JOEL 3
3
Shiyeqo shou Küghathabe
1“Kughengu julo, tipa ghuloki eno atüqhüdo lo kughou I no Judah ngo Jerusalem küakini tsüchileni keno, 2shiye kümtsü I no hekütsü sasü Jehoshaphat Khila lo ighi nani. Eno tilauno I no Iw timi eno I mheghi Israelmi züqhushi panoqo shou küghathabe nani, kughengu panongu no I timi pesü shiyeqo dolo hakiphive tsüno I yeghi kijetha luve, 3Iw timi ghenguno asaqhi, apu-itimi pelo kütüqha peniye jesüve, eno aji ghenguno anga jechuve no shomzü ke.
4“I zülo nongu ye kiu kea, O Tyre ngo Sidon, eno Philistia tokukujo lo akeqo? Nongu ye kiuala ghenguno I lochile ani keo? Tsala nongu no I lochile aghi aye, I no mtazü eno papashi nongu lochileve nani. 5Kughengu nongu no Iw ghükayi ngo ameshoyi luve, eno I küakiniqo xapu nongu chineki lo süveke. 6Nongu no Judah ngo Jerusalemmi pesü pano lughi lono putou puwuveni ye Greekmi lau jesüve. 7Julo, nongu no jepuwuve keu-a lono I no panoqo xukuthoni eno I no nongu lochileni. 8I no Judah timiqo u lo no tianuliqo jesüve nani, eno panongu no putou akemi shiye Sabeami lau jepuwuve nani, kughengu Ampeu no piqhivae.”
9Shiyeqo lau hi sheshu lo:
Aghüshi ghenguno kuto lo;
aghükivimiqo xukutho lo.
Ghüshimi pelo kupunu ighi pelo;
panoqo pelo ighi pelo.
10Nongu kuphu hephape azütakikihi mlalo,
eno akuhoyi pesü angupa mlalo;
miqemlei kemi no ishi pi pelo, “Ni ye ghüshimie.”
11Hokümxa lo shiye akeqo
kümtsü, mtazü ighilo,
nongu ampi no tile hekütsü lo.
Ow ghüshimi süghilo, O Ampeu.
12Shiyeqo pelo panongu dolono xukutho pelo eno
Jehoshaphat Khila lo ighi pelo;
kughengu tileno I no hokümxa lo shiye akeqo kümtsü
shou küghathabeni ke iqa nani.
13Ayevü pesü ghothu lo,
kughengu aghi ye nivae.
Wuno qole lo, kughengu atsaithi
kütsüghübo ye chhitoivae.
Atughuko no qole ani, kughengu
panow küsakügha ye kije ke.
14Aqokitikhi, aqokitikhi no
küghakütha khila lo anie!
Kughengu küghakütha khila lo
Ampeu tsala ye kupunuvae.
15Khetsünhe ngo aqhi no zümoi,
eno ayepuqo no aküvü tsümovae.
16 Ampeu no Zion lono igha,
eno Jerusalem lono sheshu ani;
eno atsütsü ngo ayeghi no ithae.
Ikemu Ampeu ye Paw timi ghenguno sükusho-a,
Israelmi qoghe kumto ke.
Judah Juküvüpu chekeu
17“Tileno nongu no Ni ye Ampeu no Lhou, I kimthe
toghi Zion lo achekeu pi ithi nani.
Jerusalem ye akimthe shinani,
eno inaghami ye khilemu itaghi tipau le kithemo nani.
18“Eno tipa ghuloki lo naghutoqo
no atsaiji kungo kighijiqhi nani,
atoghi lono akichhizü qo nani,
Judah lo aghoki kümtsü lono azü
qowu nani; azüpuki lakhi
Ampeu ki lono qoipeghi no
Shittim Khila vapütsü nani.
19“Judah timiqo lau alhoksa shike
ghenguno Egypt ye pighive nani,
Edom ye yenguyike-a shive nani,
kughengu panongu no Judah lo pimimo kemi ji pele ke.
20Ikemu Judah ngo Jerusalem ye
alholo tiqheli kümtsü lo küghüna acheuve nani.
21Aji peleve keu mkhü Ni ye
lumphi ke I no amkhü lunani,
kughengu Ampeu ye Zion lo anie.”
Currently Selected:
JOEL 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
