EZEKIEL 17

Alhuqu Kini eno Atsaibo lakhi

1 Ampeu tsa I lau ighi: 2“Timi nu, sülekutho lakhi hephopiye lo, eno Israel laghami lau aholetsa lakhi pilo; 3Ampeu Alhou no ishi piani: Alhuqu kuloghi lakhi achishibo kije eno amhi kushuo ache, alabe jeli mhi no ghoghoi püzü Lebanon lo ighi no cedarbo kütsüqa lo ngove. 4Pa no cedarbo kütsüqa lo akhuni mini ipeghi keu mighi thape kilhikishi yeghi lo pewuve no lhidimiw mishighüna lo ghope qhive. 5Tishino pa no ayeghi lono apiti ikhiluve no aghüma yeghi lo shosüve. Pa no tipau pesü azü kupukuno shiake alo shosü. Pa no tipau pesü mlosübo lakhi toi shosüve, 6tino mini ipeghive no aqhou no qhawo keu tsaibo lakhi shive, tipa lokaqo no pa küdau qhawo eno akuhu ye tipa-a lo qüsüpe ae. Ti ye atsaibo lakhi shive no aloka qhawove.

7“Tile alhuqu kuloghi kütau ghi achishibo kije eno amhi ghoghoi xapu ae, eno julo, atsaibo hipau no pa küdau akuhu kughopuwo eno tipau shosüpe akeu-a lono pa küdau alokaqo qüpuwu, tishikeu lono pa no azü pesü tipau tsüniye ke. 8Tipau ye azü kupukuno-a phivilo ayeghi kivi lo shosüpe ae, tishikeu lono tino alokaqo qhawo no axathi pithilu no akighiche tsaibo shiniye ke.

9“Ampeu Alhou no ishi pilopi: Tipau ye thuwulu nani ma? Pa ye tipau kuhu nhüve eno axathi pughothave, tishianguno ti ye thizümüive, eno anipa xüthilei mini ipeche keqo ye thizümüive pemoni keshea? Tipau kuhu lono nhüveni keu ye aküka kumtomi lakhi momu timi kutomo avehupu shimo nani. 10Julo, ti ye shosüvae; ti ye thuwulu nani keshea? Kughou kipela mülhü no ti fudaqhini keno ti ye qhoi thizümüi tipau shosü püake-a lo mini ipeghi keu lono thizümüive moni keshea?”

11Tithiu Ampeu tsa I lau ighi: 12“Itehi hekibidemi kibolomi vilo pilo, Thime hipaqo ye kiu keno nongu ye ithi anima? Panoqo vilo pilo, julo, Babylon kükau no Jerusalem lo ighi, eno li kükau ngo liw sakiphemi küghaluve no panoqo sasü pa lau Babylon lo ighivae. 13Pa no akükau tikughukomi lakhi sasü visho shivae, eno pa pelo ashoqhi shipe (ayeghi hipau lo atomi pa no küghape sawuve), 14tishino kükaqha ye kuchunive no ithughi mlave peniye shike, eno paw visho papelu no xüpeniye ke. 15Ikemu pa no hebide no paw lashikami Egypt lo puwu, tishino panongu pelo khurshi ngo ghüshimi kutomo pa tsü peniye shike. Pa ye tolu nani keshea? Thime hitoi keu shiche kemi ye pokalu nani keshea? Pa ye visho kubove no pokalu nani keshea?

16“I no xüake toi, Ampeu Alhou no asheshu, mtsüqhei a-a khile akükau no küghüna ani keno, khuu shoqhi pa no thaighave eno khuuw visho pa no kubove keno, pa ye Babylon lono thive nani. 17Kughou aküxü kutomo kütsave tsüniye ayeghi pesü amoqhe puku eno atupikiye leluveni keno, Pharaoh eno paw akumto ghüshimi ngo aloji kije ye aghüshi lo pa kuphumo nani. 18Pa no visho kubove keu lono ashoqhi thoghave kehu julo, pa no pa u pesü thime hi kümtsü shivae; pa ye poka lumo nani. 19Tighenguno, Ampeu Alhou no ishi piani, I no xüake toi, mtsüqheino pa no I shoqhi thaighave eno pa no kubove keu ye Iw puloshoqhi ke. I no tipau pa kütsü shou pukutsü nani. 20I no pa shou I khame vepuku nani, eno pa ye I lichhe lo kitime luve nani, I no pa sasü Babylon lo ighive nani eno pa no I pishiqhi keu ghenguno tilau no I no pa sasü küghatha nani. 21Paw ghüshimi poche kemi kümtsü azütakikihi lono ikiqive nani, eno ghükulumi ye amülhü lo kuthole nani, eno Ni ye Ampeu kepi nongu no ithi nani; I no piqhivae.”

22 Ampeu no ishi piani: “Ni ampi no qhemghai keu cedarbo kütsüqa lono akhuni pughotha pesü wunani. I no tipau akemtsü lo akhuni kümtsha pigheve nani, Ni ampi no tipau pesü qhemghaike-a eno chuqumghai keu naghuto lo shosü nani. 23Israel lo naghuto kütsüqa lo I no shosü nani, tishikeu lono ti ye alokaqo qhawo eno axathi pithilu nani eno cedarbo akighiche lakhi shive nani. Tipau qholo aghau jeli kümtsü no ngo nani; tipa loka kicheqho lo aghau jeli kümtsü no apüsü pesü nani. 24Eno aluza lo asübo kümtsü no Ni ye Ampeu kepi ithi nani; asübo qhemghai keu I no aqhou saiqighive nani, eno chuninhei keu pesü qhemghaive tsü nani, miniboi akeu pesü kimghoive tsü nani eno qhaikeu pesü xüthilei tsü nani. Ni ye Ampeu ke; I no piqhivae, eno I no tipau shi nani.”

Currently Selected:

EZEKIEL 17: SUMRVBSI

Highlight

Copy