EZEKIEL 41
41
Achineki Alou
1Tithiu pa no achineki lo aküpüla la lo I sailo eno ahukikhaqo mighiju. Ako lakhikhi lo ahukikha ye akijelau auxakuchho tsügho aghi. 2Akulaghi ye akijelau auxakuchho pungu, eno ikulo lo akuptu hula-hila auxakuchho kini tüxaxa. Pa no achineki lo aküpüla la mighiju, ti ye akushulau auxakuchho muku eno akijelau auxakuchho tsügho aghi. 3Tithiu pa no achebo alou ilo no ikulo laghi lo aküpüla la mighiju, ti ye auxakuchho lakhi; akulaghi no auxakuchho küthü; akulaghi hula-hila akuptu no auxakuchho küthü tüxa aghi. 4Pa no achebo akushulau mighiju, ti ye auxakuchho chighi, akijelau auxakuchho chighi, ti ye aküpüla la heche ilo kelo ke. Pa no I vilo pi, “Hi no Shishe Akimthe-a ke.”
5Tithiu pa no achineki tupikiye mighiju, akishilau auxakuchho küthü, eno achineki homxa ghi apheu achebo akeqo ye akijelau auxakuchho kini. 6Apheu cheboqo ye aki jolha küthü lo ae, lakhino lakhi sholo shi aki jolha lakhi lo shighi-ghi ae. Puqhepe ngo kepu no achineki tupikiye kümtsü homxape apheu cheboqo xapuqhe ae, tishikeu lono tipaqo ye achineki tupikiye lo mungupe ngomoe. 7Ti homxa ghi kunguu apheu cheboqo lo iku keloye kije shive. Anepa ye aqhou no kunguu iku ae eno ti ye ajolha amta lo akeu veche ikuae. 8Achineki homxa ghi akhache peqhepe akeu ghi I no ithulu; apheu cheboqo tsükucho mighiju kelo akushulau ayeghübo kupuju auxakuchho küthü. 9Khalau tupikiye lo apheu chebo kikime lo akeqo ye akishilau auxakuchho kini tüxa. Apheu cheboqo dolo eno 10achebo kütauqo dolo a-a akeu ye akijelau auxakuchho chighi no achineki lo ako kümtsü homxape ae. 11Apheu cheboqo hukikha ye a-a kümsa akeu lo khaqhipe ae, ahukikha lakhi no ahuu küdau eno lakhiu no apeu küdau ae. Ado lo a-a akeu ye akijelau auxakuchho kini tüxa.
12Kulolau akikhala paküta shi akeu lo aki akeu ye akijelau auxakuchho shighi pungu, eno aki tipau kuptu vehope akeu ye akishilau auxakuchho kini tüxa, ti ye akushulau auxakuchho lhobidi pungu.
13Tithiu pa no achineki mighiju, ti ye auxakuchho lhopungu; eno akikhala ngo aki gholono atupikiye ye auxakuchho lhopungu; 14achineki züu akikhala kipelau akeu ye akijelau auxakuchho lhopungu.
15Tithiu pa no akikhala küdau akeu ki mighiju kelo akijelau ako hula-hila auxakuchho lhopungungu ae. Abocho alou aküpüla la, akikhala lo acheboqo, ahukikha, 16eno alashe aghulolo akeqo, akhache no tipaqo homxape akeqo ye ahukikha ghüngüu ae, aghüza lono alashe kutolo asü no kümtsü kimepe qhike (alasheqo ye nhapüae), 17ahukikha shou akighipe akeu lono achebo alou kutolo asü no kimepe püae. Akuptu alou eno ashou ghi kümtsü homxa ghi mighiju. 18Cherubim ngo amsabo no aye shisüpe ae, cherub ngo cherub dolo amsabo lakhi ae. Cherub kümtsü agi kini xapuae: 19amsabo küdau ako lakhi loye timi gi xapu eno ako lakhiu lono abongshuu lhothe gi xapuae. Tipaqo ye achineki homxa ghi shisü püae. 20Aghüza lono kunguu ahukikha kutolo cherubim ngo amsabow aye shisü püae; aküpüla la lo akuptu lo ghi shisü püae.
21Aküpüla la lo ahukikha tsükucho ye kobidi, eno Akimthe-a züu ye kiuala 22asü no mlakeu akümlla-khache kimihi ae, ti ye akiqhelau auxakuchho lakhi tüxa, akushulau auxakuchho lakhi, eno akijelau auxakuchho lakhi. Tipau cheku, aboqha, eno akuptuqo ye asü no shike. Pa no I vilo pi, “Hi no aghulhu lüpa Ampeu zülo akeu ke.” 23Aküpüla la eno Akimthe-a ye ahukikha kini ae. 24Ti ye ahukikha alha kini shikeu, amta lono khaqhilu keu. 25Aküpüla la lo ahukikhaqo lo cherubim ngo amsabo shisü püae, ti ye akuptuqo lo shisü püake toie. 26Acheboqo lo alashe müghüghüi keqo ae eno akuptuqo ye amsabo toikeu sübo no kogheküghü shipuku püake.
Currently Selected:
EZEKIEL 41: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
