MATTHEW 12

Jisü ye Sabbath Mpeu

(Mk 2:23-28; Lk 6:1-5)

1Tipa ghuloki lo Jisü no Sabbath tsala lono aghi lu lakhi kathasü wuche. Pa khopemi ye müzüthive kehu panongu no aghipe muxupe chuthuve. 2Ikemu kughou Phariseemi no ti ithulu keno, panoqo no Jisü vilo pi, “Julepi, Sabbath khuaye lo kiu ani keno o khopemi no ti hebide ani.” 3Jisü no panoqo vilo pi, “Nongu ye David no müzüthive kelo pa gholo kichemi sasü kiu shikeno philu mphi kea? 4Pa no Alhou kilo ilo Ampeu mllakeu sho chukelo ti ye achinemi sala likhi kehu pa shi aghina, pa gholo kichemi namu, ti chuni keu yezah kühake. 5Momu Moses Yezah lo kishi achinemi no Sabbath atsütsü achineki lono Sabbath shikuchhube cheni keghi pano lolo akipimi kühano achekeu nongu ye philu mphi keshea? 6I no nongu vilo piani, kiukela achineki nguno akijeu lakhi hile ani. 7Eno nongu no atsa hipau, ‘Ni ye kimiyekini lunishi kethono aghakishi kumoe,’ ipikeu ye kiu keno ithike aye, nongu ye akipimi küha kemi shou küghathabe moni cheke. 8Kughengu Timi Nu ye Sabbath Mpeu ke.”

Sabbath Tsala lono Shipivi

(Mk 3:1-6; Lk 6:6-11)

9Jisü no chesü wuno sinagog lo ilo. 10Tile au kithimi lakhi aghi. Timiqo no Jisü nguku no akipimi tsünike pa vilo iniju, “Ayezah kiqilo Sabbath loye shipivilu nani kema?” 11Jisü no panoqo vilo pi, “Nongu gholo khuana no ambe lakhi akelo tino Sabbath lono aqo lo ikiqive aye, khuu no aqo lo ilo ti khape ipeghive moni keshea? 12Tishiaye timi ye ambe nguno kishita ameküapu kelae! Ikehu Sabbath lo akivi mlani keu ye Ayezah kiqilo küqü kepu kühae.” 13Tishino pa no timi vilo pi, “O u xachholo.” Timi huno xachho kelo kütami toi athoputho luve. 14Ikemu Phariseemi ye khalau ipeve no kishi pa kütsaveni keno küsüqe thuve.

Alhouw Kishekiphe Qeu

15Jisü no pimhe luve kehu tileno wuve. Ikemu kutomo no pa pape wuve, eno küsükinimi ighi kemi kümtsü pa no shipivitsü 16eno pa ghili khuu vilomu pipe monike azah tsüve. 17Hi ye tungkupu Isaiah no kiu pi keno shikupu niye ke:

18“I qeu khuu I no kishephe

keno I ngulho no jupe amloqi chekeu, I qhuu julo.

I no I ghungu pa shou lepukutsü nani,

pa no Iw kuchou xakütha pesü shiyeqo lau sheshu nani.

19Pa ye mtomshumo eno igha asütsa süqhemo nani,

milakhi mu alaghila lo pa sütsa chilumo nani;

20kuchou xakütha no tolu moke kutolo pa ye akuaye

akeu yeghü mu süchhemo nani,

momu inhemimi keu kulu namu fupinheve tsümo nani;#Isa 42:1-3; 61:1

21eno pa je lono shiyeqo no lajube nani.”

Aghungu Kimthe Piküptha

(Mk 3:20-30; Lk 11:14-23)

22Tile anhechemi eno atsa piphe kümlami khuu tüghami no ghime ache keno, timi hu Jisü lau saghi, eno Jisü no pa shipivitsü kelo pa no atsa piluve eno ithuluve. 23Timiqo no akümzave no pi, “Hi no David Nu shiaghi nani keo lae?” 24Ikemu kughou Phariseemi no ti chilu keno, panongu no pi, “Timi hipau no tüghami haphelu akeu ye tüghami yepetou Beelzebul vecheo likhino ke.” 25Jisü no panoqo kükümsü ithi akehu panoqo vilo pi, “Kükaqha lakhi dolono kijethave keu ye kütsave nani, eno aphughi na akibo namu pano dolono kijethave keu ye puthugho lumoae. 26Satan no Satan haphe aye, pa likhi pa kijetha ani. Tishiaye kishino pa kükaqha ye puthugho luni kea? 27Tsala I no Beelzebul vecheo tüghami haphe aye, nongu papemi ye khuu küka vecheo tipaqo haphe cheni kea? Tighenguno panoqo no nonguw küghaküthami shinani. 28Ikemu I no Alhou Ghungu pesü tüghami haphe aghi aye Alhou yekipe ye nongu lau ighivae. 29Momu milakhi no akumtomi ki xüleni kelo pa ye atüghüshi aki mpeu akumtou tshüpe qhive moke loye kishino püka luni kea? Pa no hi shiluke thiu no xülelu nani. 30Khunono I gholo kumo keno I külami, eno khunono I sasü hekumqo tsümo keno kütami hapupove cheni. 31Tighenguno I no nongu vilo piani, timi xine eno küthakügha qhoi pevetsü nani, ikemu Aghungu shou piküptha shikeu kipimi ye qhitsümo nani. 32Khukhumu Timi Nu külakeu tsa pikeu kipimi ye qhivetsü nani, ikemu khuu no Aghungu Kimthe külakeu tsa pini keno pa ye tiqheli hipau lo na, ighini keu tiqheli lo namu akipimi qhitsümo nani.

Axathi lono Asübo Ithi nani

(Lk 6:43-45)

33“Asübo lakhi ye pa xathi lono ithi cheni kehu akivishi asübo mlaphe no axathi kivi pithilu pelo, tikumo aye asübo alomo keu huno axathi ghi lhoksa pithi nani. 34Nongu apighitiqo! Nongu ye küsaküghami ke kishino akivi tsa piluni kea? Kughengu amlo alou kupukuno shi akeu akichi no piphe cheni. 35Timi kivimi ye küakini pekütsü püake toi pano xülo akivi pephe cheni, ikemu alhoksami ye alhoksa pekütsü püakeu lono alhoksa pephe cheni. 36I no nongu vilo piani, küghakütha tsala lo kümtsü no kutokupui mono pive keu tsa ghenguno kihikülai tsümasa nani, 37kughengu o shou akipimi kühae pikepu shina, no ye küqüvae pikepu shinamu o tsa lono kimchi nani.

Jonah Michipu

(Mk 8:11-12; Lk 11:29-32)

38Tile Ayezah shikükami ngo Phariseemi khami no Jisü vilo pi, “Shikükau, ningu ye o launo amchipu ithuluni shi ani.” 39Ikemu pa no khochile, “Alhoksa eno Alhou sümo keu tiqheli no amchipu likhi phucheni, ikemu tungkupu Jonah lau amchipu piye keu kumo aye kütau kiumu tsümo nani. 40Kughengu Jonah no pucho tsala küthü putho tsala küthü akha kije polo ngoke toi, Timi Nu ghi pucho tsala küthü putho tsala küthü ayeghi pola lo ngo nani. 41Küghakütha lo Nineveh phughimi no ithu hipa tiqhelimi akipimi tsü nani, kughengu panoqo ye Jonah shekushu vecheo xaide ke, eno julo, Jonah nguno akijeu kiuala hile ani. 42Küghakütha lo Apeu kükaliu no ithu hipa tiqhelimi akipimi tsü nani, kughengu li ye ayeghi shekhau no Solomon lokütsü tsa ininike ighi, eno julo, Solomon nguno akijeu kiuala hile anie.

Mithekumo Ghawu no Ideighi

(Lk 11:24-26)

43“Kughou mithekumo tüghaküsa no timi launo ipeveni keno, tino azü kühake-a lo itsü ngokepu-a phuwu cheni, ikemu ti phumlave. 44Ikehu pa no hitoi kümsü, ‘I no khileno ighi keno, I ki tile idewoni.’ Kughou tile ighi keno, aki huye abokümsa, akivishi khuve no kithikiyi aghi. 45Tileno pa no wuno pa nguno alhoksau aghawu tsüni sasü tile ilo ngove, ikehu timi huye atüghü lo nguno alau alhoksa shikitheve. Ikehu alhoksa tiqheli hipau ghi titoi nani.

Jisü Paza eno Athiküzümi

(Mk 3:31-35; Lk 8:19-21)

46Jisü no timiqo pütsa akelo julo, paza ngo pa thiküzümi no khalau puthugho no pa pütsani ke khea. 47Milakhi no ighi no Jisü vilo pi, “O za ngo o thiküzümi no o pütsani pi iniju ani.” 48Ikemu Jisü no timi vilo pi, “Khuu no I za eno khuu no I thiküzümi kea?” 49Pa khopemi küdau pa u chhopuwo no pi, “I za eno I thiküzümi ye hile akhanie! 50Kughengu khukhumu I pu kungugha lo akeu pulou shikeu huno I thiküzümi ngo I chelimi eno I zake.”

Currently Selected:

MATTHEW 12: SUMRVBSI

Highlight

Copy