EZEKIEL 24

Jerusalem Khasüve

1Atsala achighiu, aqhi achighiu ampe atokuu lo Ampeu tsa I lau ighi: 2“Timi nu, hipa tsala je yesüpe qhilo. Hipa tsala lono Babylon kükau no Jerusalem khasü luveke. 3Hekibidemi kibo vilo aholetsa lakhi sheshu lo, eno panoqo vilo pilo, Ampeu Alhou no ishi piani:

“Ali lakhi ghope ami lo pukulo;

azü ghi tile lesülo;

4tipau lo ashileqhi aluko, abi,

aleqhi kivi kümtsü sülo;

aghi kivi pesü ti shepichhi lo.

5Ambe akiviu lakhi kishelo;

tipau qholo asü süghülo;

akivishi tipau kumqholo;

tipau ghiqo ghi tileno belelo.

6“Tighenguno Ampeu Alhou no ishi piani: Aji pele chekeu mishighüna haküsapue, ti ye ali piti püha akeu ke, kiumu kishe mono lakhikhi no ikhiphe luvelo. 7Kughengu li no aji pele keu ye li gholo ani; li no tipau pesü atuqu shou lepuku ke; ayeghimkhu pesü tipau jonhani ye li no ayeghi lo leqhi move. 8I loghu shikighide eno amkhü luniye li no aji pele puku keu tuqu shou I no aji lepuku ke, tishikeu lono ti ye nhape moniye ke. 9Tighenguno Ampeu Alhou no ishi piani: Aji pele chekeu mishighüna haküsapue! I no asü qhemghai tile ghebe nani. 10Asü ghepuku lo, ami küqülo, ashi akivishi belelo, vekujumkhu akivishi xukütsü lo, eno aghiqo ye pitive lo. 11Ali kümsa amibalu shou ghope qhilo, tishino tipau pelo akülü shive pelo, aküsayi li shipiti lo, tishino tipau mithekumo tileno pitidave pelo, tipau pitidave keu ye kühave pelo. 12Aghime lono li ye akulho shivae; tipau pitida keu kutomo akeu ye tipau lono kühavemo nani. Tipau pitida süve keu ye ami lo vesüvelo! 13Ghaghughale mithekumo ghenguno Ni ye nongu shikimtheni cheke, nongu shou I loghu ghapiqi lumoke kutolo nongu pesü shikimthe monani. 14Ni ye Ampeu ke. I no piqhivae; tipau ye shikupu nani; I no tishi nani. Ni ye palokuto monani; Ni ye akipimi qhitsümo nani; Ni ye qhivemo nani; nongu laghi eno nongu kümlaqo kiqi lono nongu shou küghatha nani ipi Ampeu Alhou no sheshu.”

Ezekiel Nipu Thive

15 Ampeu tsa I lau ighi: 16“Timi nu, julo, o nhethi lo ikighi I no ghuthu khavino ikhi süwuve niye shivae; ikemu no ye mloqa kevilo, momu o nhezü piji kevilo. 17Amloghime tuthu shelo, ikemu asütsa kuloghi lono shephe kevilo; akithi ghenguno akumlo shikevilo. O kütsü küküzüphi khapu luvelo, eno o pukhukuqho xapu lulo; o kichi küzü kevi momu timi shopa chukevilo.” 18Ikehu I no inaqhe timiqo pütsae, eno avelau I nipu ye thive. Thoghiu ye azah I tsüke toi I no tishie.

19Timiqo no I vilo pi, “Nono hipaqo shi akeu ghilisüqe ye kiu kiqi keno no ye ningu vilo pimo keshea?” 20Tileno I no panoqo vilo pi, “Ampeu tsa I lau ighi: 21‘Israel laghami vilo pilo, Ampeu Alhou no ishi piani: Julo, I no I kimthe chineki shikitiqeve nani, nongu qheküzapu küka, nongu nhethi lo ikighi, nongu ngulho no khelho chekeu, nongu pu-anga khunoqo nongu no Jerusalem lo qhive keno panongu ye azütakikihi lono ikiqive nani. 22Nongu ye I no kiu shi keno tishi nani; nongu no nongu kichi küzümo nani, momu timi shopa chumo nani. 23Nongu kütsü küküzüphi nongu kütsü lo xapu nani, eno nongu pukhukuqho xapu nani; nongu ye mloqamo nani, ikemu nongu xine ghenguno tsümauve nani eno lakhino lakhi lau sakütü igha nani. 24Tileno Ezekiel no nongu michipu shi nani; pa no shi akeu kiqi lono nongu no shi nani. Kughou hipau ighini keno tileno nongu no Ni ye Ampeu Alhou kepi ithi nani.’

25“Timi nu, tipa tsalani I no mtsüqheino panow sükusho-a, pano lokivi eno ajuküvü, pano nhethi lo ikighi, pano ngulho no puloniqhiyi chekeu, pano pu-angaqo ikhipe wuve nani, 26tipa tsalani kupokichemi no nongu lau asütsa süghi nani. 27Tipa tsalani kupokichemi lau nongu kichi xükho no nongu no pi nani eno atsa pimo keu shimo nani. Ikehu no ye panoqo ghenguno amchipu shi nani eno panongu no Ni ye Ampeu kepi ithi nani.”

Currently Selected:

EZEKIEL 24: SUMRVBSI

Highlight

Copy