EZEKIEL 42
42
Achineki lo Acheboqo
1Tithiu pa no akikhala nguno khalau, ahuu küdau I saipe, eno akikhala ghüngüu, aki ahuu akeu ghüngüu achebo akeu lo I saighi. 2Aki khikhi ahuu küdau akeno tipau hukikha ye akushulau auxakuchho lhopungu eno akijelau auxakuchho muku pungu ae. 3Akikhala alou akeu küdau auxakuchho chighi aghi, eno alaghi khikhi akikhala ashou akeno ti ye akujukhache ke, aki jolha küthü akeu lo akujukhache ghüngü lo ake. 4Acheboqo zülo alou ilokepu alaghi ae, akijelau auxakuchho pungu eno akushulau auxakuchho lhopungu ae, tipaqo hukikha ye ahuu ae. 5Ahuu achebo akeqo ye kibikhoi, kughengu akujukhacheqo no ajolha aqhou ngo amta lo achebo akeqo nguno a-a alau vekhave ke. 6Kughengu tipaqo ye aki jolha küthü ake, eno tipaqo ye akikhala lo atsükucho aketoi keu kühae. Ikehu ahuu acheboqo ye aqhou ngo amta jolhaqo nguno athiu ake. 7Tile akuptu lakhi khalau acheboqo ghüngüu ae, ti ye khalau akikhala, acheboqo ghüngüu, akushulau auxakuchho muku pungu ae. 8Kughengu akikhala nguno khalau acheboqo akushulau auxakuchho muku pungu ake, eno tipaqo ghüngüu aküpüla la ye akushulau auxakuchho lhopungu ae. 9Achebo hipaqo qhou timi no ashou akikhala lo iloghi kelo kipelau ipeve kepu laghi ae.
10Akikhala kuptu shishoi keu lono apeu akikhala ghüngüu eno aki akeu ghüngüu acheboqo ae 11tileno tipaqo zülo püla kepu laghi ae. Tipaqo ye ahuu achebo akeqo kimihi ke, akije-akushulau aqhemi eno ikipe-ikulo laghi, akikithi eno ahukikhaqo ye aphiphi ke, 12ti ye apeu acheboqo akeu lo ikipe-ikulo laghi toi shike. Tipau ipeilo keu hukuthu lono alaghi lakhi ae, alaghi ye kipelau timi no iloghi chekeu lo akuptu akeu kimihi ke.
13Tithiu pa no I vilo pi, “Ahuu eno apeu acheboqo akikhala ghüngüu akeqo ye akimthe cheboqo ke, tilehi achinemi no Ampeu zülo ighi no shishe akimthe kümllagho chucheni. Panongu no shishe akimthe kümllagho—athi kümllagho, axine kümllagho, eno akipimi kümllagho tile süpe qhicheni—kughengu ti ye akimthe-a ke. 14Kughou achinemi no Akimthe-a lo iloghini keno, panongu ye aphimini khikhi panongu no pepu ani keno tipaqo tile xaqhimo kelo khalau kikhala vechesü ipemo nani, kughengu hipaqo ye akimthe ke. Panongu ye timiqo gholo ipekumo züuno aphimini kütau pepu luveni.”
15Kughou pa no achineki alou mighiju akeu kishekhave keno, pa no khagho kipelau akeu lono I saipeve, eno achineki kupuju vehomxa mighijue. 16Pa no akimghipu süta pesü kipelau mighiju, ti akupuju lo auxakuchho 250. 17Pa no ahuu mighiju, ti akupuju lo auxakuchho 250. 18Pa no apeu mighiju, ti akupuju lo auxakuchho 250. 19Tishino pa no kulolau küdau tsüghüwo mighiju, ti akupuju lo auxakuchho 250. 20Pa no ako bidi mighiju. Tipau lo akuptu homxape ae, akushulau auxakuchho 250, eno akijelau auxakuchho 250 ae, tipau no akimthe ngo balha dolo kothape ae.
Currently Selected:
EZEKIEL 42: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
