EZEKIEL 20

Israel Hekibide Ishokibe

1Atsala achighiu, aqhi apunguu, ampe akütsüniu lo, Israel lo layemi khami Ampeu lau no ighijuni ye ighi no I zülo iqave. 2Tile Ampeu tsa I lau ighi: 3“Timi nu, Israel lo layemiqo pütsa no pilo, Ampeu Alhou no ishi piani, Nongu ye I vilo ighijuni ye ighi ani keshea? I no xüake toi, Ampeu Alhou no asheshu, Nongu pelo I lau no ighiju pemo nani. 4Timi nu, no ye panoqo shou küghathabe nani kema? Pano pelo pano puasüqow aphikümqhüpu ithi pelo, 5eno pilo, Ampeu Alhou no ishi piani: I no Israel kishelu ke tsalani, Egypt yeghi lono I no panoqo lau pephe piye no ithilupe eno I no Jacob kibolomi tikughukoqo vilo pi; I no panoqo lau tushoqhi no pi, Ni ye Ampeu nongu Lhou ke. 6Tipa tsalani I no panoqo vilo, I no Egypt yeghi lono panoqo saipeghi no ayeghi panoqo ghenguno phu püakeu, akichhizü ngo akhingozü no qowu akeu yeghi, ayeghi kümtsü nguno ajuküvü yeghi lo sawuni kepi ashoqhi shike. 7I no panoqo vilo pi, ‘Nongu nhethi ghapiqilu chekeu aphikümqhüpu thimeqo nongu lakhikhi no pevelo, eno Egypt lo asü-atu julho vecheo nongu ampi shikitiqe kevilo; Ni ye Ampeu nongu Lhou ke.’ 8Ikemu panongu no I lachile ghi hebide eno I tsa chiluni keu pulo move. Panongu khumu pano nhethi ghapiqilu chekeu aphikümqhüpu jeli pevemoe, momu Egypt süatu julhoqo phevemoe.

“Tileno I no pi, Ni ye I loghu panoqo shou lepukuni eno Egypt yeghi lono I mlokighide panoqo shou pukuni. 9Ikemu shiye jeli khunoqo gholo panongu no xüani keno pano nhethe lo I je shikitiqe moniye I no I je ghenguno Egypt yeghi lono panoqo saipeghi keu vecheo panoqo pelo Ni ithipe ke. 10Ikehu I no Egypt yeghi lono panoqo saipeghi eno yenguyike-a lo panoqo saighi ke. 11I no I yezah panoqo tsü no Iw pimheyeqo panongu pelo ithipe, tipau vecheo milakhi no ti papelu aye, pa ye xülu nanie pi ithipe. 12Tinguno alau, I no Ni eno panoqo lau amchipu lakhi shi Iw Sabbath panoqo tsü, tishikeu lono Ni ye Ampeu, panongu qhukimthe tsükeu kepi ithi peniye ke. 13Ikemu Israel kibolomi no asayeqha lono I hebide ke. Panongu no I khuayeqo pemove eno Iw pimheyeqo milive ke, tsala milakhi no tipaqo pape aye, pa ye xülu nani; eno panongu no Iw Sabbath shishe shikitiqeve ke.

“Tileno I no pi, Ni ye asayeqha lono I loghu panoqo shou lepukuni, eno kümtsü kishekhave tsüni. 14Ikemu shiye jeli khunoqo gholo panongu no xüani keno pano nhethe lo I je shikitiqe moniye I no I je ghenguno panoqo saipeghi keu vecheo panoqo pelo Ni ithipe ke. 15Tinguno alau, akichhizü ngo akhingozü no qowu akeu, ayeghi kümtsü nguno ajuküvü, khikhi I no panoqo tsü keno Ni ye tile panoqo sailomo nani kepi asayeqha lono I no tushoqhi ke, 16kughengu panongu no I khuayeqo milive eno I yezahqo pemove ke, eno Iw Sabbath shikitiqeve; kughengu panoqo mlo ye pano sü-atu julho lau wuveke. 17Tishimu, I nhethi no panoqo kimiyeqhiyi ke, eno Ni ye panoqo kütsavemo momu asayeqha lono kümtsü kishekhave moe.

18“Asayeqha lono I no panoqo tianuli vilo pi, Nongu puasüqo yezah lo cheche kevilo, panow pimheye pape kevilo, momu pano sü-atu julho vecheo nongu shikitiqe kevilo. 19Ni ye Ampeu nongu Lhou ke; I khuaye papelo, eno Iw pimheyeqo papeni ke kutokupui lo, 20eno Iw Sabbath akimthe shi qhilo tishianguno tino Ni eno nongu dolo amchipu lakhi shi anani, eno nongu no Ni ye Ampeu nongu Lhou kepi ithi nani. 21Ikemu anuliqo no I hebideve ke. Panongu ye I yezah lo cheche move eno Iw pimheyeqo gholuni ke kutokupui move, ti ye milakhi no papelu aye, tipau vecheo pa ye xülu nani pikeu ke; panongu no Iw Sabbath shikitiqeve ke.

“Tileno I no pi, Ni ye panoqo shou I loghu lepukuni eno asayeqha lono I mlokighide panoqo shou pukuni. 22Ikemu I no I u süchile luve eno I je ghenguno tishive, tishianguno shiyeqo nhethe lo I je shikitiqe moniye ke, panoqo nhethe lono I no panoqo saipeghi ke. 23Tinguno alau, asayeqha lono panoqo lau I no tushoqhive, I no shiyeqo gholo panoqo kutholeve nani eno aghakhuqo lo panoqo haleve nani, 24kughengu panongu no Iw pimheye gholu move, I khuaye milive eno Iw Sabbath shikitiqeve, eno panongu nhethi no pano puasüqo süatu julho shou jupuku auveke. 25Tinguno alau, I no ayezah alomo keqo eno aküxüpu shimo kepu pimheyeqo panongu tsü, 26I no panoqo gho, panow anu anoghiu akümllagho vecheo panoqo shikitiqeve ke, tishikeu lono Ni ye panoqo kütsaveni ye ke. I no tishikeu lono Ni ye Ampeu kepi panongu pelo ithi peniye ke.

27“Tighenguno, timi nu, Israel kibolomi pütsa no pilo, Ampeu Alhou no ishi piani: Nongu puasüqo ye hipau lo ghi I lau küthakügha shike, ti ye pishikiqhi shi I peitha keu vecheo ke. 28Kughengu kughou I no panoqo tsüni kepi tushoqhi keu yeghi lo panoqo saighi keno, panongu no khile khilemu atoghi qhemghai keu momu anipa miniboi keu sübo ithulu aye, panongu no tilau no aghakishiqo mlla eno tilau no aloghu shikighide keu kümllagho pephe tsüke; panongu no tilau no alokiqi xokütsüngü piti mlla, eno atsaizü kümllagho leqhike. 29(I no panoqo vilo pi, Qhemghaike-a khilehi nongu no wucheni keno ti ye kiu kea? Ikehu ti ye ishi tsala kutolo Bamah#20:29 Bamah kiqi ye qhemghaike-a ipi kucheni.)

30“Tighenguno Israel kibolomi vilo pilo, Ampeu Alhou no ishi piani: Nongu ye no puasüqo ghola lono nongu ampi shikitiqe eno panow aphikümqhüpu thimeqo pape kütüqhani keshea? 31Kughou nongu no now aghoqo ikhipe tsü eno nongu nuliqo ami lono mllani keno, nongu ye asü-atu julho pesü ishi tsala kutolo nongu ampi shikitiqeve anie. O Israel kibolomi, nongu ye I lau kighini kileni keshea? I no xüake toi, Ampeu Alhou no asheshu, nongu ye I lau kighinikile lumo nani.

32“Nongu kükümsü lo, ‘Ningu ghi shiye kütami toi shini, aghakhuqo lo ashiayeqo toi shini eno asü ngo atu mllani nolo’ ipikeu kükümsü ye khilemu shilumo nani.

Ampeu no Israel Athoputho Tsü

33“I no xüake toi, Ampeu Alhou no asheshu, mtsüqheino au kumto eno au xachhope aloghu lephe keu lono I no nongu shou akükau shi nani. 34I no timi hipaqo launo eno aghakhu khile nongu kutholepe ani keno, tilau no au kumto eno au xachhope aloghu lephe keu lono nongu saipeghive no nongu hekütsü luve nani. 35I no ashiayeqo sayeqha lo nongu saighi nani, eno tilau no nongu sasü agi no agi thepe küghakütha shi nani. 36I no Egypt yeghi lo asayeqha lono no puasüqo sasü küghakütha shike toi I no nongu sasü küghakütha lo ilo nani ipi Ampeu Alhou no asheshu. 37I no nongu pelo ghaküsü küsü katha wupe nani, eno I no puloshoqhi kütsügha lo nongu saighive nani. 38Nongu dolo hekibidemi eno I mjochile ghi axine shi chekemi ye I no ikhive nani. Ayeghi khile panongu no kachena shicheni keno tile no I no panoqo saipeghive nani, ikemu panongu ye Israel yeghi lo ilolumo nani. Tileno nongu no Ni ye Ampeu kepi ithi nani.

39“O Israel kibolomi, nongu ghenguno Ampeu Alhou no ishi piani: Tsala nongu no itehi eno ishi nguno alau I tsa inimo aye, wulo eno nongu lakhikhi no pütüta sü-atu julho qelo; ikemu now agho ngo nongu sü-atu julho vecheo I je kimthe shipünha monani.

40“Ampeu Alhou no asheshu, kughengu Iw akimthe naghuto, Israel naghuto kiqhe shou no Israel kibolomi kümtsü, panoqo kümtsü, tilau ayeghi hipau lono I qe nani. Tilau no I no panoqo ikhilu nani, eno tilau no I no nongu süqha-süli eno akighiche gho gholono now akimthe kümllagho kümtsü avehupu shi nani. 41Kughou I no ashiayeqo gholono nongu saipeghi eno kuthole püakeu ghakhuqo lono nongu hekütsüni keno, I no alokiqipu xokütsüngü toi nongu ikhilu nani. Eno shiye kümtsü nhethe lono I no I kimthe nongu gholo pephe piye nani. 42Israel yeghi, aghakhu khikhi I no nongu puasüqo tsüni kepi tushoqhi keno, tile I no nongu saighi kelo nongu no Ni ye Ampeu kepi ithi nani. 43Tilau nongu no nongu laghi eno no kümla khipaqo vecheo nongu ampi shikitiqeve keno tipaqo kümsülu nani, eno kixikila khipaqo nongu no mlaithave keno tipaqo kümtsü ghenguno nongu no nongu ampi jupe aphimqhü nani. 44O Israel kibolomi, Ampeu Alhou no asheshu, kughou I no nonguw kixikila laghiqo momu nonguw shiküpsa kümlaqo kiqi lono kumono I je ghenguno nongu peithani keno nongu no Ni ye Ampeu kepi ithi nani.”

45 Ampeu tsa I lau ighi: 46“Timi nu, ayeghi apeu o gi kugho piqilo; apeu akemi lachile ghi kütsüshika lo, eno apeu ghasüghave yeghi lachile ghi tungkuptsa pilo. 47Apeu ghasüghave vilo pilo, Ampeu tsa inilo: Ampeu Alhou no ishi piani, Julo, I no o shou ami küiqü puku nani, eno tipau no asübo miniboi eno kimghoi keu kümtsü pitive nani. Amiküqü ye ghapinhe lumo nani, eno ahuu ngo apeu yeghi ye tipau no piti külhüqhi nani. 48Ni Ampeu no tipau küiqü kepi timi kümtsü no ithulu nani; tipau ye ghapinhe lumo nani.” 49Tile I no pi, “Ah, Ampeu Alhou! Panongu no I vilo pi ani, ‘Pa ye aholetsa iqikipheu ke kumo keshea?’”

Currently Selected:

EZEKIEL 20: SUMRVBSI

Highlight

Copy