BOTHUBO 41

Joseph no Pharaoh Samo Hepho

1Ampe kini kupuju thiu, Pharaoh no pa ye Nile phivilo puthugho aghikeu pumolu, 2eno julo, Nile lono amishi jukivi eno ashi pubeyi keu tsüni ipeghi, eno panongu ye ayeghübo mzachu ae. 3Eno julo, tipaqo shelo amishi kütau juküsa eno aghi kümsayi keu tsüni Nile lono ipeghi, eno Nile mkülo amishi kütauqo gholo puthughove. 4Amishi juküsa eno aghi kümsayi keqo no amishi jukivi eno ashi pubeyi keqo chuve. Eno Pharaoh ye idathuve. 5Pa no zühuve no asamo akiniu pumo. Julo, aghipe kivi athi pubeyi keu abo lakhi lono ape tsüni ipeghi. 6Eno julo, tipaqo shelo athi pumo no kipelau mülhü no fuputhove keu ape tsüni ipeghi. 7Athi pumo keu ghipe no athi pubeyi keu ghipeqo munove. Eno Pharaoh ye idathuve, eno julo ti ye asamou shi aghive. 8Ikehu thanau pa kükümsü küpünave kehu pa no timi puwu no Egypt lo küdüumi ngo alokütsümi kümtsü kue. Pharaoh no panoqo vilo pa samo pi, ikemu milakhimu tipaqo hepho tsümlave.

9Tithiu ajukhu kipeu atou no Pharaoh vilo pi, “Ishi I no I kipimi kümsüchilelu ani. 10Kughou Pharaoh no pa qemiqo lau axuideve no ni eno asho kümlau atou nikujo küghape ghukhemi shou kepten kilo khathave keno, 11nikujo gha kijili lakhi lono asamo pumoe, nikujo gha asamo lakhikhi pumo kemu hekupho ye kütüta. 12Hebrewmi apumi lakhi, ghukhemi shou kepten qeu no nikujo gholo ae. Kughou nikujo no pa vilo pi keno, pa no nikujo samo hephotsü, milakhikhi samo kiqi lono hephope nikujo vilo pi. 13Eno pa no nikujo lau hepho piye ketoi shikupuve. Ni ye Iw hiyam lo süküsü shiluve, eno asho kümlau ye tshüqhive.”

14Tileno Pharaoh no Joseph kupuwu, eno panongu no mtazü aqokutho lono pa saipeghive. Pa no akichimhi miyeve, aphimini kilive no Pharaoh zülo ighi. 15Eno Pharaoh no Joseph vilo pi, “I no asamo lakhi pumoe, ikemu khunomu tipau hepho luamoe. I no o ghili chiluke kughou nono asamo chiluni keno no ye tipau hepholu cheni” ipie. 16Joseph no Pharaoh khochile, “Ti ye I no kumoe; Alhou no Pharaoh lopushi khochile tsü nani.” 17Tishino Pharaoh no Joseph vilo pi, “Julo, I samou no ni ye Nile mkülo puthugho aghi. 18Amishi tsüni, ashi pubeyi eno jukivi shi Nile lono ipeghi eno ayeghübo mzachu ae. 19Tipaqo thiu amishi ighono juküsa eno aghi kümsayi tsüni ipeghi, titoi keqo ye Egypt yeghi kümtsü lo ni ye khilehimu ithulu mphie. 20Eno amishi aghi kümsayi eno juküsaqo no atüghü lo ashi pubeyi ipeghi keqo munove, 21ikemu aghi kümsayi keqo no ashikupu chuve keu khunomu ithimoe, kughengu tipaqo ye atüghü lo toi itaghi juküsa shi ake. Tithiu ni ye idathuve. 22Itaghi I samou no aghibo lakhi lono athi chhitoi eno akivi ape tsüni peipeghi aghikeu pumolu. 23Tithiu, ape tsüni, thizümüi, amuu eno kipelau mülhü no fuputho keu peipeghi, 24eno thizümüi keu ghipe huno ape kivi tsüni munove. I no küdüumi vilo pi kemu I vilo chixechilei pitsüni kemi khumu kühae.”

25Tile Joseph no Pharaoh vilo pi “Pharaoh samoqo ye lakhi eno aphiphi kena; Alhou no kiu shiniye ani keno Pharaoh lau pephe piyevae. 26Amishi akivi tsüni ye ampe tsüni, eno ape akivi tsüni ye ampe tsüni; asamo ye aphiphi ke. 27Amishi aghi kümsa eno juküsaqo thiu ipeghi keqo ye ampe tsüni, eno amuu ape tsüni kipelau mülhü no fuputho keu ye püqümiye ampe tsünike. 28I no Pharaoh vilo pive ketoi; Alhou no kiu shiniye ani keno Pharaoh lau piye anie. 29Egypt yeghi kümtsü lo ampe tsüni shishe kupukuno shi nani, 30ikemu tipa thiu ampe tsüni püqümiye ighi nani, Egypt yeghi lo kupukuno kümtsü kümsümave nani. Püqümiye no ayeghi chhive nani, 31eno püqümiye ighikeu ghenguno ayeghi lo kupukuno do huye kümsümave nani, kughengu püqümiye huno ighono ihulove nani. 32Pharaoh samo ghuthu kini pumo kibe keu kiqi ye Alhou ye hipa vehu iqemo ake, eno Alhou no kighitheno shikupu nanie. 33Tighenguno itehi, Pharaoh no vethakulumi ngo alokütsümi kishephe no Egypt yeghi shou süküsü shivelo. 34Pharaoh no Egypt yeghi shou jukükütsümi süküsü shino kupukuno shiake mpe ghuloki lono Egypt yeghi lono chiphelu keqo pungu lo saje lakhi qhilu pelo. 35Eno panoqo pelo kupukuno mpe hipaqo lono achuqupu hekütsülu keu kümtsü mishighünaqo lo Pharaoh küka qholono pekütsü no khekuto pelo. 36Achuqupu tipaqo ye ampe tsüni Egypt yeghi lo püqümiye ighi niye akeu ghenguno pekütsü keu shilo, tishianguno püqümiye vecheo ayeghi pühave keu shimo nani.”

Joseph no Ayekipe lo Ikughive

37Püghükiphe hipau ye Pharaoh eno pa qemiqo kümtsü pulou shive. 38Eno Pharaoh no pa qemi vilo pi, “Alhou Ghungu alolo akemi timi hitoi keu ningu ye ithulu nani keshea?” 39Tishino Pharaoh no Joseph vilo pi, “Alhou no hi kümtsü o piyeve akeke vethakulumi eno alokütsümi o toi kemi khumu kühavae. 40No ye I kibo shou ampeu shiniae, eno Iw timi kümtsü nono azah tsükeu kiqi lono mlaithani. Kükalakhü vehulo likhino I no o nguno akijeu shini.” 41Pharaoh no Joseph vilo pi, “Julo, I no Egypt yeghi kümtsü shou no süsüvae.” 42Tithiu Pharaoh no paw jedapu nguthi pa u lono ikhiluve no tipau Joseph u lo süvetsü, phepheike phi pa pipeve, eno ameshoyi no mlakeu chi pa kuo lo xipipeve. 43Paw khurkulu akiniu lo pa pelo ikupe. Eno pa zülono panongu no pi, “Qhoqhünhe lo!” Tishino Pharaoh no Egypt yeghi kümtsü shou pa süküsü shive. 44Tinguno alau, Pharaoh no Joseph vilo pi, “Ni ye Pharaoh ke, ikemu Egypt yeghiqha kümtsü lo ow puloza lumo aye, khunomu au peqhe momu apukhu süqhemo nani.” 45Pharaoh no Joseph je pesü Zaphenath-paneah kuvetsü. Pa no On lo achineu Potiphera nga Asenath pesü pa nipu shivetsü. Tishino Joseph no Egypt yeghi kümtsü lo wue.

46Kughou Joseph no Egypt kükau Pharaoh kümla lo iloghi keno pa ye ampe shighi shiae. Eno Joseph no Pharaoh zülono ipeve no Egypt yeghi kümtsü lo wue. 47Kupukuno mpe tsüni dolo ayeghi no pofushi apolupe, 48eno Egypt yeghi lo pa no ampe tsüni dolo achuqupu kümtsü hekütsü luve no mishighünaqo lo pekütsü luve. Mishighüna kümtsü lo hokümxa lo aluzaqo lono achuqupu pekütsü luve. 49Azüghi lo asaye toi, Joseph no athi kütsasa pekütsü luve, tipaqo ye ighono kupukuno shive kehu mighi khamlave ke.

50Püqümiye mpe ighi mphi lono Joseph ye anu kini ithuluve. On lo achineu Potiphera nga Asenath no pama punue. 51Joseph no anu anoghiu je pesü Manasseh kutsü. Pa no pi, “Kughengu Alhou no I pelo I ghime kümtsü eno I pu kibolomi kümtsü kümsümalu peke.” 52Anu akiniu je pesü pa no Ephraim kutsü, “Kughengu I ghimeqhi keu yeghi lono Alhou no I pelo athi pithilu peke.”

53Egypt yeghi lo kupukuno shikeu mpe tsüni kishekhave, 54eno Joseph no pi ketoi, püqümiye mpe tsüni huthuve. Tipa yeghi kümtsü lo püqümiye ighive, ikemu Egypt yeghi kümtsü lo achuqupu ae. 55Kughou Egypt yeghi kümtsü lo akhüava shive keno, timiqo no achuqupu ghenguno Pharaoh vilo ighamku. Pharaoh no Egyptmi kümtsü vilo pi, “Joseph lau wulo. Pa no nongu vilo kiu pi keno shilo.”

56Ikehu kughou püqümiye no ayeghi kümtsü lo ighive keno, Joseph no pekütsü püakeu ki kümtsü khaqhive, eno Egyptmi vilo jekimje tsü, kughengu püqümiye ye Egypt yeghi lo shishe kije shiveke. 57Tinguno alau, ayeghiqha kümtsü no Egypt lo Joseph lau athi qhüniye ighie, kughengu püqümiye ye ayeghiqha kümtsü lo shishe kije shiveke.

Currently Selected:

BOTHUBO 41: SUMRVBSI

Highlight

Copy