LUKE 16

Amikuchokumo Hekujuu

1Jisü no itaghi pa khopemi vilo pi, “Kinimi lakhi gholo hekujuu lakhi ache, ghulo lakhi paw hekujuu no pa küakini kilhekului peitha acheni kepi atsa pa tove. 2Ampeu no pa ku püzü pi, ‘I no hi o ghili chilu akeu ye kiu kea? No ye hekujuu shilumo akehu ow lo yekütsü püakeu eno thime jeli qhoi süghive lo.’ 3Hekujuu no pa ampi pütsa ghi pi, ‘I mpeu no I kümla luve tsüniye shivano ni ye kiu shiveni kea? Ni ye mtomo keke alu hokide no mla luni chemo, eno khuchu nike kujoe. 4I kümla lono ikhive kemtsa timi pelo pano kilo I sasü penike ni ye hiu shivenia na.’ 5Ikehu pa no pa mpeu pi kupumi lakhikhi no ku puwu no atüghüu vilo pi, ‘No ye I mpeu pi khije pu ani kea?’ 6Pa no pi, ‘Olive thazü tughuko aqhe qhaue.’ Hekujuu no pi, ‘Hile iqa no mtazü o pi kaku lo lhopungu yesüve lo.’ 7Tithiu pa no lakhiu vilo ighiju, ‘Eno o pi no khije keti?’ Pa no khochile, ‘Athi kumshophi aqhe.’ Hekujuu no itaghi pa vilo pi, ‘O pi hilo eno lhotache yesüve lo.’ 8Hekujuu no hitoi amqükini shike ghenguno pa mpeu no akishe tsüe. Kughengu hipa yeghi lomiu no aküvü lo akemi nguno alau amqükini shi pano toi kemi peitha cheni. 9I no nongu vilo piani, ayeghi lo küakini pesü nongu ghenguno aküsami shikile lulo, tishianguno kughou no ti kühaveni keno, lhokta kungo-a lo alokivi shi nongu sasü nani.

10“Khuu no ighono kitila lo pükhükulupu keno, kije lou ghi pükhükulupue, titoi kitila lo amikuchokumo shikeu ye kije lou ghi amikuchokumoe. 11Tishi aye, nongu no ayeghi lo küakini peitha keu lo thotsü pükhükulupu shimlave aye, khuu no küakini kuchou pesü nongu pichetsü nani kea? 12Nongu no khikhi kütamiw keno, ti thotsü pükhükulupu shimla aye, khuu no ow thime pesü o tsüni kea? 13Aqeu khumu ampeu kini qe küqhamlae, pa ghengu ye lakhi mithive no lakhiu kimiyeveni keo, lakhi gholu no lakhiu jukünathani keno lakhi kishelu masae. Nongu ye Alhou eno küakini qe küqhamlae.”

Ayezah eno Alhou Yekipe

(Mt 11:12-13; 5:31-32; Mk 10:11-12)

14Phariseemi ye küakini mineqhiyi chekehu kughou no atsa hipaqo chilu keno, panongu no Jisü thaigha junu. 15Jisü no panongu vilo pi, “Timi zülo achipiue pi pükha chekeqo ye nongu kene, ikemu Alhou no nongu mlo ithi ani. Kughengu timi müzülo kiu no ajuaje ipi cheni keno Alhou nhethe loye aphikümqhüpue.

16“John ghuloki kutolo Ayezah eno Tungkupu kakuqo pekishe sheshu ighi; tinguno tilau ye Alhou yekipe lo atsakiviu ghili sheshu ighi kelo kümtsü no tile ilo niye anguka shi shoxüsü cheni. 17Ikemu Ayezah lo choküsü lakhimu abokümsa shivae pini keu ye atsütsü ngo ayeghiu no hauve keu no mlalei nani.

Aküghüxa eno Külakithe

18“Timi khuu no pa nipu küghüxave no kütami sasü külaveni keno pa ye salha ani, titoi totimi ixave keu sasü külave keu ye salha ani.

Kinimi ngo Lazarus

19“Kinimi lakhi acheke pa ye hughai eno phepheike phimini pepu, eno tsalakipe achuqupu kivi tule-pele chusho che. 20Kumlhomi lakhi Lazarus ipikeu, aphi kuchopu apiyi no küzüpe akiniu khagho lo püzü püache, 21pa ye akiniu ghulhu lüpa lono munomugho kiu pheqhive keno pewo pa tsü penishi che. Tinguno alau ghi atsüqo no ighi no pa piyi mineche. 22Ado hami thiu kumlhomi hu thive, eno kungumi no pa sawo Abraham phivilo qhive. Tithiu akiniu ghi thive no shiqhove, 23pa no amiyizü lo ighono kushuküqha shi ime akelo pa gi peqhepe jukelo Abraham ngo pa phivilo Lazarus putou ngo aghi keu ithulu. 24Pa no ighamku, ‘Apu Abraham, I kimiyekütü tsülo, ni ye ami no piti keu ghime puqhemla no anike Lazarus puwu no pa uloti no azü lo chosü püzü I mili dikumko tsü pelo.’ 25Ikemu Abraham no pi, ‘Anu, o küxü tivilo no ye thime kivi pesü ow shilue, titoi Lazarus ye alhoksa likhi ithulu kepi kümsü luniwa; ikemu itehi pa ye hilau alokughunopu ithulu ani, eno nou no aghime lo ani. 26Tinguno alau ningu eno nongu dolo akuthoku ighono kije ghüpe qhive ake hileno nongu lau wuni keu eno tileno ningu lau katha ikughini keu shilu moae.’ 27Akiniu huno pi, ‘Tishi aye apuo, I pu kilo Lazarus puwutsü penike I no o qhüiniju ani, 28kughengu ni ye athiküzümi pungu anike pa pelo panongu kütüghü tsü peni, tikumo aye panoqou ghi ghimeqhi ke-a hipau lo iloghilu nosae.’ 29Ikemu Abraham no pi, ‘Panongu ye Moses ngo Tungkupmi kaku ani; pano pelo tipaqo tsa chilu pelo.’ 30Pa no pi, ‘Moe, apu Abraham, khuana thive keu huno ithu pi aye, panongu ye xaide nani.’ 31Abraham no pi, ‘Panongu no Moses ngo Tungkupmi tsa ini move aye, akithi lono ithughive aghi namu panoqo züiza mla nani.’”

Currently Selected:

LUKE 16: SUMRVBSI

Highlight

Copy