EZEKIEL 16

AMPEUw Pükhükümlapu Nipu

1Itaghi Ampeu tsa I lau ighi: 2“Timi nu, Jerusalem pelo liw aphikümqhüpu ithi pelo, 3eno pilo, Ampeu Alhou no Jerusalem vilo ishi piani: no hukuthu eno no punu keu ye Canaanmi yeghi lono ke; o pu ye Amorimi eno o za ye Hittimi ke. 4O punu ye ishie, o punuke tsala lo o pola ye ghathamoe, o shikimthe nike azü pesü o kuchhu moe, amti pesü o phi nutsümo, momu aphi kümtsha pesü no küzü moe. 5Khuu nhethi nomu amlosa qhiyi hipaqo o lau shitsüni ye amlo ighimoe, ikemu no ye aluza lo inapügha peveke, kughengu o punuke tsala lo o jupe aphimqhüve ke.

6“Kughou I no o kathawu keno no ye aji lo ihi aghi keu ithulu, o ji no o küzüpe akelo I no o vilo pi, ‘Xülo!’ o ji no o küzüpe akelo I no o vilo pi, ‘Xülo!’ 7I no o pelo aluza lo atsünibo toi miniboi ipeghipe. Eno no ye thuwuve no chuqumghaive no jukivi no chhitoive. O kichhi ye akivi shi ipeghive eno o kütsüsa ye thuwuve; ikeghi no ye aphimini pepumo eno aphikümsa shiae.

8“Kughou I no itaghi o kathawu no o ju ithulu keno, julo, no ye küzüvü kepu do tove aghi, eno I no I kuuphi pesü o phikümsa nhatsüe; I no o lau tushoqhi no o sasü puloshoqhi shie, Ampeu no asheshu, eno no ye Iw shiveke. 9Tithiu I no azü pesü o kuchhu no o phiau lono aji qhuqhive tsü, eno thazü pesü no o nukishelue. 10I no aye shisükeu phimini pesü o pipe eno ashiyiko akiviu pesü o pukhukuqho shitsü. I no phepheike phi akiviu pesü o küzüluve eno müdüniyike phi pesü o puuve. 11I no chiku-chilaqo pesü o pipe, o u lo au kükha sütsü eno o kuo lo achila xipinie. 12I no anguthi pesü o nigipe lo süpipe, o kini lo akinikighi sütsü eno o kütsü lo jukivi kütsükuqho sütsüe. 13Ikehu no ye ameshoyi ngo ghükayi no ananu shipuve, phepheike phi akivi, müdüniyike phi eno aye shisükeu phi no o phimini shike. No ye ashomkhu, akhingozü eno thazü akivi chue. No ye shishe ajukivi shi ipeghive eno kükaliu shive. 14O jukivi ghenguno o jekipi ye shiyeqo dolo veküpha wove, kughengu ti ye I no o shou jukighilepu shi pukutsü keu vecheo kupukülailu kepi Ampeu Alhou no asheshu.

15“Ikemu nono o jukivi shou pükhübeve eno o kighiche ghenguno kütüqhauve eno khukhumu iqhoiqi cheghi kemi shou o salha lepuku tsü; o jukivi ye paw shiveke. 16Nono o phimini hami ikhipe o ghenguno alabe jeli no akimtheki shike, eno tipau lono kütüqhauve. Hitoi keu ye khilemu shimphi momu khilemu shimo nani. 17Iw ameshoyi ngo ghükayi no mlakeu o chila kivi, khikhi I no o tsü keno tipau ghi nono ikhipe o ghenguno timi julhoqo mla, eno tipaqo sasü kütüqha ke. 18Nono ow aye shisükeu phimini pesü tipaqo nhape qhi, eno Iw thazü ngo I xokütsüngü pesü tipaqo zülo ghope qhie. 19Asho khikhi I no o tsü keno tipau ghi I no ashomkhu, thazü eno akhingozü akivi pesü o lojike nono alokepu xokütsüngü lakhi shi tipaqo zülo ghope qhi; tihutoi shi kepi Ampeu Alhou no asheshu. 20Nono I lau punu tsükeu o pu-angaqo pesü tsüqhi chuve peniye tipaqo lau aghashi ke. Nono kütüqhalimi shikeu ye avehu tachu kesheno 21no ye I tianuliqo ghiqhive no ikhipe ami lono piti keu kümllagho shi panoqo lau pephe tsüve kea? 22Ow aphikümqhüpu eno kütüqha keu kümtsü lo no ye o lhothe tsala lo aphimini pepumo no aphikümsa shi aji lo ihi akeu kümsü mlave.

23“Ow kixikila kümlaqo shive kethiu (o ghenguno ahasapue, ahasapue! Ampeu Alhou no asheshu), 24nono nhasü keu chebo mla eno o sala alaghila kümtsü lo qhemghaike-a mlae. 25Alaghila kümtsü lo nono ow qhemghaike-a mla eno o jukivi pesü aphikümqhüpu shino khukhumu kathawu chekemi lau no ampi pesü ikhiphe tsüno o salha küghüsü ke. 26Nono ghaghumi o kisüghümi Egyptmi sasü kütüqhae, eno I loghu shikighide tsüniye nono kütüqha keu küghüsü ke. 27Tighenguno julo, I no I u chhopuwo no o lachile eno o saje kotha tsükeu kümghüve tsüae eno Philistiami ngaqo, khunono ow ghaghu ghale ghilisüqe ghenguno kujove akeno, o ghümi tipaqo lakimne lo no ikhiphepe tsüvae. 28Nono aghapiqi moke ghenguno Assyria sasü kütüqhae; iyei, nono panoqo sasü kütüqhae, eno itaghi no ye aghapiqilu mphie. 29Nono küghüsü ghi kilhikishi yeghi Chaldea ghi sasü kütüqha eno tishi keghi no ye aghapiqi moe.

30“Ampeu Alhou no asheshu, o mlo ye kishita sü ani kela, kughengu akukujo küküha kütüqhaliu kümla hi kümtsü nono shivae, 31alaghila kümtsü lo nhasü keu chebo mlae, eno alapa kümtsü lo qhemghaike-a mlake. Ikemu no ye kütüqhaliu toimoe, kughengu nono asalha me mithi ke. 32Anipu asalhau, nono akimi nguno kiptimi tüsümiu sasü züke! 33Kiptimiqo no kütüqhalimi kümtsü agho tsüe, ikemu nono o lojipumi kümtsü lau agho tsüe, eno kütüqha akeu küdau ighi peniye külügho panoqo tsüke. 34Tighenguno nono kütüqha keu ye totimi kütami nguno o kütake. Khunomu o sasü kütüqhani ye aghola shimoe, ikeghi nou no asalha me tsüve, eno nou ye o tsümoe; tighenguno no ye o kütake.

35“Tighenguno, O kütüqhaliu, Ampeu tsa inilo: 36Ampeu Alhou no ishi piani, Ow ghaghu ghale kükümsü lheqhi, o lojipumi eno ow aphikümqhüpu sü-atu julhoqo gholo o phikümsa lhapheke ghenguno eno nono o nuliqo ji panoqo tsüveke ghenguno, 37julo, I no o lojipumi khunoqo sasü nono aghakiqipu shikeno, nono kimiye eno mithi chekemi kümtsü I no hekütsü nani. 38Topumi küsalhami toi I no o lau küghathabe nani, aji peleve keu ye küghatha nani, eno aji pele keu loghu ngo anhekushu o shou lepuku nani. 39I no o pesü panoqo u lo phesüve tsü nani, eno panongu no ow nhasü keu chebo tukulove tsü nani eno ow qhemghaike-aqo kuboleve tsü nani. Panongu no o phimini xaleve tsü nani, ow jukivi chiku-chilaqo ikhiluve tsü nani eno no ye aphimini pepumo no aphikümsa shive nani. 40Panongu no aqokitikhi saghi no o mjochile nani, atu pesü o veqhi nani eno panoqo zütakikihi pesü o ghekuchove nani. 41Panongu no o ki pitileve tsü nani eno topumi kutomo nhethe lono o shou küghathabe nani. Nono kütüqha chekeu I no lakhave tsü nani, eno no ghi asalha me tsü chekeu tsümove nani. 42Ikehu I no o shou no I loghu ghapiqi nani, eno I mlo kishikumo ye o launo ikhive nani. Ni ye iqüghaive nani eno amloide keu shimove nani. 43Kughengu nono o lhothe tsalaqo kümsü move, ikemu thime hi kümtsü vecheo I mlo shikighideve ke, tighenguno julo, I no o kümlaqo pesü o kütsü shou shekichile shipukuve tsü kepi Ampeu Alhou no asheshu. No ye ow aphikümqhüpu kümla kümtsü shou asalha pesü shoqabe ke kumo keshea?

44“Julo, aholetsa peitha chekemi kümtsü no ahole hipau o ghenguno peitha nani: ‘Aza toi, anga toi.’ 45No ye o za, khuu akimi ngo atianuli mithi cheni keno, li nga ke; eno no ye o tsünipulimi, khunono pano kimiqo ngo pano tianuliqo mithi chekeno tipaqo tsünipu ke. O za ye Hittimi eno o pu ye Amorimi ke. 46Eno o fo akichiu ye Samaria, khuu li ngaqo sasü o nguno ahuu küghüna acheni keno tihuke; o tsünipu ayitiu, khuu o nguno apeu küghüna acheni keno tihu ye Sodom eno li ngaqo ke. 47No ye panoqo laghi lo chechekeu ngo panow aphikümqhüpu kümla kiqi lono mla chekeu likhi kumoe; ado kitila dolo no ye o laghi kümtsü lo panoqo nguno alau shiküsapu shive ke. 48Ampeu Alhou no asheshu, I no xüake toi, o tsünipu Sodom ngo li ngaqo ye no eno o ngaqo no mla ketoi mla püamoe. 49Julo, o tsünipu Sodom kipimi ye hike: li eno li ngaqo ye aqheküza, achuqupu achili eno pofushi keu lokughuno ae, ikemu kumlhomi ngo akukuphu avehupu shi akemi kuphu tsümoke. 50Panongu ye aqheküza eno I zülo aphikümqhüpu kümla shivae. Ikehu kughou I no tipau ithulu keno panoqo ikhive ke. 51Samaria ye o xineqo tüxa qhemi mu shimphi. No ye panongu nguno aphikümqhüpu alau shivae, eno nono aphikümqhüpu mlakeqo vecheo o tsünipulimi ye amikucho toive tsüe. 52No ghi ow küthakügha puqhelo, kughengu o tsünipulimi züqhushi nono chhosüke. O xine khipaqo vecheo nono panongu nguno alau aphikümqhüpu shi mlave keno tipaqo ghenguno panongu ye o nguno alau achipiu lo anie. Ikehu no ghi kujolo eno ow küthakügha puqhelo, kughengu nono o tsünipulimi pelo amikucho toi ithulupe ke.

53“I no panoqo ngukümgha tsüchile nani, Sodom ngo li ngaqo ngukümgha eno Samaria ngo li ngaqo ngukümgha ghi athoputho tsü nani, eno I no panoqo gholono o ngukümgha ghi athoputho tsü nani, 54tishikeu lono no ye ow küthakügha xapu eno nono mlakeu kümtsü ghenguno kujove nani, tihuno panoqo lau alopiqikütsü lakhi shilu nani. 55O tsünipu Sodom ngo li ngaqo ye püzüu tholo ideighive nani, eno Samaria ngo li ngaqo ye püzüu tholo ideighive nani. 56O tsünipu Sodom ye nono o qheküza tsala lo o kichi lono küghakiche tsa shi jekuche, 57ti ye ow küsakügha lhapheve tsümphi züu ke kumo? Syria ngaqo eno li homxape akeqo kümtsü zülo eno Philistiami ngaqo ngo hokümxa lo akemi o jukünatha chekemi kümtsü zülo itehi no ye küthaküghapu shivae. 58No ye o salha ngo ow aphikümqhüpu ghenguno akipimi xapu ani ipi Ampeu no asheshu.

AMPEUw Pülhapuju Puloshoqhi

59“Kughengu Ampeu Alhou no ishi piani: Nono mlave ketoi I no o lau shinani, no ye puloshoqhi kubove keu vecheo küthakügha shivae, 60ikeghi o lhothe tsala lo toi Ni ye Iw puloshoqhi o sasü shikeu kümsülu nani, eno I no o ghenguno shekhaha puloshoqhi lakhi shi nani. 61Kughou nono o tsünipulimi, akichiu eno ayitiu pama gha ikhiluni keno, tileno nono o laghiqo kümsülu no kujove nani. I no panoqo pesü angaqo toi o tsüve nani, ikemu ti ye o sasü puloshoqhi shipüa keu ghenguno kumoe. 62I no o sasü Iw puloshoqhi shi nani, eno Ni ye Ampeu kepi nono ithi nani, 63tishikeu lono no ye kümsülu eno kujove nani, eno kughou nono mlave keqo kümtsü ghenguno I no o qhukimtheni keno o kukujo vecheo no ye itaghi khilemu o kichi xükho move nani.”

Currently Selected:

EZEKIEL 16: SUMRVBSI

Highlight

Copy