LUKE 17

Axine lo Ghuju Sawuve

(Mt 18:6-7; Mk 9:42)

1Jisü no pa khopemi vilo pi, “Axine lo ghuju sawuve kepu tüqhüdo ighini pütsae, ikemu khuu vecheo ti süghini keno ahasapue! 2Pa vecheo hi kititiqo lakhi nomu küpxave aye pa ghengu ye athi kütsüghü tuqu pesü pa kuo lo tshüqhi pipe püzü azüghi lo vesüvepe keu pavie. 3Tsükhüi shi nongu ampi jukuto lulo! O thiküzüu no axine shi aye, pa lomipi lo, eno pa no xaide aye pa kipimi qhivetsü lo. 4Tsala pa no atsala lakhi lono o lau ghuthu tsüni kutolo axine shive no itaghi tijehi o lau ighi no, ‘I no xaideni,’ ipi aye, no ye pa kipimi qhivetsü masae.”

Ni Küpülü Pekho Tsülo

5Apostolmi no Ampeu vilo pi, “Ni küpülü pekho tsülo!” 6Ampeu no pi, “Nongu no aküpülü aghanethi qhemi likhimu aghike aye, nongu no kakuthi sübo hipau vilo, ‘Akuhu lono nhüpe azüghi lo shosüve lo,’ ipi aye tino nongu tsa lunani.

Aküzüpu kumo Qemi

7“Nongu gholo khuu no aqeu lakhi akelo pa no puchopuju alu mla momu ambe khea no aki lo ighi kelo pa vilo, ‘Mtazü ighi no aghulhu chulo,’ ipi nani kea? 8Tishinike züqhulo pa vilo, ‘I ghenguno alibe kutolo, o phimini kilive no I no chusho akelo I lojilo, eno kutou no o pelo chusho peni,’ ipi nani ke kumo? 9Azah kiu pesü aqeu tsü keno pa no shiluke ghenguno ampeu ye pa shikimthi cheni keshea? 10Titoi nonguu ghi, kughou nongu lau azah tsükeu kümtsü nongu no shikhaveni keno, ishi pikepue, ‘Ningu ye aküzüpu kumo qemi, kiu mla peniye kughutsü keno, ti likhi shi aphie.’”

Apüghami Chighi Shikimthe

11Jerusalem lo wuche kelo Jisü no Samaria ngo Galilee dolono kathasü che. 12Pa no aphu lakhi lo iloche kelo apüghami pano chighi no pa sasü kusholu niye putou puthughope aghi 13eno panongu no ighamku, “O Jisü, Ampeu, ni kimiyekütü tsülo.” 14Kughou Jisü no panongu ithulu keno ishi pi, “Wulo eno nongu ampi pesü achinemi piye lo.” Panongu no wuche kelono kümtsü mithelu khave. 15Kughou panongu dolo lakhi no pa ye mithe luvae pi ithi keno, pa no ideighi no asütsa kuloghi lono Alhou sheqhe; 16eno Jisü pukhu philo iqi pa gino ayeghi dape shikimthi tsüe, pa ye Samariami. 17Tile Jisü no pa vilo pi, “Timi chighi shikimthe ke kumo? Maye toku ye khile ani kea? 18Khalaumi hipau likhi no kumo aye khunomu ideighi no Alhou sheqheni keu kühave keo?” 19Tishino pa no timi vilo pi, “Ithu no wolo, o küpülü no o shipivi luvae.”

Kükaqha Chekeu

(Mt 24:23-28,37-41)

20Alhou yekipe ye kughou no ighi nani kelapi Phariseemi no ighiju akehu Jisü no panoqo khochile, “Alhou yekipe ye amchipu ithulu ghi ighini chemoe, 21momu, ‘Julo, hi cheni!’ momu ‘Hu cheni!’ ipimo nani, kughengu ithilo, Alhou yekipe ye nongu gholo ani.”

22Pa no akhopemi vilo pi, “Nongu no Timi Nu do-ghuloki ithuluni shikütü keu tsala cheni, ikemu ti ithulumo nani. 23Timiqo no nongu vilo pi nani, ‘Huke julo!’ momu, ‘Hike julo!’ Khalau ipe kevi momu panoqo papewu kevilo. 24Kughengu tsütsüpha no atsütsü halau no halau kutolo yepüvü ketoi Timi Nu ghi pa tsala lo titoi shi nani. 25Ikemu pa ye atüghüshi aghime jeli kutomo puqhe no hipa tiqhelimi no kileqhive penani. 26Timi Nu tsala lo ghi Noah ghuloki lo toi nani. 27Noah no ashukaki lo iloke tsala kutolo timiqo ye alovi chusho, anipu lusaghi, eno akimi gholo külawo ishi ake lono züqo ighive no kümtsü püghave. 28Tipaphi shi Lot ghuloki lo ghi, timiqo ye alovi chusho, küqhükili shi, eno shosü mlapuku ae, 29ikemu kughou Lot no Sodom lono ipeve keno, tipani kungugha lono ami ngo atu toikeu ghuqhi no kümtsü püghave. 30Ikehu Timi Nu pepheni keu tsala lo ghi titoi nani. 31Tipa tsala lo, aki kütsüqa lo akeu ye paw thime jeli aki lo aghi namu luniye iqighi kevilo, titoi alu lo akeu ye aki lo ideighi kevilo. 32Lot nipu kümsülu lo. 33Khukhumu pa ampi küxü pükhani shikeu ye pühave nani, ikemu khunono aküxü pühaveni keno ti phulu nani. 34I no nongu vilo piani, tipa ji lo mikini alüpa lakhi lo züa kelo lakhi sawuve no lakhiu ye qhive nani. 35Totimi kini no athi shesü akelo lakhi sawuve no lakhiu ye qhive nani.” 36[Mikini no alu lo huakelo lakhi sawuve no lakhiu ye qhive nani.] 37Panongu no pa vilo pi, “Ampeu, khileno kea?” Ampeu no khochile, “Khile akumo ani keno, tile alhuquqo kumqo nani.”

Currently Selected:

LUKE 17: SUMRVBSI

Highlight

Copy