DANIEL 3

Nebuchadnezzarw Ameshoyi Julho

1Akükau Nebuchadnezzar no ameshoyi julho lakhi mla, tipau ye akiqhelau auxakuchho muku tsüni eno akijelau no auxakuchho küthü. Pa no tipau pesü Babylon lo Dura qayeghi lo ghope qhi. 2Tile akükau Nebuchadnezzar no timi puwu no kükapumi, pangtong, angh, mijekütsümi, akini jukükütsümi, xaküthami, ayezah kipemi eno aghakhu lo hiyampemi kümtsü akükau Nebuchadnezzar no ajulho shiqhe keu khakiqhi lo ighi peniye kukütsü. 3Tithiu kükapumi, pangtong, angh, mijekütsümi, akini jukükütsümi, xaküthami, ayezah kipemi eno aghakhu lo hiyampemi kümtsü akükau Nebuchadnezzar no ajulho shiqhe keu khakiqhi ghenguno hekütsü. Eno akükau Nebuchadnezzar no ajulho ghope qhikeu zülo panongu no puthugho. 4Chhochhou no mghachhoi sheshu, “Azah nongu tsü ani, O ashiaye, shiye, eno atsa jeliqo, 5ti ye kughou nongu no akibo, fulili, aheo, akighilebo, lilala eno alebo ghügha jeli kümtsü chiluni keno, nongu ye pishiqho luveni eno ameshoyi julho akükau no ghope qhikeu mllani. 6Eno khukhumu itsaqi mllamo keu ye tipamtsa kuchughei akeu miphoki lo vesüveni.” 7Tighenguno akibo, fulili, aheo, akighilebo, lilala eno alebo ghügha jeli kümtsü chilu kemtsa ashiaye, shiye eno atsa jeli kümtsü no pishiqho luve no akükau Nebuchadnezzar no ameshoyi julho ghope qhikeu mllae.

Kuchughei akeu Miphoki

8Tighenguno tipa ghuloki lo Chaldeami khami ighi no Jewmi pipütha ghi nguku. 9Panongu no akükau Nebuchadnezzar vilo asheshu, “O akükau, axüshu alo! 10O akükau, nono timi jeli kümtsü vilo khunono akibo, fulili, aheo, akighilebo, lilala eno alebo ghügha jeliqo chiluni keno itsaqi no ameshoyi julho mllani keu yezah lakhi mlavae. 11Eno khukhumu itsaqi no mllamo keu ye kuchughei keu miphoki lo vesüveni keu shie. 12Jewmi khami nono Babylon ghakhu kümlapu lo süküsü shikeqo ani: Shadrach, Meshach, eno Abednego. O akükau, timi hipaqo ye o lau amlo tsüqhiyi mono ani; panongu ye o lhouqo qemono ani momu ameshoyi julho nono ghope qhikeu mlla mono anie.”

13Tileno Nebuchadnezzar no axukighide lono Shadrach, Meshach, eno Abednego noqo saighi peniye azah tsü. Ikehu panongu no akükau zülo timi hipaqo saighi. 14Nebuchadnezzar no panoqo vilo pi, “O Shadrach, Meshach, eno Abednego, nongu ye I lhouqo qemo momu ameshoyi julho I no ghope qhikeu mlla mono ani pikeu ye kuchou keshea? 15Itehi nongu no kutope aghi aye, kughou nongu no akibo, fulili, aheo, akighilebo, lilala eno alebo ghügha jeliqo chiluni keno itsaqi no ajulho I no ghope qhikeu mlla lo, tishilu aye alo eno akivie. Ikemu nongu no mllamo aye, nongu ye kuchughei keu miphoki lo itehi vesüveni. Eno khuno lhou no I u lono nongu xaphe luni kea?”

16Shadrach, Meshach, eno Abednego noqo no khochile akükau vilo pi, “O Nebuchadnezzar, hipau vehu lo ningu ye o khochileni keu avehupu kühae. 17Tsala hipau shikepu shi aghi aye, ni Lhou khuu nino qe acheni keno Pa ye kuchughei keu miphoki lono ningu xaphelu nani eno o u lono ningu xaphe luve nani, O akükau. 18Ikemu tishi movemu, o pelo hi ithi penishi ani, O akükau, ningu ye o lhouqo qemo nani momu ameshoyi julho nono ghope qhikeu mllamo nani.”

19Tithiu Nebuchadnezzar ye axuideve, eno Shadrach, Meshach, ngo Abednego noqo launo pa gi kilive. Pa no kuchughei keu miphoki thosülo nguno ghuthu tsüni no alau küiqü penike azah tsüve. 20Eno paw ghüshimi dolo akumtomi pelo Shadrach, Meshach, eno Abednego tsüghave no panoqo pesü kuchughei keu miphoki lo vesüve penike azah tsüve. 21Tishino pano küthü ye hebephi, akütsükuqho, amini eno kütau pepu akeqo gholono tsüghave no kuchughei keu miphoki lo vesüve. 22Akükau zakütsü ye ighono süi-aive eno kuchughei keu miphoki ye alau iqü akehu, ami mili iqü ipeghi keu huno khunoqo no Shadrach, Meshach eno Abednego noqo küghape akeno panoqo pitiqhive. 23Eno timi hipaqo, Shadrach, Meshach, ngo Abednego noqo ye tsüghape kuchughei keu miphoki lo vesüve.

24Tithiu akükau ye akichiqhive no mtazü puthughove. Pa qholo kijemiqo vilo pa no pi, “Ningu ye timi küthü tsüghave no ami lo vesüve ke kumo?” Panongu no akükau khochile, “Kuchoue, O akükau.” 25Pa no pi, “Ikemu timi bidi tsügha mono ami mta lo ala checheni, panongu ye piti püamo; eno timi abidiu koghe ye alhou nu lakhi toi ni ye ithulu anie.”

26Tithiu Nebuchadnezzar no kuchughei keu miphoki hukikha kupunu ighi; pa no asheshu, “Shadrach, Meshach, eno Abednego, Shishe Akiqheu Lhou qemiqo, ipeghive lo eno hilau ighilo!” Tileno Shadrach, Meshach, eno Abednego noqo no ami lono ipeghive. 27Kükapumi, pangtong, angh, eno akükau mijekütsümi no kümtsa hekütsü no ami küka ye timi hipaqo phiau lo kiumu shimlave keu ithulue. Panoqo kütsü lo asa mu piti püaghimo, aphimini mu shipüsa püaghimo, eno ami kipti xomu panoqo shou ikughi moe. 28Nebuchadnezzar no pi, “Shadrach, Meshach, eno Abednego noqo Lhou sheqhelo, Pa no Paw kungumi puwu no Pa qemi, Pa pülübe chekemi xaphelue, panongu no pano Lhou likhi kumo aye kütami lhou qe eno mlla moniye akükau yezah qhive no pano phimpi ghi pephe tsüve ke. 29Tighenguno I no xaküthaza lakhi mla ani: ashiaye, shiye, momu atsa jeli khunono Shadrach, Meshach, eno Abednego noqo Lhou lachile keu tsa pini keno, timi tipau phiau sütha pinyive tsüni, eno pano kiqo kütsave tsüni, kughengu hitoi xaluni keu lhou kütau ye kühae.” 30Tishino akükau no Babylon ghakhu lo Shadrach, Meshach, eno Abednego noqo pesü chukhe pukuve.

Currently Selected:

DANIEL 3: SUMRVBSI

Highlight

Copy