HOSEA 8
8
Israel ye Miyitsü Ghilehu nani
1Afuko pesü o mütsü lo thelo!
Alhuqu toike lakhi no Ampeu ki shou ikughi ani,
kughengu panongu no Iw puloshoqhi hexavae
eno I yezah hebideve ake.
2Panongu no I lau ighamku ighi,
“I Lhou, ningu—Israelmi—ye No ithi anie.”
3Israel ye akivi milivae;
aghümi no pa hasü ighi nani.
4Panongu no kükami kishe kemu I vecheo shimoe.
Panongu no sakiphemi süsü kemu Ni ye ithimoe.
Panongu no pano ampi kütsani ye panow ghükayi ngo
ameshoyi pesü ajulhoqo mlae.
5I no o mishitsü julho peve tsüae, O Samaria.
Tipaqo shou I mloide puku ke.
Panongu ye pimi moveni keu ado khitohi lunani kea?
6Kughengu hi ye Israel launo ke;
ayi kiyiqimi lakhi no mla keue;
hi ye Alhou kumoe.
Samaria mishitsü julho ye
kubo kighinyive#8:6 Momu ami lono phopitive nani nani.
7Panongu no amülhü yisü,
ikemu miyitsü xolu nani.
Aghibo puthughope akeqo ye aghipe movae;
tipaqo ye athi pithimo nani;
tsala tipaqo no pithi namu
inaghami no chuvetsü nani.
8Israel ye küghape munovae;
panongu ye shiyeqo gholo
ameküküha li kughupo toivae.
9Kughengu panongu ye aghalo khurha toi lomoshi
itsüsü Assyria lo wuvae;
Ephraim ye alojipumi piqevae.
10Panongu no shiyeqo gholo alojimi piqe aghi namu,
I no kighithe panongu hekütsü kumqo nani.
Eno akükau ngo kükapumiqo ye kighitheno asüqha
ghenguno aghimeshi ihi nani.
11Ephraim no axine kümllagho ghenguno akiptia küghüsü
mla kehu tipaqo ye pa ghenguno axine khache-a shivae.
12I no pa sala I yezah qhethonhe chighi ye anamu
tipaqo ye thime kithe toi shino kihitsü monani.
13Aghashipe I mlla kelo panoqo
no ashi pesü tsüno ti chucheni,
ikemu Ampeu ye tipaqo ikhilutsü chemoe.
Itehi ye Pa no panoqo xine kümsüchilelu no
tipau ghenguno ghime nani;
panoqo ye Egypt lo idewove nani.
14Kughengu Israel ye pa Lhokeu
kümsümave no akighikiqo shi,
eno Judah no aliwo kuptu phughiqo küghüsü shiqhevae;
tighenguno I no pa phughiqo shou ami puwu tsüni,
eno tino liw sükusho-aqo pitileve tsü nani.
Currently Selected:
HOSEA 8: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
