DANIEL 4

Nebuchadnezzar no Alhou Sheqhe

1Akükau Nebuchadnezzar no ashiaye, shiye eno atsa jeli ayeghi lo akeqo kümtsü lau: aloino keu no küghüsü nongu gholo apeniu! 2Amchipu eno akümzapu khikhi Akughushu Lhou no I ghenguno mla keno I mlo kiqishi hipau piye niye ani.

3Paw amchipuqo ye kishi kije,

Paw akümzapuqo ye kishi akughushu kelae!

Pa kükaqha ye lhokta kükaqha,

eno Pa yekipeqha ye tiqheli no tiqheli kutolo acheni.

Nebuchadnezzar Samo Akiniu

4Ni, Nebuchadnezzar, ye I kilo alokughuno shia eno I kükaki lo kinikülü shi ae. 5I no asamo lakhi pumo ke tino I pelo msavepe. I no alüpa lo ihozü akelo kümsükuju kükümsü eno kungunhetsü no I shithüghüive. 6Tighenguno I no Babylon lo alokütsümi kümtsü I zülo saighi peniye xaküthaza tsü, tishino panongu pelo asamo hekupho I vilo pitsü peniye shike. 7Tithiu küdüumi, shiküghüzü kemi, Chaldeami, eno yepu-yesü kighithimi ighi, eno I no asamo panoqo vilo pive, ikemu panongu ye tipau hekupho I pelo ithilupe move. 8Ashekha lo Daniel no I zülo ighi—pa je ye I lhou je kimihi shi Belteshazzar ipi kuvetsü, eno pa gholo akimthe lhouqo ghungu ani—eno I no asamo pa vilo pi, 9“O Belteshazzar, küdüumi atou, kughengu I no ithi anike akimthe lhouqo ghungu no o lolo ani eno tuqhou küsü püakeu kiumu o ghengu ye kushokütsü kumoe, I samo kungunhetsü I no ithulu keu eno tipaqow hekupho I vilo pilo. 10Alüpa lo I no ihozü akelo kungunhetsü ye hike: julo, ayeghiqha mta lo asübo lakhi I no ithulu, eno ti ye ighono qhemghai. 11Asübo huye thuwuve no akumto shive, eno tipau akemtsü no atsütsü tove, tipau ye ayeghi shekhau kutolo ithulue. 12Tipau nipaqo ye jukivi eno axathi ye kupukuno, eno kümtsü ghenguno achuqupu ae. Aghasa lo tüghashiqo no tipau lo akicheqho ithulu, kunguu aghauqo no alokaqo lo ngo, eno lhoxü kümtsü tipau lono chulue.

13“I no alüpa lo ihozü akelo kungunhetsü ithulu, julo, hikujuu lakhi akimtheu atsütsü lono iqighi. 14Pa no mghachhoi asheshu no hitoi pi: ‘Asübo hu loqhive lo eno tipau lokaqo xidive lo, anipa kixive eno axathi küzaleve lo. Tipau qholo tüghashi eno alokaqo lo aghauqo pelo pokhave pelo. 15Ikemu asüzüngü kuhu ye ayeghi lo qhivelo, ayi eno alazayi kighi no aluza lo atsüni mini ipeghi akeqo mta lo tsüghape qhivelo. Atsütsü lo tsüzü no pa pütsü pelo. Pa ye tüghashiqo sasü ayeghi lo atsüni gholo xü pelo. 16Pa kükümsü ye timi kükümsü kumono kilive pelo, tüghashi kükümsü pa tsüvelo; eno kihiküthado#4:16 Momu ampe tsüni no pa hecheve pelo. 17Aghime xakütha tsa ye hikujuu yezah lono ke, xakütha ye akimtheu tsa kiqi lono ke, hi kutolo xü akemi no ithi peniye ke, ti ye Shishe Akiqheu huno timi kükaqha shou ayepe acheni, tipau pesü khukhumu Pa no tsüni keu tsü cheni, eno tipau lo timi aqhoumi dolo aqhou süsüve cheni.’ 18Asamo hipau, ni, Akükau Nebuchadnezzar no ithulue. Eno, O Belteshazzar, nono hekupho I vilo pilo, kughengu I kükaqha lo alokütsümiqo ye hekupho I pelo ithilu apemovae, ikemu no ye shilu nani, kughengu alhouqo ghungu no o lolo anie.”

Daniel no Asamo Akiniu Hepho

19Tishino Daniel, khuu je Belteshazzar keno, pa ye ado hami aghüthisüve, eno pa kükümsü no pa shithüghüive. Akükau no pi, “Belteshazzar, asamo eno tipau hekupho no o shithüghüi pe kevilo.” Belteshazzar no khochile no pi, “I mpeu, asamo hu ye khunono o mithi cheni keno panoqo ghenguno shi aghive peniu, eno tipau hekupho no o ghümiqo ghenguno shi aghive peniu! 20Asübo thuiku eno akumto shive keu, tipau akemtsü no atsütsü toni keshi, ayeghi shekha kutolo ghi ithulu keu, 21tipa nipaqo no juvi eno axathi kupukuno shi akeu, kümtsü ghenguno achuqupu akeu, aghalo tüghashiqo no akicheqho ithulu keu, eno alokaqo lo aghauqo no ngolu keu— 22ti huye no ke, O akükau, no ye thuwuvae eno akumto shivae. O kughushu ye thuwuvae eno atsütsü tovae, eno o yekipeqha ye ayeghi shekha kuto tovae. 23Eno hikujuu akimtheu atsütsü lono iqighi no, ‘Tipau sübo loqhive no kütsave lo, ayi eno alazayi kighi no aluza lo atsüni mini ipeghi akeqo mta lo tsüghape qhivelo. Atsütsü lo tsüzü no pa pütsü pelo, eno kihiküthado tsüni no pa heche moke kutolo pa pelo tüghashiqo sasü ayeghi lo atsüni gholo xü pelo,’ ipi asheshu keu akükau no chilu kehu, 24hekupho hu ye hike, O akükau: Hi ye Shishe Akiqheuw xaküthaza lakhi I mpeu akükau lau ighivae, 25ike no ye timiqo gholono hapupove nani, eno o kungo-a ye aghasa lo tüghashiqo gholo shive nani. No ye amshitsü lakhi toi atsüni chuuve nani, atsütsü lo tsüzü no o pütsü nani, eno Shishe Akiqheu no timi kükaqha lo ayepe cheni eno tipau pesü khukhumu Pa no pulo keu tsüve chenie pi nono ithi moke kutolo kihiküthado#4:25 Momu ampe tsüni no o hecheve nani. 26Asübo züngü kuhu ye qhivelo pi azah tsü keu ye, kughou kungugha no ayepe chenie pi nono ithiveni keno o kükaqha ye o tsüchileve nani. 27Ikehu, O akükau, I kükümsü o lau ikhikulupu shitsülo: achipiu mikucho pape keu vecheo o xine phevelo, eno aghime no qhasüpe akeqo lau kikimiye pephe keu vecheo ow küsaküghaqo phevelo, tishiaye ow küakini ye pepushu luvike.”

Nebuchadnezzarw Küthakügha

28Hipaqo kümtsü akükau Nebuchadnezzar shou ikughive. 29Aqhi chighikini thiu, pa no Babylon lo kükaki kunguu amole lo ala cheche, 30tile akükau no pi, “Babylon, khikhi I kughushu küka vecheo I no kükami kungo-a eno I kükanguagha juküvü ghenguno shiqhe keno, hi ye kije kekumo keshea?” 31Atsa hu no akükau kichi lo aphi lono, atsütsü lono asütsa lakhi ighive, “O akükau Nebuchadnezzar, o lau hipau piqhi ani: kükaqha ye o launo chevae, 32eno no ye timiqo dolono hasasü wuve nani, o kungo-a ye aghasa lo tüghashiqo gholo shive nani. No ye amshitsü lakhi toi atsüni mzachupe nani, eno Shishe Akiqheu no timi kükaqha shou ayepe cheni eno tipau pesü khukhumu Pa no pulo keu tsüve cheni ipi ithi moke kutolo kihiküthado tsüni no o hecheve nani.” 33Paikhavi no Nebuchadnezzar lau atsa shikupuve. Pa ye timiqo gholono hasasü wuve no amshitsü toi atsüni mzachuuve, pa sa no alhuqu mhi toi thuwuve eno pa u mütsü no aghau pukhu mütsü toi thuwu moke kutolo pa phimpi ye atsütsü lo tsüzü no pütsü.

Nebuchadnezzar pesü Athoputho tsü

34Ado ashekha shive kethiu, ni, Nebuchadnezzar no atsütsü lo I nhethi tsüpuku, eno I kükümsü ye I lau idechile ighive, I no Shishe Akiqheu, khuu pülhapuju xü acheni keno, Pa sheqhe eno agigihu tsü,

kughengu Pa yekipeqha ye pülhapuju yekipeqha ke,

eno Pa kükaqha ye tiqheli no tiqheli kutolo acheni;

35ayeghi lo küxümi ye kiumu kumo keu shi kihi acheni,

Pa no Pa pulou kiqi lono kungugha lo aqokitikhi

gholo eno ayeghi lo küxümi gholo mla cheni;

eno khumu Pa u lakhave mla momu Pa vilo, “No ye kiu

shive akea? ipive mlae.”

36I kükümsü I lau idechile ighive kemtsa I kükaqha juküvü ghenguno I kükanguagha ngo ajekipi I lau idechile ighive. I qholo mijekütsümi ngo ampemi no I phuighive no I kükaqha lo I süqheve, eno itaghi ajekipi alau I lau küphatsüe. 37Itehi ni, Nebuchadnezzar no kungugha Kükau sheqhe eno agigihu tsü ani, kughengu Pa kümla kümtsü kuchou eno Pa laghi ye achipi; khunono no aqheküza lono checheni keno Pa no kuchunive cheni.

Currently Selected:

DANIEL 4: SUMRVBSI

Highlight

Copy