EZEKIEL 45
45
Akimthe Tokukujo
1“Kughou nongu no amheghi shi ayeghi kothani keno, nongu ye Ampeu ghenguno ayeghi saje hami akimthe tokukujo shi ikhithape qhilo, ti ye akushulau kilometer 12 eno akijelau kilometer 10 shilo. Tipau do akupuju akimthe shini. 2Tipau lo akimthe-a ghenguno kobidi-a lakhi ako lakhikhi lo auxakuchho 250 qhini, eno akikhala ghenguno ti homxa ghi auxakuchho 25 qhini. 3Mighive keu tokukujo lono akushulau kilometer 12 eno akijelau kilometer 5 mighilo, tile akimthe chineki, Shishe Akimthe-a anani. 4Ayeghi tipau lo hi ye akimthe saje shini. Hi ye achinemi, khunono akimthe chineki lo huthu acheni eno Ampeu zülo ighi no huthu acheni keno panoqo ghenguno ke, ti ye panoqo kungoki shi nani eno achineki ghenguno akimthe-a lakhi shi nani. 5Ayeghi saje lakhi akushulau kilometer 12 eno akijelau kilometer 5 no Levimi achineki lo mla chekeqo ghenguno pano mheghi shini panoqo pelo küghünape kepu mishighüna shi nani.
6“Akimthe tokukujo kophe tsükeu kikime lo nongu no aphughi ghenguno amheghi shi penike akijelau kilometer kini tüxa eno akushulau kilometer 12 kopheni. Ti ye Israel laghami kümtsü sala shinani.
Kükapuu Saje
7“Akimthe tokukujo no kulola eno kipelau kughuthupe akeu yeghi ye kükapuu sala shini, kulola lughi lono kulolau Azüghi kutolo; eno kipela lughi lono kipelau ghakhu lughi kutolo, tishianguno ti akushulau ye Israelmi lakhikhi lau kotha tsükeu yeghi akushulau tohi shipenie. 8Hi no Israel lo kükapuu mheghi shini. Iw kükapumi ye Iw timiqo qodaqhi kithe moae, ikemu panongu no Israel laghami pelo ashiaye kiqi lono ayeghi alupe nani.
9“Ampeu Alhou no ishi piani: Kughomae, O Israel kükapumiqo! Ngukangugha eno qodaqhi keu phevelo, eno kuchou xakütha ngo achipiu mikucho shilo. Iw timi haleve chekeu tavelo, ipi Ampeu Alhou no sheshu.
10“Nongu ye ahu kimghipu, ephah#45:10 Hi ye aghi-asü kimghipu ashoghi toikeu, eno bath#45:10 Hi ye azü, thazü jeli kimghipu, abohu toikeu achipiu pelo. 11Akimghipu ye aphiphishi homer peithalo, ti ye homer lakhi lo ephah chighi eno Bath chighi. 12Shekel lakhi ye gerah muku eno shekel muku no Mina lakhi.
13“Nongu no akümllagho tsüni keu hike: ashothi ahu kini tüxa eno barleythi ahuu kini, 14thazü bath kiqi lono akimghi shipe qhive keu cor kümtsü lono chighi lo saje lakhi (cor ye homer toi bath chighi ani). 15Axine peve tsünike ghenguno athi kümllagho, akipti kümllagho, külakishi kümllagho gholo Israel yeghi lo azü akeu-a lo atsüni mzachu chekeu ambe loji aqhe kini akelo lakhi pesü tsülo ipi Ampeu Alhou no asheshu. 16Israel yeghi lo timi kümtsü no akümllagho hipau pesü Israel kükapuu tsümasa nani. 17Israel laghamiw tiqhetini ghulhu kümtsü lo Sabbath, aqhi kithe eno aghulhu lo akipti kümllagho, athi kümllagho, atsaizü kümllagho kutope qhitsüni keu ye kükapuu kümlapu ke. Pa no axine kümllagho, athi kümllagho, akipti kümllagho, külakishi kümllagho, eno Israel laghami kümtsü züqhushi axine pevetsü penike akümllagho tsü chekeu ye pa no ikhiphetsü masae.
18“Ampeu Alhou no ishi piani: Aqhi atüghüu, atsala atüghüu lo nongu ye amshitsü lakhi tukutiye kühakeu pesü akimthe chineki shikimthe lo. 19Achineu no axine kümllagho lono aji kitila pesü achineki hukikha tsükucho lo, akiptia cheku bidi lo asü akeu lo eno akikhala alou khagho tsükuchoqo lo nuda lo. 20Atsala akütsüniu lo khuana no shikipimi momu akümtha lono axine shive aye nongu no hitoi shino achineki ghenguno shikimthe keu shini.
21“Aqhi atüghüu, atsala chighiabidiu lo, nongu ye Hechekulu Ghulhu pinilo, eno atsala tsüni nongu ye kholaqhi sümokeu sho chulo. 22Tipa tsalani kükapuu no pa eno Israel yeghi lo timi kümtsü ghenguno axine kümllagho ghenguno amshitsü lhothe lakhi ikhiphe tsüni. 23Atsala tsüni ghulhu lo akipti kümllagho ghenguno Ampeu lau pa no amshitsü lhothe eno ambetsü tsüni tukutiye kühakeu ikhiphe tsüni, atsala tsüni ghenguno atsala lo lakhikhi; eno tsalakipetsü anetsü lakhikhi axine kümllagho ghenguno ikhiphe tsüni. 24Pa no amshitsü lakhikhi ghenguno athi kümllagho ephah lakhi tsüni, ambetsü lakhikhi ghenguno ephah lakhi eno thazü ahu küthü ghenguno ephah lakhikhi tsüni. 25Aqhi akütsüniu atsala chighiapunguu lo atsala tsüni tiqhetini ghenguno axine kümllagho, akipti kümllagho, athi kümllagho eno thazü ishi pa no atho ikhiphe tsüni.
Currently Selected:
EZEKIEL 45: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
