JONAH 1
1
Jonah no Ampeu Zülono Pove
1Amittai nu Jonah lau Ampeu tsa ishi ighi, 2“Ithulo, mishighüna kije Nineveh lo wulo, eno tipau lakichile tsa pilo, kughengu pano küsakügha no iku I tovae.” 3Ikemu Jonah no Ampeu zülono Tarshish küdau poveni ke wuve. Pa no Joppa lo iqi no Tarshish lo wu cheghi keu zükilu ithulu. Ikehu pa no ame tsüve no Ampeu zülono pove ghi tilau panoqo gholono Tarshish lo wuveni keu shie.
4Ikemu Ampeu no azüghi lo amülhü kije puwu eno pasapagha no ihulo azüghi lo ighive, ikehu zükilu ye ipo niye shive. 5Tile zükilu sakichemi ye msave eno pütüta müzülo alhou lau ighamku. Zükilu kümthüni ke panoqo no anhemgha azüghi lo vesüve. Ikemu Jonah ye iqi zükilu chebo alou lo züchei ae. 6Ikehu zükilu kepten no ighi no pa vilo pi, “No ye kushiye zü ani kea? Ithulo, o lhou kulo! Ishiake alhou no ningu kümsülu no ningu püha tsümo luvike.”
Azüghi lo Jonah Vesüve
7Panoqo dolo lakhi no lakhi vilo pi, “Ighilo, ningu asaqhini, tishino khuu ghenguno küsakügha hipau ningu shou ikughi ani keno ithivenie.” Ikehu panongu no asaqhi kelo Jonah shou qhibelu. 8Tileno panoqo no pa vilo pi, “Khuu ghenguno küsakügha hipau ningu shou ikughi ani kela ni vilo piju? No ye kiu shiche kemi kea? Eno khilau no ighi kea? No ye khuno ghakhumi kea? Eno khuno timi kea?” 9Pa no pi, “Ni ye Hebrewmi lakhi, eno Ampeu, Khuu azüghi eno qhaike yeghi lhophe keno, kungugha Lhou hu sümsa chekemi.” 10Pa no Ampeu zülono poche keu pesü panoqo vilo pi kelo panongu ye shishe msave no pa vilo pi, “No ye hi ye kiu shive akea!”
11Tishino panongu no pa vilo pi, “Azüghi pelo iqüve penike ningu ye o lau kiu shikepu kea?” Kughengu azüghi no mqhumza kithe auveke. 12Pa no pi, “I küghape azüghi lo vesüvelo; tishiaye azü ye iqüve nani, kughengu I no ithi anike I ghenguno pasapagha kije hipau nongu shou ighi ani.” 13Tishimu, timiqo no akashi amkü lo saipe niye pükapütsa kemu shimlave, kughengu pasapagha no azüghi lo alaushi auve. 14Ikehu panongu no Ampeu lau ighamku pi, “O Ampeu, timi hipau ghenguno ni pühave tsü kevilo, eno pa ji ningu shou betsü kevilo, kughengu O Ampeu, Nono kümsü pulo aketoi shiluve ake.” 15Ikehu panongu no Jonah küghape azüghi lo vesüve, eno mqhumza akeu züghi no iqüve. 16Tileno timiqo ye shishe Ampeu msave, eno panongu no aghakishi kümllagho pesü Ampeu mlla eno ashoqhi shie.
Akha Kije no Jonah Munove
17 Ampeu no Jonah munove peniye akha kije lakhi puwu. Jonah ye pucho tsala küthü eno putho tsala küthü akha polo ngove.
Currently Selected:
JONAH 1: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
