BOTHUBO 40

Joseph no Akughumi Kini Samo Hepho

1Ado hami thiu, Egypt lo akükau jukhu kipeu ngo asho kümlau pama ye pano mpeu, Egypt kükau hebide keu kipimi shive. 2Pharaoh ye paw hiyampemi, ajukhu kipeu atou ngo asho kümlau atou pama shou axuideve, 3eno pa no ghukhemi kepten kughuki khile Joseph ghi khatha püa keno tile pama khathave. 4Pama gholo ngo peniye eno pama ghini shi peniye ghukhemi kepten no Joseph süsüve. Pama ye ado hami tishi akughu lo ae.

5Kijili lakhi Egypt kükau jukhu kipeu ngo asho kümlau, khuu pama akughu shi akeno, pama gha asamo pumo, eno pama gha pütüta samo hepho ae. 6Kughou Joseph no inaqhe pama lau ighi keno, pama ye akükümsü püna aghikeu pa no ithulu. 7Ikehu pa no Pharaohw hiyampemi, khuu pama ghi pa mpeu ki lono pa gholo akughu shi akeno pama vilo ighiju, “Kushiye ishi nokujo ye agi zü ani kea?” 8Pama no pa vilo pi, “Nikujo ye asamo pumoe, ikemu nikujo vilo hepho piyeni kemi lakhimu kühae.” Eno Joseph no pama vilo pi, “Hekupho ye Alhouw ke kumo? Kimiyeno I vilo piju lo.” 9Ikehu ajukhu kipeu atou no pa samo Joseph vilo pi, “I samou no atsaibo lakhi I zülo aghi, 10eno atsaibo lo aloka küthü aghi. Tipau no mini ipeghi khavi, pu ipeghive, eno tipau pho no atsaithi shi ni ipeghive. 11Pharaoh jukhu ye I u lo ae, eno I no atsaithi ikhilu no tipaqo Pharaoh jukhu lo inaphosü no Pharaoh u lo ajukhu sütsü aghie.” 12Tile Joseph no pa vilo pi, “Tipau hekupho ye hike: aloka küthü ye atsala küthü. 13Atsala küthü dolo Pharaoh no o kütsü#40:13 Akütsü peqhe tsüni pikeu ye sülekutho ke, ti ye akipimi qhive tsüni keu kiqi ke. peqhe tsüno ow hiyam lo süsüve nani, eno püzüu nono pa jukhu kipeu shiche ketoi Pharaoh jukhu pesü pa u lo sütsü nani. 14Kughou o kivipu shiluveni keno I kümsülu lo, kimiyeno kikimiye I lau pephetsü ghi Pharaoh lau I je pitsülo, eno aki hipau lono I khaqhiphe tsülo. 15Kughengu kuchou no ni ye Hebrewmi yeghi lono sünhe sawuve kemi, eno hilau ghi aqokutho lo I vesüve pekepu kümla ni ye kiumu shi püamoe.”

16Kughou asho kümlau no hekupho akivishi aghikeu ithi keno, pa no Joseph vilo pi, “Ni ghi asamo lakhi pumoe: Ashopa ashoghi küthü I kütsü lo aghi, 17eno ashoghi kunguu lo Pharaoh ghenguno asho jeli kümtsü aghi, ikemu aghauqo no I kütsü lo ashoghi akeu lono mighichu aghie.” 18Joseph no khochile, “Hekupho tipau ye hike: ashoghi küthü huye atsala küthü ke. 19Atsala küthü dolo Pharaoh no o kütsü peqhe tsü nani, eno asübo lakhi lono o tshüqhive nani. Eno aghauqo no o shi mighichu nani.”

20Atsala aküthüu lo Pharaoh punu tsala shiae, pa no aghulhu lakhi pa qemi kümtsü ghenguno kuto eno pa qemi gholono ajukhu kipeu atou ngo asho kümlau atou pama kütsü peqhetsü.#40:13 21Pa no ajukhu kipeu atou pesü pa-a lo süsüve eno pa no Pharaoh u lo pa jukhu süvetsü. 22Ikemu pa no asho kümlau atou ye Joseph no hephotsü ketoi tshüqhive. 23Ikeghi ajukhu kipeu atou ye Joseph kümsülu move, pa ye qhoi kümsümave.

Currently Selected:

BOTHUBO 40: SUMRVBSI

Highlight

Copy