AMOS 9
9
Israel Kütsakungo
1 Ampeu no akiptia phivilo puthugho akeu I no ithulu, eno Pa no pi:
“Akisheqho no itha moke kutolo atsükuchoqo lo hepukulo,
eno tino timi kümtsü kütsü shou ikughi pelo;
eno achili thaqhü ye I no azüta pesü ghiqhiveni;
panoqo khumu povemla nani;
milakhimu itshüsü pomla nani.
2“Panongu no ala chhusü Kithigha#9:2 Hebrew lo Sheol lo iqive namu,
tilauno I u no küghaluve nani;
panongu no atsütsü lo ikuvemu,
tilauno I no saiqighive nani.
3Panongu no Carmel toghi lo itshüuve namu,
tilauno I no panoqo phuwu no küghaluve nani;
panongu no I nhethe lono itshüsü azüghi polalo iqive namu,
I no tilau apighi azah tsüno panongu mighipe nani.
4Aghümi no panongu sasü akughu lo wuve namu,
tilauno I no azütakikihi azah tsüno panoqo ghiqhive nani;
Alo kelauno kumono alhoksa lono
I no thüghüi panongu ju anani.”
5 Ampeu, aqokitikhi Lhou,
Pa no ayeghi bukelo pitikümlave cheni eno tile akemi
kümtsü no mloqa cheni,
panoqo no Nile züghi toi ikughi
eno itaghi Egypt lo Nile züghi toi iqüilove cheni;
6Pa no atsütsü lo akuchuquu chebo shipüani eno
ayeghi shou ajolha shipüani;
Khuu no azüghi zü kuno ayeghi
shou leqhitsü cheni keno,
Pa je ye Ampeu ke.
7 Ampeu no pi, “O Israelmi,
I ghenguno nongu ye Cushmi toike kumo keshea?”
“Israelmi ye I no Egypt lono saipeghi, Philistiami no
Capthor lono, eno Syriami no Kir lonoke kumo?
8Julo, Ampeu Alhou nhethi ye axine kükaqha ju ani,
I no ayeghi lono ti kütsave nani ikemu Ni ye Jacob
lagha qhoi kütsaleve monani,”
ipi Ampeu no asheshu.
9“Kughengu Julo, I no azah tsüno shiyeqo dolo
Israel shiaye süküthü nani,
ti ye akhoje no ijo akeshi ikemu
atumüsü mu ijoqhimo nani.
10Iw timi axinemi khunono, ‘Küsakusho ye ni haighimo
momu ni sasü kushomo nani’ ipi cheni keno kümtsü azüta kikihi lono thive nani.
Israel Athoputho tsüni
11“Tipani David pushonha khikhi
ikiqive keno I no ikhiqhe nani,
tipau kighipeqo pukho kithe eno
ixapinyive keu shiqhe kithepe
khaghi lo toi atho shive tsüni,
12tishianguno panoqo no Edom lo ghükulumi
eno shiye khipaqo Iw ke ipiche keno tipaqo leluve nani,”
ipi Ampeu khuu no hipau shi cheni keno Pa no piqhivae.
13“Julo, atsala hu ye chenie,” ipi Ampeu no sheshu,
“alu hokikidemi no ghile kuhumi vecheve nani
eno atsaithi qole kemi no axüthi sükemi haluve nani;
Naghutoqo no akungo ji kighiji
eno atoghi lono ti qowu nani.
14I no Iw timi Israelmi küakini tsüchile nani,
pighive keu phughiqo panongu no shikithe no tile xü nani;
atsailu chi no tipau tsaizü sho nani,
aghutu shino tipa xathi chu nani.
15I no panongu pesü pano yeghi lo shosü nani,
eno panongu ye I no tsükeu yeghi lono itaghi
khilemu nhüvemo nani,”
Ampeu nongu Lhou no piani.
Currently Selected:
AMOS 9: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
