IPEKULU 2

Moses Punu

1Tipa ghuloki lo Levi lagha lo timi lakhi no wuno Levimi totimi lakhi pa nipu shiniye luve. 2Totimi huno mishive no anu lakhi punu, eno kughou pa ye anu kivi shi aghikeu li no ithulu keno, li no aqhi küthü pa peküsüve. 3Kughou li no pa peküsü khamlave keno, li no aqhe pesü ashoghi lakhi pa ghenguno gho eno tsübuta ngo ata pesü tipau mekhave. Li no anu tile khape süve no aghoki mkülo amtüli lo qhive. 4Eno pa lau kiu shive nani keno ithi peniye pafo no putou puthugho ae. 5Ikelo Pharaoh nonga no azükuchhu nike aghoki lo iloghi, eno li qelimi no aghoki mkülo cheiqho-iqi ae. Li no amtüli lo ashoghi aghikeu ithulu no li qelimi hapuwu, eno li no tipau ikhiluve. 6Kughou li no ti lhaphe keno, anga ithulu, eno julo, anga kughunu huye qa aghi. Li no pa kimiyeve no pi, “Hi ye Hebrewmi tianuli lakhie.” 7Tileno pafo no Pharaoh nonga vilo pi, “I no wuno Hebrewmi totimi lakhi o ghenguno anga kujuu shi penike kusaghi tsüni keshea?” 8Pharaoh nonga no li vilo pi, “Wulo.” Ikehu pafo no wuno anga paza kusaghi. 9Pharaoh nonga no li vilo pi, “Anga hipau khape wuve lo eno I ghenguno pa tuchohiju lo, eno I no ajume o tsünie.” Ikehu totimi huno anu khape wuve no pa tucho hijue. 10Kughou anu huno kichimi shi ipeghive keno, li no Pharaoh nonga lau pa saghi, eno pa ye li nu shive. Li no pa je Moses kuve tsü, “Kughengu,” li no pi, “I no azü lono pa sünhephe luke.”

Moses ye Midian lo Pove

11Kughou Moses no kichimi shi thuwuve keno, ghulo lakhi pa no paw timi lau wuno panoqo ghime ithulu, eno Egyptmi lakhi no paw timi Hebrewmi ghaqhi aghikeu pa no ithulu. 12Pa no hula-hila juno khumu ithulumo kehu Egyptmi hu heqhi pithive eno asaye lo pa jonhave. 13Tishiwo thoghiu kughou pa no ashou ipeghi keno, julo, Hebrewmi kini kichighi aghi. Eno pa no akumou shi akeu vilo pi, “Kushiye o küsau shou hepuku ani kea?” 14Pa no khochile, “Khuu no o pelo ni shou kükapuu eno xaküthau shipe kea? Nono Egyptmi heqhive ketoi ni ghi heqhive niye ani keshea?” Tileno Moses ye msave no ishi kümsüve, “Mtsüqheino hi ye ithi khavae.” 15Kughou Pharaoh no hipau vehu chiluve keno, pa no Moses pithiveni ye phuthuve. Ikemu Moses no Pharaoh launo pove no Midian yeghi lo ngove. Eno pa ye azükikhe phivilo iqa ae.

16Midian lo achineu ye anga totimi tsüni ache, eno panongu no ighi no azü shophepe panoqo papu tsü-aqu piye niye atughuko shepichhi ae. 17Ambekhemi no ighi no panoqo hapupove, ikemu Moses no ithu no panongu xalu, eno pano tsü-aqu azü piyetsü. 18Kughou panongu no panoqo papu Reuel#2:18 Hilehi ngo Aki 10:29 lono Reuel ipi ani kethono kütau loye Jethro. kilo ighi keno, pa no pi, “Kishino nongu ye ishi itheno aki lo ighive akea?” 19Panongu no pi, “Egyptmi lakhi no ambekhemi u lono ningu xalu eno azü ghi ni ghenguno shophe tsüno atsü-aqu azü piyetsüe.” 20Pa no pa ngaqo vilo pi, “Imaye pa ye khile ani kea? Kushiye nongu ye timi hu qhive kea? Pa kulo, eno pa pelo asho chu pelo.” 21Eno Moses ye timi hu gholo ngonike pulove, eno pa no pa nga Zipporah pesü Moses nipu shive tsü. 22Li no pa lau anu lakhi punu tsü, eno pa no pa je pesü Gershom kuvetsü, kughengu pa no pi, “Ni ye inami yeghi lo kachenami lakhi ke.”

Alhou no Israelmi Mloghuju Chilu

23Tipa ghuloki lo Egypt kükau ye thive, eno Israelmi ye pano qüaxe ghenguno amloghuju shi kuphu tsü peniye ighamku che. Aqüaxe lono xaphetsü penike ighamku chekeu iku Alhou tove. 24Alhou no panoqo mloghuju chilu, eno Alhou no Abraham, Isaac, eno Jacob sasü puloshoqhi shikeu kümsüchilelu. 25Alhou no Israelmi ithulu—eno Alhou no ithive.

Currently Selected:

IPEKULU 2: SUMRVBSI

Highlight

Copy