LUKE 14

Sabbath lono Milakhi Shipivi

1Sabbath lakhi lo kughou Jisü no Phariseemi yepeu kilo aghulhu shiniye wu keno, panongu no pa jukuto ae. 2Timi lakhi khuu aphiau lo azü chove no inguuve keno pa zülo aghi. 3Jisü no Ayezah shikükami ngo Phariseemi vilo pi, “Sabbath lono shipivini keu ye Ayezah kiqilo kemo kea?” 4Ikemu panongu no tshümu shimono ngove. Ikehu timi hu sawo pa phivilo qhino pa no shipivive no puwuve. 5Eno panoqo vilo pa no pi, “Nongu dolo khuu no anu lakhi momu amshitsü akelo, tino Sabbath lono azükikhe alou ikiqi ilove aye, mtazü tipa mtsa sünhephe luvemo nani kea?” 6Panongu ye hipa tsa khochile mlave.

Külakupu Ghulhu Kimghikipiye

7Kughou aghulhu lo kusü püakeqo no kishi ighi no agigihupu lakhü lo iqa niye pükha keno Jisü no ithulu püzü tipaqo vilo kimghikipiye pi, 8“Külakupu ghulhu lo o kusü kelo, agigihupu lakhü lo iqa kevilo, tikumo aye o nguno alau ajuaje kimchimi khuana ghi kusü püaghi püzü, 9khuu o kusü keno ampeu huno ighi püzü o vilo, ‘O lakhü pesü timi hipau tsüvelo,’ ipi aye, no ye tile akukujopu shi akuchuniu lakhü lo iqa masave nani. 10Ikemu kughou o kusüni keno, wuno akuchuniu lakhü pükhalo, tishianguno saküsüu huno ighi kelo o vilo pi nani, ‘Aküsau, akuchuqu-a lo iku iqalo.’ Tileno o gholo iqa akemi kümtsü zülono nono agigihu ithulu nani. 11Kughengu alikhi asüqhe kemi kümtsü kuchunive nani, eno alikhi ampi kuchuni keu süqhe nani.”

Aghulhu Kije Kimghikipiye

12Pa no pa kuküsüu vilo highi pi, “Kughou nono alibe tsüni keno, o küsami na, o thiküzü cheli na, o bolomi na, o kisüghümi kinimi namu kusü kevilo, tikumo aye panongu ghi o kusü no o lochileve nosake. 13Ikemu kughou nono aghulhu tsüni keno, kumlhomi, alho vimo kemi, anhechemi kusülo, 14tishikeu lono nou no akümghau shilu nani, kughengu panongu ye o tsüchile mla nani. Kughengu amikuchomi xüchilekulu tsala lono o tsüchile nani.”

15Kughou aghulhu lüpa lo akeu milakhi no hipa tsa chilu keno, pa no Jisü vilo pi, “Khunono Alhou yekipe lo ilo chushoni keno akümghapue!” 16Ikemu Jisü no pa vilo pi, “Ghuthu lakhi lo milakhi no aghulhu kije tsüno timi kutomo kusüe. 17Aghulhu do ighi kelo, timi huno pa qeu hape kusü püakeqo lau pi wupe, ‘Itehi ye kümtsü kutope qhive ake ighive lo.’ 18Ikemu panongu kümtsü no küptsa püa keshi jekujeli shiuve. Atüghüu no pi, ‘Ni ye anileshi alu lakhi qhü püanike ti juwu masave ake I kipimi qhitsülo.’ 19Lakhiu no pi, ‘Ni ye alu kümla mishitsü atüna pungu qhü kehu tipaqo juwu cheae, kimiye no I kipimi qhitsülo.’ 20Itaghi lakhiu no pi, ‘Ni ye akibo shive no anipu auva keke ighilu moae.’ 21Ikehu aqeu no ighi no qhoi pa mpeu vilo pive. Tile ampeu no amloideve no pa qeu vilo pi, ‘Mtazü wuno aphughi lo alaghila eno alapa lo kumlhomi, aphiau kinitave kemi, anhethi eno apukhu kighichemi sasü ighilo.’ 22Aqeu huno pi, ‘Akijeu, nono kiu za tsü keno tishive tsüae pi ithilo, ikemu itaghi a-a ye aphie.’ 23Ampeu huno aqeu vilo pi, ‘Aphughi hechesü ipelo eno I ki shepichhilu kepushi atoghila, lavela, eno aghüzüla lo cheghi keqo züiza saghi lo. 24Kughengu I no nongu vilo piani, azüu timi khunoqo kusü püa keno, lakhi nomu I ghulhu miche pemo nani.’”

Akhopemi Shikulupu Me

(Mt 10:37-38)

25Aqokitikhi kije no Jisü papeche, pa no tsüghüwo panoqo vilo pi, 26“Khunono I lau ighive no pa puaza, anipu atianuli, athiküzü acheli, eno pa küxüu ghi milive moni keno, pa ye I khopemi shimlae. 27Khukhumu paw kros xapusü I papemo keu ye I khopemi shimlae. 28Kughengu nongu gholo khuu no aqoghe kuchuqu shiqheni kelo, atüghüshi iqa no ame kihiju, eno pa ye ti shiqhilu kepu kini ani kemo keno tsaqüi kughu jumo nani kea? 29Tishimo kelo pa no aboqha süve no tithiu shimlave aye, ti ithulu kemi kümtsü no pa cheqhi 30eno pi nani, ‘Timi hipau ye mla thuve kemu asheho mlavae.’ 31Momu kükami khuu no akükau lakhi sasü aghü shini kelo, atüghüshi iqa no pa no qhethonhe chighi akeu huye lakhiu u lo qhethonhe muku akeu sasü küpüghülu nani kemo keno tsaqüi küpasü jumo nani kea? 32Tishimo aye, pano ghümi no putou ajuu ghi ithumla aphi lono pa ye pa züqhukishimi hape külashive nike beküthau khu süghive peniae. 33Tihutoi nongu dolo khukhumu pa no aghi keu qhoi phevemo kelo pa ye I khopemi shimlae.

Ameküküha Miti

(Mt 5:13; Mk 9:50)

34“Amti ye aloe, ikemu tino aküqhü kühave aye, kishino qhümzai kithelu nani kea? 35Ti ye ikhipe peveni keu likhia thono ayeghi momu aghüma mu ala shitsü mlae. Khuu no chikulupu kini ani keno pa pelo chilu pelo.”

Currently Selected:

LUKE 14: SUMRVBSI

Highlight

Copy