IPEKULU 3

Asüminipho Kipti

1Moses ye Midian lo achineu pa ngu Jethro mbeloji khekuto ae, eno pa no yenguyike-a kulolau ambeloji sasü wuno Alhouw naghuto Horeb lo ighi. 2Eno Ampeuw kungumi no asüminipho mta lono ami mili lakhi shi pa lau ipeghi. Pa no ithulu eno julo, asüminipho ye iqü aghi, ikemu tipau ye piti pühave moe. 3Moses no kümsü, “Kushiye asüminipho ye pitimo no ani keno I no tsüghüwo akümzapu kije hipau junie.” 4Kughou pa no juniye tsüghü ighikeu Ampeu no ithulu keno, Alhou no asüminipho lono pa ku, “Moses, Moses!” Eno pa no pi, “Ni hile ani.” 5Tile Pa no pi, “Kupunu ighi kevilo; o pukhukuqho xavelo, kughengu nono khile puthugho ani keno a-a ti ye akimthe chhigha ke.” 6Eno Pa no pi, “Ni ye o pu Lhou, Abraham Lhou, Isaac Lhou eno Jacob Lhou ke.” Moses no pa gi küsüve, kughengu pa ye Alhou junike msave.

7Tileno Ampeu no pi, “I no mtsüqheino Iw timi khunoqo Egypt lo ani keno, pano ghime ithuluvae eno hekiqhimi ghenguno panongu no ighamku akeu chiluvae. I no panow shiluküsaqo ithivae, 8eno Egyptmi u lono panoqo xaphelu no tipau yeghi lono panongu saipe akivi eno ililaike yeghi, akhingozü ngo akichhizü qowu akeu yeghi, Canaanmi, Hittimi, Amorimi, Perizimi, Hivimi eno Jebusimiqo-a lo qhiniye iqighivae. 9Ikehu itehi julo, Israelmi ghügha I lau ighivae, eno aghime khipau pesü Egyptmi no panoqo qaqhi ani keno tighi I no ithuluvae. 10Ighilo, I no Pharaoh lau o puwuni, tishino o pelo Iw timi, Israel nuliqo, Egypt lono saipeghi peni.” 11Ikemu Moses no Alhou vilo pi, “Ni ye khuue pi Pharaoh lau wuno Israel nuliqo Egypt lono saipeghi luni kea?” 12Pa no pi, “Ikemu I no o gholo anani, eno I no o puwu akeu shi hi no o ghenguno amchipu shi nani: kughou nono timiqo Egypt lono saipeghini keno, no ye naghuto hipau lono Alhou qe nani.”

13Tile Moses no Alhou vilo pi, “Tsala I no Israelmi lau ighi no panoqo vilo, ‘Nongu papu Lhou no nongu lau I puwu ani,’ ipi aye, eno panongu no I vilo, ‘Pa je ye khuu kea?’ ipi ighiju aye, ni ye panoqo vilo kiu pini kea?” 14Alhou no Moses vilo pi, “NI YE NI KE.” Eno Pa no pi, “Israelmi vilo hi pilo, ‘NI huno nongu lau I puwu anie.’” 15Alhou no Moses vilo highi pi, “Israelmi vilo hi pilo, ‘Ampeu, nongu puasü Lhou, Abraham Lhou, Isaac Lhou, eno Jacob Lhou no nongu lau I puwu anie.’ Alholo hi no I je ke, ikehu tiqheli kupuju lo hitoi I kümsülu chelo. 16Wulo eno Israel lo layemi hekütsü kumqo no panoqo vilo pilo, ‘Ampeu, nongu puasüqo Lhou, Abraham Lhou, Isaac Lhou eno Jacob Lhou no I lau ipeghi no pi, “Egyptmi no nongu lau kiu shi keno I no nongu chhejuvae, 17eno I no tushoqhi shi anike Egyptmi no ghimeqhi akeu lono I no nongu saipe Canaanmi, Hittimi, Amorimi, Perizimi, Hivimi, eno Jebusimi yeghi, akichhizü ngo akhingozü qowu akeu lo qhinani.”’ 18Panongu no o tsa ini nani, no eno Israel lo layemi no Egypt kükau lau wuno pa vilo pilo, ‘Ampeu, Hebrewmi Lhou no ningu sasü kusho luvae; itehi ye kimiyeno ningu pelo yenguyike-a lo atsala küthü ghüzü shiwu pelo, tishino ningu pelo Ampeu ni Lhou lau aghakishi tsülu pelo.’ 19Ikemu I no ithi anike akughushu u no tsüikhomo pa kite moke kutolo Egypt kükau ye nongu puwumo nanie. 20Ikehu I no I u sükho no akümzapu kümla kümtsü shipe Egypt ghadaqhi nani; tithiu no pa no nongu puwu nani. 21Eno I no timi hipaqo Egyptmi nhethe lo kimiyeqhiyi ithulupe nani; kughou nongu no wuni keno, nongu ye au kümsa wumo nani, 22ikemu totimi lakhikhi no li kisüghüu, eno totimi khukhumu li kilo ngo akeu vilo ghükayi, ameshoyi chi eno aphimini khulu nani. Nongu no tipaqo pesü no tianuliqo pipe nani. Titoi nongu no Egyptmi xüle puwuve nani.”

Currently Selected:

IPEKULU 3: SUMRVBSI

Highlight

Copy