DANIEL 1

Babylon lo Daniel Sawuve

1Judah kükau Jehoiakim yepe mpe aküthüu lo, Babylon kükau Nebuchadnezzar no Jerusalem lo ighi no ti khasüluve. 2Ampeu no Judah kükau Jehoiakim eno pa gholono Alhou kilo tinhemgha hami Nebuchadnezzar u lo phesüve tsü. Pa no Shinar yeghi lo pa lhou kilo tipaqo süghi eno pa lhou kinibo lo qhive. 3Tithiu akükau no Israelmi aküka lagha eno aküxü kivimi bolono ighi kemi khami saighi peniye paw shokomi atou Ashpenaz azah tsüve, 4lhothemi tukutiye küha kemi, aju-aqoghe kivimi, phuithai alokütsümi, akighithi küami, akighithi vethakulumi, akükau kighiki lo puthugho luni kemi saghipe no Chaldeami tsaiko eno atsa panoqo shika peniye shie. 5Akükau no tsalakipe chuqupu akükau no chuche keu, eno atsaiji khipau pa no sho cheni keno tipaqo pesü panongu saje kuto tsüe. Panongu ye ampe küthü ghenguno phi-yelu peniye shi, eno ti kishekhave kethiu panongu ye akükau zülo puthugho peniye shie. 6Panongu dolo Judah shiayemi Daniel, Hananiah, Mishael, eno Azariah noqo ae. 7Shokomi atou no panoqo je kuvetsü: Daniel no Belteshazzar kuvetsü, Hananiah no Shadrach kuvetsü, Mishael no Meshach kuvetsü, eno Azariah no Abednego kuvetsü.

Danielw Pükhükulu

8Ikemu Daniel ye akükau chuqupu momu pa no shoche keu ji pelo pa shipixi pemo nike xathave. Tighenguno pa no shokomi atou vilo pa ampi shipixi monike pulotsü peniye iniju. 9Alhou no shokomi atou pelo Daniel ikhilu eno kimiyelu pe, 10shokomi atou no Daniel vilo pi, “I mpeu akükau, khuu o chuqu-kusho kutotsü ani keno ni ye pa msae; kughengu, kushiye pa pelo lhothemi o qhejoqo nguno alhoksau shi no ithulu apeni kea? Tishi aye no ye I küghape akükau zülo akümsapu shivetsü anie.” 11Tithiu shokomi atou no jukükütsüu khuu pesü Daniel, Hananiah, Mishael, eno Azariah hiju peniye pichebe püa keno, Daniel no timi tipau vilo pi, 12“Atsala chighi ghenguno o qemiqo chhejulo; ayetsüni chukepu eno azü yekepu ningu tsülo. 13Tithiuno lhothemi khunoqo akükau chuqupu chu ani keno panongu eno ningu koghe nono chhejulo, eno nono ithulu keu kiqi lono o qemiqo peithalo.” 14Ikehu pa no hipau vehulo panoqo tsa initsü, eno atsala chighi panoqo chheju. 15Atsala chighi thiu panongu ye lhothemi khunoqo akükau chuqupu chu akeno panoqo nguno aju akiviu shi eno ashi pubeyi ithulue. 16Tighenguno jukükütsüu no panoqo chuqupu eno aji ikhipe wuve eno ayetsüni panongu tsü. 17Lhothemi pano bidi ghengu ye, tsaiko eno alokütsü kümtsü lo ithiküphalu keu ngo asüqe kighithi Alhou no panoqo tsüe, eno Daniel ye kungunhetsü ngo asamo kümtsü lo vethakulu ae. 18Ado kishekhave kethiu, kughou akükau no panongu sailoghi peniye azah tsü keno, shokomi atou no Nebuchadnezzar zülo panoqo saighi. 19Akükau no panoqo pütsa, ikemu panoqo dolo khumu Daniel, Hananiah, Mishael, eno Azariah toi ithulu moe. Tighenguno panongu no akükau kümla lo ilove. 20Eno akükau no panoqo vilo alokütsü eno vethakulu vehu ighiju ke kümtsü lo panoqou no kükaqha lo küdüumi eno shiküghüzü chekeqo nguno ghuthu chighi akiviu shi pa no ithulu. 21Daniel ye akükau Cyrus yepe mpe atüghüu kutolo tilau ache.

Currently Selected:

DANIEL 1: SUMRVBSI

Highlight

Copy