AMOS 8
8
Kukhukimji Tsala Chekeu
1 Ampeu Alhou no kiu I piye keno hike: julo, mütsü tusho xathi ashoghi lakhi. 2Eno Pa no pi, “Amos, no ye kiu ithulu ani kea?” I no pi, “mütsü xathi ashoghi lakhi.” Tile Ampeu no I vilo pi,
“Iw timi Israelmi shekuho ye ighivae;
Ni ye khilemu panoqo juzü moae.
3Tipani achineki lo alekiphe ye mloküqa shive nani,”
Ampeu Alhou no pivae.
“Akithi kumo no kütsasa!”
“Aqha kümtsü peve nani!”
“Inaqhoi khümüive nani!”
4Hi inilo, nongu aveküsami nedaqoda chekeqo
eno aghakhu lo kumlhomi kütsaveni ye pi chekeqo,
5“Nino athi jeluni ke kughou
no aqhi kithe wove nani kea?
Kughou no Sabbath wove nani kea? Tishianguno nino
ashothi jelu, ahu kimghipu aghulo shive tsüno shekel
no kutomo shivetsü eno ahu
kichileu pesü pishiqhini ke,
6tishianguno nino ghükayi no kumlhomi qhüluve
eno apukhuqho pesü aveküsami qhüluve
eno ashothi muu jelunie.”
7 Ampeu no Jacob qheküza ghenguno tushoqhivae:
“Mtsüqheino Ni ye khilemu pano kümla kümsümamo nani.
8Hi ghenguno ayeghi ye itha moni keshea, tile akemi
kümtsü mloqa moni keshea?
Ayeghi kümtsü no Nile züghi toi fukucho ithughi no
itaghi Egypt lo Nile züghi toi ikiqi ilo nani.”
9“Tipa tsalani,” Ampeu Alhou no asheshu pi,
“I no khetsünhe pelo puchou no ilovepe nani
eno puchomghü lono ayeghi pesü aküzü shivetsü nani.
10I no now tiqhetini pesü akumlo shivetsü nani
eno nongu le kungo pesü amloksa le shivetsü nani;
I no yeqhiyephi pesü nongu chita lo khatsü nani
eno nongu kütsü lono asa miye khave tsü nani;
anu lakhi akeu thive kelo mloqa ketoi shipe nani
eno tipau shekuho ye kukhukimji tsala toi nani.
11“Julo, atsala chenie,” Ampeu Alhou no asheshu,
“I no aghakhu lo püqümiye puwu nani—
asho momu azü küpüqü kumoe,
ikemu Ampeu tsa ininishi keu müzü-tüghü shi nani.
12Timiqo no Ampeu tsa phusü
azüghi lakhi lono lakhiu lo,
eno ahuu no kipelau hu-woju
nani kemu phulumo nani.
13“Tipa tsalani ilimi jukivi eno apumiqo no
tüghüthi kelauno iluqive nani.
14Samaria kipimi jeku tushoqhi,
eno ‘O Dan, o lhou xü anike,’
momu ‘Beersheba Laghi anike,’ ipi chekemi ye ikiqive nani eno
khilemu ithughi kithemo nani.”
Currently Selected:
AMOS 8: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
