JOHN 3

No ye Punu Kithe masae

1Phariseemi gholo Nicodemus ipikeu ache, pa ye Jewmi yepemi lakhi. 2Pa no putho lono Jisü lau ighi no pi, “Rabbi, nino ithi anike no ye Alhou launo ighikeu shikükami, kughengu Alhou aghimo keloye khunomu nono amchipu kümla shi akeqo shimlae.” 3Jisü no pa khochile, “Kuchou no I no o vilo piani, timi lakhi no punu kithemo keloye Alhou yekipe ithumlae.” 4Nicodemus no pi, “Kishino kichimi shive no punu kithe luni kea? Pa ye paza polo akiniu ilo no punu kithe luni keshea?” 5Jisü no khochile, “Kuchou no I no o vilo piani, milakhi no azü eno Aghungu lono punu kithemo keloye Alhou yekipe lo ilomlae. 6Ashi lono kiu punu keno ti ye ashi, eno Aghungu lono kiu punu keno tino aghungue. 7I no o vilo ‘Nongu ye punu kithe masae’ pi kelo mzaqhiyi kevilo. 8Amülhü no khila mülhü wunishi keno tila wucheni eno nono tipau sütsa chilu cheni, ikemu ti ye khilano ighi momu khila wucheni keno no ye mthae. Aghungu lono punuve kemi ye titoike.”

9Nicodemus no pi, “Hi ye kishino shilu nani kea?” 10Jisü no khochile, “No ye Israelmi shikükau keghi hipaqo vethalumo keshea? 11Kuchou no I no o vilo piani, nino keu ithi keno picheni, eno kiu ithulu keno thopi shicheni, ikemu nongu no ni shepe ikhilumoe. 12I no ayeghi lo vehu pike thotsü nongu no pülümo aye, kungugha vehu pi kelo nongu ye kishino pülüni kea? 13Kungugha lono milakhi iqighi keu, Timi Nu thono khunomu kungugha lo ikuju mphie. 14Moses no asayeqha lo alazayi pighi ikhiqhe keshi Timi Nu ghi ikhiqhe masae, 15tishianguno khunono Pa pülü keno lhokta küxü ithulu nani.

Alhou no Ayeghiqha Kimiye

16“Kughengu Alhou no ayeghi lomi kimiye kütüke ghenguno Paw thili Nu pesü tsüve, tighenguno khunono Pa pülü keno pühave monani, ikemu lhokta küxü ithulu nani. 17Kughengu Alhou ye ayeghi lomi shou küghathabeni ye Pa Nu puwuke kumoe, ikemu Pa vecheo ayeghi lomi xalu niye ke. 18Khukhumu Pa pülü keu ye küghathabe movae; ikemu Pa pülümo kemi ye küghatha bevae, kughengu Pa no Alhou Nu lakhi likhi akeu pülübe moke. 19Küghakütha ye hike: ayeghiqha lo aküvü ighivae, ikemu timiqo no aküvü kimiye ke kumono aküzüu kimiyeve, kughengu pano kümla no küsakügha ke. 20Alhoksa kümla shi chekemi kümtsü no aküvü mithi cheni eno pano kümla ithuluve nosa kehu aküvü lo ipeghi chemoe. 21Ikemu khukhumu kuchou shi chekemi no aküvü lo ighi cheni, tishianguno pa kümla ye Alhou pulou lono mla püanie pi mtsümishei ithulu cheni.

Jisü ngo Baptiz kishiu John

22Hipa thiu Jisü ngo pa khopemi ye Judea ghakhu lo wuve, eno pa ye tilau panongu sasü ngove no baptiz shiae. 23John ghi Salim phivilo Aenon lono baptiz shiae, kughengu tilauno azü boghi shia eno timiqo no ighi no baptiz shilu ae 24(hi ye John pesü akughu shimphi lono ke).

25Ikelo John khopemi khami ngo Jewmi lakhi dolo qhukimthe keu chineye vehu ghenguno kütsala ipeghive. 26Panongu no John lau wuno pi, “Rabbi, Jordan kukuu milakhi o gholo akeu, khuu vehu nono thopi shi keno—julo, pa ye baptiz shitsü ani eno kümtsü no pa lau wuve ani.” 27John no khochile, “Kungugha lono tsümo kelo milakhi ye thime lakhimu ithumla nani. 28I no, ‘Ni ye Khristo kumoe, ikemu pa züuno I puwue’ ipikeu nongu ampi no thopi shipüani. 29Khuu no külaliu sa ani keno, pa no külapuu ke; külapuu küsau khuu puthugho no atsa ini cheni keno, pa no külapuu sütsa chilu no shishe alovi cheni. Tihutoi itehi I lokivi hipau ye kupu luvae. 30Pa no chuqumghai ikuve masa eno I no chuni iqive masae.”

31Kunguu no ighikeu no kümtsü nguno akiqheu. Ayeghi lomi no ayeghi laumi eno ayeghi lo gholau no picheni. Kungugha lono ighikeu no kümtsü nguno akiqheu. 32Pa no kiu ithulu eno chilu keno tipau thopi shi, ikemu khunomu pa shepe ikhilu tsümoe. 33Khunono pa tsape ikhilu keno Alhou ye kuchou kepi mtsüqhei ithivae. 34Alhou no khuu puwu keno pa no Alhou tsa pesü pike, kughengu Alhou no Pa Ghungu kupukuno shi pa tsüe. 35Apu no Anu kimiye eno thokha kümtsü pesü pa u lo süvetsü. 36Khunono Anu pülüni keno lhokta küxü ani; khunono Anu gholu moni keno aküxü ithumla nani, ikemu pa shou Alhou loghu anani.

Currently Selected:

JOHN 3: SUMRVBSI

Highlight

Copy