IPEKULU 4

Akumto Michipu Moses tsü

1Tile Moses no khochile, “Ikemu julo, panongu ye I pülümo nani momu I tsa ini tsümo nani, kughengu panongu no pi nani, ‘Ampeu ye o lau ipeghi püamoe.’” 2Ampeu no pa vilo pi, “O u lo kiu peani kea?” Pa no pi, “Aküsü lakhie.” 3Pa no pi, “Ayeghi lo veqhiju lo.” Ikehu pa no ayeghi lo ti veqhi keloye apighi ilhouve, eno Moses ye tileno pove. 4Ikemu Ampeu no Moses vilo pi, “o u chhope ashomhi lono tsüqü luvelo”—ikehu pa no pa u chho puwo ti küghaluve, ikelo ti ye pa u lo aküsü ilhouve— 5“tishianguno panongu no Ampeu, pano puasü Lhou, Abraham Lhou, Isaac Lhou, eno Jacob Lhou no o lau ipeghi kepi pülü nani.” 6Itaghi, Ampeu no pa vilo pi, “Ow hebephi alou o u chuxusülo.” Pa no pa u chuxusü, eno kughou ti ikhiphe keno, julo, pa u ye apügha no mürasü toive aghi. 7Tileno Alhou no pi, “Ow hebephi alou o u chuxusü kithelo.” Kughou pa no ti ikhiphe keno, julo, ti ye pa phiashi kütau toi athoputho luve. 8Alhou no pi, “Tsala panongu no o pülümo, momu amchipu atüghüu pülümo aye, panongu ye akiniu pülüve luvie. 9Tsala panongu no amchipu küma pülümo momu o tsa ini tsümo aye, no ye Nile lono azü kitila shophepe qhaike yeghi lo leqhi lo, nono Nile lono shophe keu zü ye qhaike yeghi lo aji ilhouve nani.”

10Ikemu Moses no Ampeu vilo pi, “O I Mpeu, ni ye atsa pikithimi kumoe, wovekeu lo shi aghina Nono o qeu pütsave kethiu namu, ni ye atsapi asheshi eno pikukho chenie.” 11Tile Ampeu no pa vilo pi, “Khuu no timi kichi mlatsü kea? Khuu no milakhi pelo atsa pimlavepe, akini ipovepe, ithulupe momu anhethi ichevepe cheni kea? Ti ye Ni, Ampeu noke kumo keshea? 12Tighenguno itehi wulo, eno I no o gholo shino nono kiu pikepu keno o shika nanie.” 13Ikemu pa no pi, “O I Mpeu, kimiyeno kütami khuana puwuve lo.” 14Tileno Ampeu xukighide Moses shou ikughive eno Pa no pi, “Levimi, o mu Aaron anike kumo? I no ithi anike pa ye akivishi atsa picheni. Julo, pa ye o sasü kushoni ye chenie, eno kughou pa no no ithuluni keno, pa mlo lono alovi nani. 15Nono pa pütsa no pa kichi lo atsa sütsülo, I no o gholo eno pa gholo anani eno kiu shikepu keno I no nokujo shika nani. 16Pa no o ghenguno timi pütsa nani, pa no o kichi shi nani, eno pa zülo no ye Alhou toi nani. 17O u lo aküsü hipau pelu lo, hipau vecheo nono amchipuqo mla nani.”

Moses no Egypt lo Ideighi

18Moses no pa ngu Jethro lau idewo no pa vilo pi, “Kimiyeno I pelo Egypt lo idewo no I thiküzümi xüaphi kemo keno ithi pelo.” Jethro no Moses vilo pi, “Aloino wolo.” 19Eno Ampeu no Midian lono Moses vilo pi, “Egypt lo idewolo, kughengu timi o küxü phuche keqo ye thikhavae.” 20Ikehu Moses no pa nipu eno pa nuli saluve no khurgha shou pukuve, eno Egypt yeghi lo idewove. Eno Moses no pa u lo Alhou küsü peluve.

21 Ampeu no Moses vilo pi, “Kughou nono Egypt lo idewo keno, amchipu kümla I no o u lo sütsü keu kümtsü Pharaoh zülo shikepu shi jukuto lo. Ikemu I no pa mlo shikümka tsü nani, tishikeu lono pa no timiqo puwumo nani. 22Tithiu nono Pharaoh vilo pilo, ‘Ampeu no ishi piani, Israel ye I nu anoghiu ke, 23eno I no o vilo pi ani, “I nu puwuvelo tishianguno pa pelo I qe penie.” Tsala nono pa puwumo aye, julo, I no o nu anoghiu pithive tsüni.’”

24Ala lo akungo-a lakhi lo, Ampeu no pa sasü kusholu eno pa pithiveni ye shive. 25Tileno Zipporah no atu kütsügha lakhi pesü pa nu phighüyiko ghave tsüno tipau pesü Moses pukhu ditsü eno pi, “Mtsüqheino no ye Iw ajilo kiyighi külapuu ke!” 26Ikehu Pa no pa pithi move. Aphighüyiko kügha ghenguno tileno li no, “Ajilo kiyighi külapuu” ipie.

27Tithiu Ampeu no Aaron vilo pi, “Moses sasü kusholu kepu shi yenguyike-a lo wulo.” Ikehu pa no wuno Alhouw naghuto lono pa sholu eno pa mümae. 28Ampeu no Moses pelo atsa pi penike puwu akeu eno pa pelo amchipu mla penike azah tsükeu kümtsü pa no Aaron vilo pive. 29Tithiu Moses ngo Aaron pama no wuno Israel lo layemi kümtsü hekütsü kumqoe. 30Ampeu no Moses vilo pikeqo tsa kümtsü Aaron no pi eno timiqo nhethe lono amchipuqo shie. 31Eno timiqo no pülüve; kughou panongu no Ampeu no Israelmi xuju ighivae eno Pa no panoqo ghime ithuluvae pi chilu keno, panongu no pano kütsü pishiqho luve no mllae.

Currently Selected:

IPEKULU 4: SUMRVBSI

Highlight

Copy