LUKE 13

Xaideni Keo Pühaveni Kea?

1Tipa tüqhüdo lo timi khami no Jisü vilo Galileemi khunoqo Pilate no ghiqhipe panoqo ji pesü aghakishi lhoxü ji gholo kiteve tsü keno lhepiye. 2Pa no panoqo khochile, “Galileemi tipaqo no hipaphi shi imeve kehu nongu ye panoqou no Galileemi kütami kümtsü nguno alhoksau axinemi kepi kümsü anio? 3Moe, I no nongu vilo piani; ikemu nongu no xaidemo kelo nongu kümtsü titoi pühave nani. 4Momu Siloam lo pano chighitache khunoqo shou aqoghe ilaqi veqhi pithive keno: panoqou no Jerusalem lo küxümi kümtsü nguno alhoksa kümla shiche kepi nongu ye kümsü ani keshea? 5I no nongu vilo piani, kumoe; ikemu nongu no xaidemo kelo nonguu ghi kümtsü titoi pühave nani.”

Mububo Kimghikipiye

6Jisü no kimghikipiye hipau pesü pi, “Timi lakhi no pa xathili lo mububo shosü, ado hami thiu pa no asübo tipau lo axathi jusü ighi kemu lakhimu ithumlave. 7Pa no akümlau vilo pi, ‘Julepi, I no ampe küthü kutolo mububo hipau lo axathi aghini kemo keno ju ighiva kemu lakhimu ithumlavae. Tighenguno yeqhive lo! Kushiye hi no ayeghi vekha apeni kea?’ 8Akümlau no khochile, ‘Akijeu, khashi mpe ghi ishi qhivelo, I no ti homxa chhukide no aghüma süjuni. 9Tishino tokuu athi pithilu aye akivi eno alovae; ikemu tishimo aye yeqhiveni.’”

Sabbath lono Totimi Shipivi

10Sabbath lakhi lo Jisü no sinagog lono shika ae. 11Totimi lakhi ampe chighitache kutolo süqusüniyi keu ghawu no tshüpe ache keu ae. Li ye aghütsü ikove no müzüchoi puthugho mlano ache. 12Kughou Jisü no li ithulu keno, pa no li kuno pi, “Totimi, no ye süqusüniyi ache keu lono kuqho phevae.” 13Pa no li shou pa u be khavi li ye müzüchoi puthugho luve, eno li no Alhou akishe tsüe. 14Ikemu Jisü no Sabbath lono shipivie pikeu huno sinagog yepeu gha shikighidepe timiqo vilo pa no pi, “Akümla shikepu aghi keu ye atsala tsügho dolono mla cheni. Sabbath tsala lou no kumono tipaqo tsala lou no ighi no shipivi lulo.” 15Ampeu no pa khochile, “Nongu keghilishi keqo! Sabbath lo nongu kümtsü no amishi na khurha namu kuqhophe no azü piye nike sawu chenike kumo? 16Imaye Abraham laghami totimi khuu Satan no ampe chighitache tshüpe püache keno, hipau ye Sabbath lono pinamu kuqhopheve kelauke kumo keshea?” 17Jisü no hipa tsa pi kelo pa külami shikujove, eno timi kümtsü no pa no akümzapu kümla shikeu lo alovilue.

Aghanethi ngo Kholaqhi

(Mt 13:31-32; Mk 4:30-32)

18Ikehu Jisü no pi, “Alhou yekipe ye kiu toi kea? Ni ye kiu pesü ti kimhe tsüni kea? 19Ti ye aghanethi timi no pewo aghutu lo vesüve ketoie, tino thuikughi no asübo ilhouve, eno aghauqo no tipa lokaqo lo apüsü mlae.”

20Itaghi pa no pi, “Ni ye kiu pesü Alhou yekipe kimhe tsüni kea? 21Ti ye totimi lakhi no kholaqhi aghulo pewo ashomkhu ashoghi chhitoi akeu gholo xukütshüve kelo kutou ye ti kuchopu inguuve ketoi ke.”

Mghüghüi Keu Hukikha

(Mt 7:13; 21-23)

22Jisü no Jerusalem küdau wuche kelo aphu eno mishiphuqo kathasü itsü shika che. 23Milakhi no pa vilo pi, “Ampeu, khunoqo xaluve akeno tipaqo ye aghulo likhi nani keshea?” Pa no timiqo vilo pi, 24“Müamzü no mghüghüi keu hukikha lono iloni keu shilo. Kughengu I no piani, kutomo no ilo niye pükapütsa nani kemu shimla nani. 25Kughou aki mpeu no ghuthu lakhi ithu aki khaveni keno, nongu khalau puthugho akeqo no ahukikha kukhu no, ‘Ampeu, ni khaqhi sülo,’ ipi anamu, pa no nongu khochile nani, ‘Ni ye nongu no khilau no ighi ani keno mthae.’ 26Tile nongu no ishi pithu nani, ‘Ningu ye o gholo chusho che, eno nono ni laghila lono shika cheke.’ 27Ikemu pa no pi nani, ‘I no piani, ni ye nongu no khilau no ighi ani keno mthae. Nongu alhoksa kümlami, kümtsü I launo cheve lo!’ 28Nongu no Alhou yekipe lo Abraham, Isaac, Jacob eno tungkupmi kümtsü ithulu nani, ikemu nongu ampi ye khalau küqa kumlo eno ahu tsüghü bubushi ke-a lo vepheve nani. 29Timiqo no kipela kulola eno ahuu apeu no shesü ighi no Alhou yekipe lo aghulhu shinike iqa nani. 30Julo, khunono ashekhami keno atüghümi shive nani, eno atüghümi no ashekhami shive nani.”

Jerusalem Ghenguno Mlo

(Mt 23:37-39)

31Tipa tüqhüdo lo Phariseemi khami ighi no Jisü vilo pi, “Hileno wuvelo, kughengu Herod no o pithive niye ani.” 32Pa no panoqo vilo pi, “Wuno ti anengu vilo pilo, ‘Julo, ni ye ishi ngo thoghiu tüghami haphe eno timiqo shipivi ani cheni, eno aküthüni ye I kümla ashehove nani. 33Tishimu, ni ye ishi, thoghiu eno aghiniu I la lo cheche masae, kughengu tungkupu lakhi ye Jerusalem nguno khalau no pithiveni keu ye shimlae.’ 34Jerusalem, O Jerusalem, tungkupmi pithive tsü chekeu eno khunoqo tile puwuni keno atu pesü veqhive tsü chekeu phughi! Ni ye khijeta awuqu no achishibo qholo ati vakütsü keshi o nuliqo hekütsüni shiche kela, ikeghi nono pulomoe! 35Julo, nongu ki ye küghüvae. Eno I no nongu vilo piani, nongu no, ‘Ampeu no khuu Pa je lono cheni keno kümgha tsülo!’ ipi moke kutolo nongu ye ni ithulu moae.”

Currently Selected:

LUKE 13: SUMRVBSI

Highlight

Copy