupmi ngo amikuchomi kutomo no ithuluni shiche kemu ithumlave, eno kiu chilu ani keno panoqo ghi chiluni shiche kemu chimlave ke.

Apitikiveu Tsa Hephopiye

(Mk 4:13-20; Lk 8:11-15)

18“Tishiaye, apitikiveu kimghikipiye inilo. 19Kughou khuana no Ayekipe Tsa chilu püzü ithikuthu moveni keno, alhoksau no ighi no pa mlo lo yisü mlano akeu piti süxape wuve cheni. Hi no khikhi alaphe lo vesülu keno apiti huke. 20Atuli lo vesülu keu piti ye Atsa chilu no sü-i khavi alokivishi ti ikhilu keu timi, 21tishimu pa lolo akuhu küha keke pa ye ado hami apüzü kughou Atsa ghenguno aghime momu kijiküpsa ighi keno, pa ye pai pheve cheni. 22Asahuli lo vesülu keu piti ye Atsa chiluve keu timi, ikemu ayeghi lo küxü no azüküvü shiuve, eno küakini kimne no pishiqhipe Atsa hu ghüsüve, eno ti ye athi pithi move. 23Ayeghi kivi lo vesülu keu piti ye Atsa chilu no ithikuthulu keu timi ke. Pa ye kuchou no athi pithi cheni, eno xokütsü kelo hami no aqhe piqi ithulu cheni, hami no lhotsügho, eno hami no shighi.”

Alupi Kimghikipiye

24Jisü no kimghikipiye kütau pesü panoqo vilo pi, “Kungugha yekipe ye timi lakhi no apiti kivi pesü pa lulo xusüke toie. 25Akümlami no züake lono aghümi no alupi pewo aghibo gholo yisüve no wuve. 26Kughou aghibo thuikughi no aghipeuve keno, alupi ghi ipeghive. 27Aqemi no alu mpeu kilo ighi no pi, ‘Akijeu, no ye apiti kivi xusüke kumo keshea? Maye kishino alupiqo ghi ani kea?’ 28Pa no panoqo vilo pi, ‘Hi ye aghümi no mlavae.’ Ikehu aqemi no pa vilo pi, ‘Tishiaye no ye ni pelo wuno alupiqo mxave tsü penishi anima?’ 29Ikemu pa no pi, ‘Moe, kughengu nongu no alupi mxa ake lono aghibo ghi nhü küqhave nosae. 30Ghile tomoke kutolo küma kümtsa thuwu aghi pelo, eno ghile ghuloki lono I no ghilemi vilo pini, “Atüghüshi alupiqo nhüpe piti nike piqhe khavelo, ikemu athi thaqhü no pewo I lelo sülo.”’”

Aghanethi eno Kholaqhi

(Mk 4:30-32; Lk 13:18-19)

31Jisü no kimghikipiye kütau panoqo vilo pi, “Kungugha yekipe ye timi lakhi no alu lo aghanethi vesüke toie. 32Aghanethi ye alothi kümtsü nguno aghulou kemu kughou tino thuipeghi keno, aghutu lo atsünibo jeli kümtsü nguno akuloghiu shive no asübo toive cheni, ikehu aghau jeli ighi no tipau lokaqo lo apüsü mla cheni.”

33Itaghi Jisü no kimghikipiye kütau panoqo vilo pi, “Kungugha yekipe ye kholaqhi toike. Totimi lakhi no ti au kichhi lakhi pewo ashomkhu ashoghi kichhi lakhi gholo xukütshü kelo ti kümtsü ingu ipeghive chekeu toike.”#Lk 13:20-21

Tungkuptsa eno Kimghikipiye

(Mk 4:33-34)

34Jisü no kimghikipiye lono atsa hi kümtsü pesü aqokitikhi vilo piche, kuchou no pa ye kimghikipiye sümo kelo panoqo vilo kiumu pimoe. 35Hi ye tungkupu no kiu pipüa keno shikupu niye ke:

“I no kimghikipiye lono pinike I kichi xükhoni;#Lesh 78:2

ayeghi boqha gho kelono kiu küsü püache keno I no pini.”#Rom 16:25,26

Alupi kimghikipiye Hephopiye

36Tithiu Jisü no aqokitikhi qhive no aki lo ilove. Eno pa khopemi no pa lau ighi no pi, “Alupi kimghikipiye ningu lau hephopiye tsülo.” 37Pa no khochile, “Apiti kivi xusü keu ye Timi Nu. 38Alu no ayeghiqha, apiti kivi huno Ayekipe tianuliqo, eno alupi no alhoksau tianuliqo ke. 39Eno khuu alupi yisüve tsü keno, ti aghümi huye tüghami ke. Ghile huno tiqheli shekuho, eno ghilemi no kungumi ke. 40Alupiqo thaqhü piqhe küqhape ami lono pitive ketoi, tiqheli shekuho lo ghi titoi nani. 41Timi Nu no paw kungumi puwu no pa kükaqha lo axine kuhu aghü eno küsaküghami kümtsü panoqo no xukumqo nani, 42eno panoqo pesü amiqo lo vesüve nani. Tile küqa kumlo eno ahu tsüghü bubushi nani. 43Ikemu amikuchomi ye panongu Papu kükaqha lo khetsünhe toi vünani. Khuu no akini ani keno pa no chilulo.

Küsü püakeu Kinikhuki

44“Kungugha yekipe ye alu lo akinikhuki küsü püake toike. Timi lakhi no tipau chhuphelu püzü itaghi jonhave no pa lokivi lono idewo pa no aghikeu qhoi jekütsüpe alu tipau qhüluve.

Amekusho Mlapuchi

45“Itaghi, kungugha yekipe ye küqhükilimi no mlapuchi kivi phu cheke toike. 46Pa no ighono amekusho mlapuchi kivi ithulu kelo idewo pa no aghikeu qhoi jekütsüpe tipau qhüluve.

Akhame Kimghikipiye

47“Itaghi kungugha yekipe ye akhame lakhi azüghi lo vesü kelo akha jeli kümtsü velu chekeu toike. 48Kughou akhame kichhishi veluni keno, timiqo no amkü lo sünhe saipe qhino akha kivi kishepe pano qhupu lo süve, ikemu alhoksa thaqhü ye peve. 49Tiqheli shekuho lo ghi titoi nani. Kungumi no ipeghi no amikuchomi launo alhoksami kishephe luve nani, 50eno panoqo ye pesü amiqo lo vesüve nani. Tile küqa kumlo eno ahu tsüghü bubushi nani.

51“Nongu ye hi kümtsü ithikuthu luve akema?” Panoqo no, “Iyei” ipi. 52Pa no panoqo vilo pi, “Tighenguno Ayezah shikükami khuu pesü kungugha yekipe ghenguno qophe luve akeno, pa ye aki mpeu toike. Pa kinikhuki lono thime kiu no akithe eno kiu no aqa keno kümtsü ikhiphelu cheni.”

Nazareth lo Jisü Kileve

(Mk 6:1-6; Lk 4:16-30)

53Kughou Jisü no kimghikipiye hipaqo pitave keno, pa ye tileno wuve, 54eno pa phughi lo ighi kelo pa no sinagog lono timiqo kütsü, ikelo panongu no ighono akichiqhive no pi, “Timi hipau ye khile no alokütsü eno akumto kümla shinikeu ithulu kea? 55Pa ye asü kümlau nuke kumo? Paza je Mary ke kumo? Eno James, Joseph, Simon ngo Judas noqo ye pa thiküzümi ke kumo? 56Pa chelimiqo ye ningu gholo acheni ke kumo keshea? Tishiaye pa ye khileno thime hipaqo ithulu kea?” 57Eno panoqo no pa kileve. Ikemu Jisü no panoqo vilo pi, “Tungkupu lakhi ye pa punugha eno pa kibo lono kumo aye khilehi mu agigihu kühave chemoe.” 58Eno panoqo no pülü mlaveke ghenguno pa ye tile akümzapu kümla kutomo shimove.

Currently Selected:

MATTHEW 13: SUMRVBSI

Highlight

Copy