JOHN 2

Cana lo Külakupu

1Atsala aküthüni Galilee cheaxü Cana lo külakupu lakhi shia, eno Jisü paza ghi tile ae, 2Jisü ngo pa khopemi ghi külakupu lo kusüpüa. 3Kughou atsaizü peitha zülave keno Jisü paza no pa vilo pi, “Panongu ye atsaizü kühavae.” 4Jisü no li vilo pi, “Totimio, Ni ye kiu shitsü lopi kea? I do tomphie.” 5Paza no lokijimi vilo pi, “Pa no nongu vilo kiu kiumu pikeu shilo.”

6Jewmi qhukimthe keu chineye ghenguno azü tughuko tsügho tile ghopüae, atughuko lakhikhi lo azü liter 100 qhau iloche. 7Jisü no lokijimi vilo pi, “Atughukoqo lo azü lesülo.” Panongu no chhitoi lesüve. 8Pa no panoqo vilo pi, “Itehi ye kitila shophepe aghulhu mpeu lau wulo.” Ikehu panongu no pesü wue. 9Kughou azü no atsaizü ilhouve keu aghulhu mpeu no micheju keno, (lokijimi azü shophe akemi ye ithi akemu) pa ye ti ye khilano ighi keno mthae, ikehu pa no külapuu kuno 10pa vilo pi, “Kümtsü no atsaizü akiviu paghi peitha cheni eno timiqo no khengüi shove kethiu no inapügha keu peitha cheni. Ikemu no ye itehi kutolo akiviu püaphie.” 11Jisü no amchipu kümla shikeqo gholo hi Galilee cheaxü Cana lo shikeu no atüghüu, eno hileno pa juküvü pephe piye; eno pa khopemi no pa pülüve.

12Hipa thiu Jisü no paza ngo pa thiküzümi eno pa khopemi sasü Capernaum lo iqive, eno atsala hami tilau ngove.

Jisü no Achineki lo Wu

(Mt 21:12,13; Mk 11:15-17; Lk 19:45-46)

13Jewmiw Hechekulu ghulhu kupunuve kelo Jisü ye Jerusalem lo iqho. 14Achineki lo pa no amshitsü, ambe eno amiqhi kijemi ngo pisa kilitsü akemi ithulu. 15Pa no akighi pesü küzaqhi kepu mla püzü ambe ngo amshitsü gholono panongu kümtsü achineki lono hapheve. Eno pisa kilitsü akeqow pisa muno küzaleve tsüno akibepuqo tukulove tsü. 16Pa no amiqhi je akeqo vilo pi, “Hi kümtsü pewuve lo, I Pu ki pesü kilhikishi ki kughulho kevilo.” 17Pa khopemi no ishi yepüa keu kümsülu: “O ki ghenguno alokümsü shikeu no I pitipüza nani.”#Lesh 69:9

18Ikehu Jewmi no pa vilo pi, “Nono hipaqo shikeu lono amchipu kiu ningu piyelu ani kea?” 19Jisü no khochile: “Achineki hipau kütsave lo, eno I no ghulo küthü lono shiqheve tsüni.” 20Tileno Jewmi no pi, “Achineki hipau shikeu ampe lhobidi tsügho luveke no ye ghulo küthü lono shiqhelu nani keshea?” 21Ikemu Jisü ye pa phimpi chineki piae. 22Tighenguno kughou akithi lono pa xüputhu keno, pa khopemi no pa ye hipau pi akepi kümsüchile luno Kuchoyesü eno Jisü no pikeu tsa pülüve.

Timi lolo akeu Jisü no Ithi ani

23Hechekulu Ghulhu lo Jisü no Jerusalem lo akelo, kutomo no pa no amchipu kümla kiu shi akeno ithulupe pa lau pülübe. 24Ikemu Jisü ye timi kümtsü ithi akehu panongu shou pa küpkhü qhimoe. 25Pa ye timi ghili ithi nike thopi khumu avehupu shimoe, kughengu pa ampi no timi lolo kiu akeno ithi ae.

Currently Selected:

JOHN 2: SUMRVBSI

Highlight

Copy