JOEL 2

Ampeu Tsala

1Zion lo afuko küighalo;

I kimthe toghi lo kütüghülo!

Aghakhu lo küami kümtsü no khokhoshi pelo,

kughengu Ampeu tsala chenie, ti ye kupunuvae,

2aküzü eno züchiyi keu tsala,

akimhi eno aküzü kutho tsala!

Akumtomi kütsasa no aküzü kutho

toi naghutoqo nhakhape ani,

titoi keu ye khilemu shiju mphi,

itaghi panoqo thiumu tiqheli

kupuju lo khilemu ithulumo nani.

3Ami no panoqo züuno piti eno

ami mili no pano thiuno iqü.

Panoqo zülo ayeghi ye Eden ghutu toi ikemu pano thiu ye

küghüküghaleike sayeqha toi

kiunomu tipaqo zülo povemlae.

4Panoqo ye khurshi koghe mihi,

eno aghüshi khurshiqo toi poke.

5Khurkuluqo no kokoshi ketoi

panoqo no naghuto shou ikawu,

ami mili no pepeshi

atsüni pitive ketoie,

akumtomi ghüshimi no aghüshiqa

lo ilo niye kutope aketoi ke.

6Panoqo zülo timiqo ye iju ani;

kümtsü no agi phalaive anie.

7Panongu no aghütomi toi leighi;

ghüshimi toi aliwo mili ikue.

Panongu ye pütüta lalo chewu;

eno hula-hila kugho wuve moe.

8Panongu ye kichishi kilemoe;

kümtsü no müzüchoi chewue;

panoqo no azüta-angu puxüsü wu

kelo khunomu hakha mlae.

9Panongu no aphughi shou

ilheiku, aliwo kuptu shouno po,

eno akiqo shou mugho ikughi no

küpkami toi alashe lono iloghi.

10Panoqo zülo ayeghi no ithae;

atsütsü no khokhoshie.

Khetsünhe ngo aqhi no zümoive,

eno ayepuqo no aküvü tsümove.

11 Ampeu no Paw ghüshimi

zülono asheshu, kughengu Paw

ghüshimi ghazü ye shishe kijeke;

Khuu no Pa tsa pecheni keno Pa ye aküka kumtou ke.

Kughengu Ampeu tsala ye kije eno shishe aküighüpu;

khuu no ti puqhelu nani kea?

Ampeu lau Xaide Ighilo

12 Ampeu no pi, “Itehi nomu

nongu mlo tsüqhiyi shino

kümvü keu, aküqa eno akumlo lono I lau xaide ighilo;

13eno nongu phimini kumono nongu mlo süxülo.”

Ampeu nongu Lhou lau xaidelo,

kughengu Pa ye küpükini eno kimiyekiniu, asheshi no

amloide cheni, iqemokeu kikimiye no kupukuno eno

amhekiqi süchileve chekeu ke.

14Khuu no ithi ani kea Pa mlo kilive no kükümgha süghi

tsüluvi, eno Ampeu nongu

Lhou mllalu pe kepushi athi ngo

atsaizü kümllagho tsüluvi ke.

15Zion lo afuko küighalo;

Kümvü kepu do kophelo;

akimchi hoho kusülo;

16timiqo hekütsü lo.

Aqoahomi kishekimthe tsülo;

layemi kukumqo lo;

itimi eno akichhelo kupu nga

kutolo hekütsü lo.

Külapuu no pa chebo qhivelo,

külaliu no li kungo-a qhivelo.

17Ahukikha ngo akiptia dolono

achinemi, Ampeu qemi no qa

ghi pilo, “O Ampeu, Ow timi kipimi qhitsü lo,

eno O mheghi pesü shiyeqo

zülo atichepu shivepe kevilo.

Kushiye ashiaye zülono pano pelo ishi pi apeni kea,

‘Pano Lhou ye khile ani kea?’”

Ampeu no Amloighi

18Tileno Ampeu no Pa yeghi ghenguno amlo piti

eno Paw timiqo shou amloighive.

19 Ampeu no Paw timiqo khochile no pi,

“Julo, I no nongu lau athi, atsaizü,

eno thazü puwu tsü ani,

nongu no aghakiqi shilu nani;

eno Ni ye nongu pesü shiyeqo

zülo atichepu shive pemoae.

20“I no ahuumi hape nongu launo putou qhai eno yenguyi

keu yeghi lo puwuve nani,

paw amihemi pesü kipela züghi lo

eno ashekhami no kulola züghi lo vesüve nani;

Pa kumo no tsümüna ipeghive nani,

kughengu pa no alhoksa kümla kije shive kehue.

21“Msa kevilo, O ayeghi;

amlokiqi shino alovi lo,

kughengu Ampeu no thime kije shive tsüae!

22Msa kevilo, nongu aluza lo tüghashiqo, kughengu

yenguyike-a lo achu kümza-a ye xüthilei ani;

asübo no pa xathi pithi ani;

mububo ngo atsaibo no kupukuno shi pithi ani.

23“Alovilo, O Zion nuliqo,

eno Ampeu no Lhou lau alovilo,

kughengu Pa no nongu saphu ghi tsütsüghu aitheu tsüvae;

Püzüu toi aitheu eno amunuu

tsütsüghu Pa no pofushi leqhitsü.

24“Aniqa lo athi no chhive nani;

atughukoqo lo atsaiji ngo thazü no yeli-qole nani.

25Tülhaqu no chuve tsüke mpe lo

sala I no athoputho tsü nani,

Iw ghüshimi tütüghü, ningami,

amthsü, I no nongu lau puwuke.

26“Nongu no kupukuno shi chuno aghapiqilu nani,

eno Ampeu nongu Lhou khuu no akümzapu shi nongu

lau mla keno, Pa je sheqhe nani.

Eno Iw timi ye khilemu shikukujo kitheve monani.

27Ni ye Israelmi gholo anie pi nongu no ithi nani, Ni ye

Ampeu nongu Lhou eno I nguno kütami ye kühae.

Iw timi ye khilemu shikukujo kitheve monani.

Ampeu no Pa Ghungu Puwu nani

28“Ado hami thiu I no timi kümtsü

shou I Ghungu lepuku tsü nani;

no tianuli kiptimi totimiqo no tungkupu tsa pi nani,

now muchomiqo no asamo

pumo eno lhothemiqo no kungunhetsü ithulu nani.

29Tipau ghuloki lo I no aqemi kiptimi ngo totimi shou

ghi I Ghungu lepukutsü nani.

30“Eno atsütsü ngo ayeghi shou I no akümzapu, aji ngo ami eno amchhi kupho piye nani. 31Ampeu tsala kije eno akümzapu ighi mphilo khetsünhe no zümoive nani eno aqhi no aji toive nani. 32Eno ado hu ighi kelo khukhumu Ampeu je kulu keu ye xaluve nani. Kughengu Ampeu no pike toi khami ye Zion Toghi lo eno Jerusalem lo pove nani, eno tipaqo gholo Ampeu no kuluve keqo anani.

Currently Selected:

JOEL 2: SUMRVBSI

Highlight

Copy