JOHN 10

Ni ye Ambekheu Kiviu

1“Kuchou no I no nongu vilo piani, khuu no ahukikha lono ambeki lo ilo mono ala kütauno zümili iloni keno, pa ye küpkami eno süxakulumi. 2Ikemu khuu no ahukikha lono iloni keno pa no ambe kheu ke. 3Khagho kheu no pa khaqhisü cheni. Ambeqo no pa sütsa chilu cheni eno pa no pa mbeqo aje pi ghi kucheni eno khalau sawu cheni. 4Kughou pa no pa ambe kümtsü khalau saipeghini keno, pa no azüu wuno ambeqo no pa pape cheni, kughengu panoqo no pa sütsa ithi ani. 5Panongu ye tüsümi papewu chemo, ikemu pa launo pove nani, kughengu panoqo ye pa sütsa mthake.” 6Jisü no kimghikipiye hipau panoqo vilo pi kemu pa no kiu pi akeno panongu ye vethamlae.

7Ikehu Jisü no itaghi panoqo vilo pi, “Kuchou no I no nongu vilo piani, ni ye ambeqo hukikha ke. 8I züu ighi kemi kümtsü küpkami eno süxakulumi, ikemu ambeqo no panoqo sütsa initsü moe. 9Ni ye ahukikha ke. Khunono I vechesü iloni keno pa ye xaluve nani eno ipe-ilo luno atsüni kümtsha-a phulu nani. 10Küpkami ye püka, heqhi eno kütsani ke ghengu likhino ighi cheni. I no ighi keu ye panongu pelo aküxü apeniye eno ti kupukuno shi apeniye ke. 11Ni ye akheu kiviue. Akheu kiviu ye ambeqo ghenguno pa küxü pephe tsüve cheni. 12Aqekiqemi ye akheu kumo eno ambe kipighiu kumo kehu, kughou tüngtügha cheghi keu ithuluni keno pa ye ambeqo qhive no pove cheni, eno tüngtügha no ambeqo tsüqü luve no hapiyepighive cheni. 13Pa ye pove cheni kughengu pa ye aqekiqemi eno ambeqo ghenguno alomsü chemoe. 14Ni ye akheu kiviue. I no I mbeqo ithi ani, eno I mbeqo no ni ithi ani, 15Apu no ni ithi eno I no Apu ithi aketoi ke; I no ambeqo ghenguno I küxü pephe tsüve cheni. 16Hipa loji lo kühakeu ni ye ambe kütau aphi. Ni ye tipaqo ghi saghi masae, panongu no I sütsa ini nani. Tileno aloji lakhi, akheu lakhi shive nani. 17I no I küxü pephe tsüveke ghenguno Apu no I kimiye cheni, tishianguno I no itaghi ikhichile luve niye ke. 18Khunomu I launo ti ikhilu mlae, ikemu I no I pulou lono pephe tsüve. Ni ye pephe tsüve kepu kükagha ani, eno itaghi ikhichilelu kepu kükagha ani. Azah hipau ye I pu launo ithulue.”

19Atsa hipaqo ghenguno Jewmi dolo itaghi kijetha ipeghive. 20Panoqo gholo kutomo no, “Pa ye tüghami ani, eno izüuvae; kushiye pa tsa inini kea?” ipi ae. 21Ikemu kütamiqo no pi, “Atsa hipaqo ye tüghami no sa akemi launo kumo nani. Tüghami ye anhechemi nhethi xükholu nani keshea?”

Ni eno Apu ye Lakhi

22Tipa ghuloki lo Jerusalem lo Ikhiphekütsü Ghulhu shiae. Ti ye süsütusho shiae, 23eno Jisü ye achineki lo alachesü Solomon kisheqho lo che. 24Jewmi no pa süho luve no pa vilo pi, “No ye ningu pelo khitohi o khelho apeni kea? Nono Khristo ipi aye, ni vilo vejoi pivelo.” 25Jisü no khochile, “Ni ye nongu vilo pive akemu nongu no pülümoe. I no I Pu je lono akümla shikeqo no I ghenguno thopi shi ani, 26ikemu nongu no pülümoe, kughengu nongu ye I loji gholo kumoe. 27I mbeqo no I sütsa chilu cheni, I no panoqo ithi eno panongu no I pape cheni. 28I no lhokta küxü panongu tsüe, panongu ye khilemu pühave monani, eno khunomu I u lono panoqo süxaluve mlae. 29I Pu khuu no panoqo pesü I tsü keno, Pa no kümtsü nguno akijeu eno khunomu I Pu u lono panoqo süxaluve mlae. 30Ni eno Apu ye lakhie.”

31Jewmi no itaghi atu ikhipe pa veqhi niye shie. 32Jisü no panoqo khochile, “I no nongu zülo akümla kivi kutomo Apu launo ighikeu piyevae; tipaqo dolo khikhiu ghenguno nongu ye atu pesü I veqhi niye ani kea?” 33Jewmi no khochile, “Akümla kivi ghenguno ningu ye atu pesü o veqhi niye anike kumoe, ikemu Lhoupiküptha ghengunoe, no ye timi keghi no ampi pesü Alhou kepi anie.” 34Jisü no khochile, “No Yezah lo, ‘I no pi, nongu ye alhouqo ke’ ipi yepüani ke kumo?#Lesh 82:6 35Khunoqo lau Alhou tsa ighi keno tipaqo pesü alhouqo kepi ku püaghi aye—eno Kuchoyesü ye pevemla ke— 36I no, ‘Ni ye Alhou Nu’ ipike ghenguno nongu ye khuu Apu no kishekimthe no ayeghiqha lo puwu keno, pa vilo ‘No ye Alhou thaigha ani,’ ipilu nani keshea? 37I no I Pu kümla shi aghimo aye I pülü kevilo; 38ikemu I no tipaqo shiaghi aye, nongu no I pülümo namu I kümla pülülo, tishianguno Apu no I lolo ani eno I no Apu lau ani kepi nongu no ithi eno vethalu nani.” 39Itaghi panongu no pa kügha niye shi kemu pa no panoqo launo pojo luve.

40Jisü ye itaghi Jordan kukuu khile John no azüu baptiz shiche keno tilau iku ngove. 41Timi kutomo no pa lau ighi. Panongu no pi, “John ye amchipu kümla kiumu shimoe, ikemu pa no timi hipau ghili pikeu kümtsü kuchoue.” 42Eno tilau timi kutomo no pa pülü luve.

Currently Selected:

JOHN 10: SUMRVBSI

Highlight

Copy