HOSEA 4
4
Ampeu no Israel Nguku
1 Ampeu tsa inilo, O Israel tianuliqo,
Ampeu ye aghakhu lo küami shou nguku kepu ani.
Aghakhu lo Alhou ithitoi keu,
pükhükulu momu iqemokeu kikimiye kühae;
2tushokiqhi, akimki, ghikiqhi, aküpka, eno asalha likhi ani;
panoqo no akütsüghaqo kuqhove no ajikuqo no kibe ke.
3Tighenguno ayeghi no mloqa,
tile küxümi kümtsü no iju ani,
aghasa lo tüghashi ngo atsütsü lo
aghauqo eno azüghi lo
akhaqou ghi haukhavae.
4Tishimu khunomu kütsala
eno ngukukile pe kevilo,
kughengu I kumchho ye o laue, O achineu.
5Nongu ye puchou no küpxalu nani, tungkupmi ghi nongu
sasü putho lono küpxalu nani;
eno I no nongu paza kütsave nani.
6Iw timiqo ye akighithi mikheke ghenguno kütsavae;
kughengu nongu no akighithi milive ke,
I chinemi shipe monike I no nongu milivae.
Eno nongu no nongu Lhou yezah kümsümave akeke
Ni ghi nongu tianuliqo kümsümave nani.
7Panongu no khije ikowo keno,
tijehi I shou axine alau shike;
I no pano gigihu pesü akukujo shive tsü nani.
8Panoqo no Iw timi xine#4:8 Momu axine kümllagho küsaje;
pano xine ghenguno alamine.
9Ikehu timi ghi achineu ghi atho;
panow hekibide ghenguno I no panongu ghime nani
eno pano kümla ghenguno I no panongu tsüchile nani.
10 #
Achi 26:26; Mic 6:14; Hag 1:6 Panongu no chunani, ikemu aghaqimo nani;
panongu no kütüqha nani, ikemu kughuko lumo nani,
kughengu panongu no Ampeu pheve no pano pesü
11alokütsü pühavetsü chekeu asalha, aji, eno aji kithe
hipaqo lo azüküvü shi auveke.
12Iw timiqo no asü tachu launo kighinikile jucheni,
eno panongu qheküsü no tungkuptsa pitsü cheni.
Kughengu asalha ghawu no panongu saküghüzüve ake,
eno panongu ye kütüqha aniye pano Lhou phevae.
13Panongu no naghuto kütsüqa lono aghashi cheni
eno atoghiqo lono, aphisübo,
khotsüsübo eno tsüzüsübo qholono piti mlla cheni,
kughengu tipaqo kicheqho ye alo kehue.
Ikehu nongaqo no kütüqhauvae,
eno no mulimi no salhauve.
14Nongaqo no kütüqhauve eno
no mulimi no salhauve namu Ni ye panoqo ghimemo nani;
kughengu kiptimiqo ghi kütüqhalimi lau wu acheni
eno achineki lo kütüqhalimi gholono aghashi acheni ke,
alokütsü kumomi ye kütsave nani.
15O Israel, nongu no kütüqha cheghi namu,
Judah pelo pimive pe kevilo.
Gilgal lo ilo kevilo, tike kumono
Beth-aven lo iqho kevilo,
eno “Ampeu ye xüküau” ipi ashoqhi shi kevilo.
16Israel ye amishi lhothe no
kuthovi akeshi ke Ampeu ye
atsüni kümtsha-a lo ambe tucho
keshi panoqo tucho luni keshea?
17Ephraim ye ajulho lau kime
luve ake pa likhi qhivelo.
18Pano ji shokhave kemtsa panongu no kütüqhauve cheni;
panow yepemi no akukujopu kimiyekütü cheni.
19Amülhü no pa chishibo lono panoqo küzüpe wuvae,
panongu no pano ghakishi ghenguno kujo nani.
Currently Selected:
HOSEA 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
