YOHAN 8

Nüktapangtatsür Ka

1Saka Yisubo Oliv tenemi atu. 2Anepdang yakta pa tenla kidangi tanaben aru, aser nisung ajaki pa dangi aru aser pai amen aser parnok dang sayutsü tenzük. 3Tetsür ka nüktapangta benshia aliba ngua pur Farisi aser tezülurtemi la Yisu dangi anir aru. Aser laji parnok aser Yisu tsüngda nung noktakdaktsü. 4Parnoki pa dang ashi, “Tesayur, iba tetsür nüktapangtaya alidang apu. 5#Lev. 20.10; Taz. 22.22-24. Yamalaji lung agi onsettsüla ta Mosa ajanga agütsüba Ozüng nung lir. Anungji naia la atema kechi ashir?” 6Pa aitsütettsüsa, pa atitanga parnoki ya ashi. Saka Yisui angema alu aser pa temeyong agi ali nung zülu. 7Saka kodang parnoki pa dang maneni asüngdang, pai aka asor parnok dang ashi, “Nenok rongnung shiba dak temenen mali, pai tamasa la dak lung agi ondakjang.” 8Idangji pai tanaben angema alu aser pei temeyong agi ali nung zülu. 9Parnoki kodang ya angashi, tambuti nungi tenzüka tesübuba tashi ka khen, ka khen ta oadok. Aser Yisu pa kija aser tetsürlaji la noktakdak tiyong nung toktsü. 10Yisui aka aso aser la dang ashi, “Tetsür, parnok kong ali? Nisung shingaia na maitsü asü?” 11Idangji lai langzü, “Hau, Kibuba, shingaia maitsü.” Idangji Yisui ashi, “Nia na maitsür. Oang; joko tang nungi tanaben temenen tebenshi.”

Yisu Alima Tesangwa

12 # Mat. 5.14; Yoh. 9.5. Yisui tanaben parnok den jembia ashi, “Ni alima tesangwa; Shibai kü sülen anitaker pai tammang nung kodanga mejajatsü; saka taküm tesangwaji angutsü.” 13#Yoh. 5.31. Idangji Farisitemi pa dang ashi, “Nai ne sasa kuli agütsür, ne kuliji ochi masü.” 14Yisui parnok dang langzü, “Ni kü sasa kü indang kuli agüjaka, kü kuli ochi lir, kechiaser ni kong nungi aru aser kongi aotsü aji nenoki memetet. 15Nenoki meimchir jenjang apir o bendanger, nibo shinga o mebendanger. 16Saka ni o bendangaka kü obendangbaji ochi lir, kechiaser ni kü kija masü. Saka Tebu shibai ni yok Pa kü den lir. 17#Taz. 19.15. Nisung ana kuliji ochi ta nenok Ozüng nung zülua lir. 18Kü indang kuli agütsüsangji ni lir aser ni tenyaba Tebui kü indang kuli agütsür.” 19Parnoki pa dang ashi, “Nebu kong ali?” Yisui langzü, “Nenoki nia memetet aser kübua memetet; nenoki ni metet asübo kü Bua metetla.” 20Yisui item o tenla kidang sayudang, tenla sen ayudak noktaker jembi, aser nisung shingaia pa mapu, kechiaser pa mapang ano matong.

Ni Kongi Aor Ajagi Nenok Arutsü Makok

21Pai tanaben parnok dang ashi, “Ni taor aser nenoki ni bushitsü, saka nenokbo pei temenen nung asütsü. Ni kongi aor ajagi nenok marutettsü.” 22Anungji Yihuda nungeri ashi, “Ni kongi aor ajagi nenok marutettsü ta pai shidarji pai pei sasa tepsettsü südi na?” 23Pai parnok dang ashi, “Nenok teküpoklen nungi, nibo temalen nungi; nenok iba lima meyong nibo iba lima meyong masü. 24Anungji ni nenok dang nenokbo pei temenen nung asütsü ta ashi; kechiaser nenoki ‘Ni Pa-a’ ta mamangra, nenok pei temenen nung asütsü.” 25Anungji parnoki pa dang ashi, “Na shiba?” Yisui parnok dang ashi, “Ibajiang nia nenok dang tetenzük nungi ashir-ato. 26Nenok indang ni ashitsü aser o bendangtsü jenti kar; Aji saka shibai ni yok pa ochi lir. Aser ni pa nungi kechi angashi, aji meimchir madang jembir.” 27Pai parnok dang Tebu indang jembir ta parnoki mangatet. 28Anungji Yisui ashi, “Kodang nenoki Nisung Chir ajungketdir, idangji ni pa-a ta aser pei sasa tashi agi kecha meinyaker, saka Tebui kü dang sayuba ama ni itemi jembir ta nenoki metettsü. 29Aser shibai ni yok pa kü den lir, pai ni kija metoktsü; kechiaser ni teti pa mulung achitsü mapa inyaker.” 30Pai itemi jembidang aikati pa dak amang.

Ochi-i Nenok Nüji Kümdaktsütsü

31Anungji Yihuda nunger shirnoki pa dak amangogo, pai parnok dang ashi, “Nenoki kü o nung lira, ajangla nenok atangji kü nütsüngtem lir. 32Aser nenoki ochiji metettsü aser ochi jagi nenok nüji kümdaktsütsü.” 33#Mat. 3.9; Luk. 3.8.Parnoki pa dang langzü, “Onok Abraham semchirtem lir, aser onok kodanga shinga lar süa melidang. Ajangla ‘Nenok nüji kümdaktsütsü’ ta nai koda shiteter?” 34Yisui parnok dang ashi, “Atangji züngpong ni nenok dang shidi, shibaisa temenen benshidir pa temenen lar. 35Alar kidang teti asoshi malir, techirbo teti alir. 36Anungji Techiri nenok nüji kümdaktsüra, nenok shitak nüji alitsü. 37Nenok Abraham semchirtem ta ni metet; saka nenoki ni tepsettsü bushir, kechiaser kü o nenok dak sadema mamunger. 38Kü Bu den ni kechi angu aji ni nenok dang ashir, aser nenokia nenok tebu nungi kechi angazük aji inyaker.”

Nenok Tebu Mojing

39Parnoki pa dang langzü, “Onok tebu Abraham lir.” Yisui parnok dang ashi, “Nenok Abraham chirtem asübo, nenoki Abraham mapa inyakla. 40Saka Tsüngrem nungi ochi angashir nenok dang ashibaji ni lir, aser tang nenoki ni tepsettsü bushir. Abrahami ya meinyak. 41Nenoki nenok tebu mapa inyaker.” Parnoki pa dang ashi, “Onok kida chir masü; onok Tebu ka oda Tsüngrem lir.” 42Yisui parnok dang ashi, “Tsüngremji nenok Tebu asübo nenoki ni meimla; kechiaser ni Tsüngrem nungi adoka aru; kechiaser ni pei sasa agi maruka, saka pai ni yok. 43Kechiba nenoki kü o mangateter? Kechiaser ya oda nenoki kü o angatsü makoker. 44Nenok pei tebu mojing meyong lir; aser nenok tebui jangraba inyaktsü nenoki mulunger. Pa tetenzük nungi nisung tepseter liasü, aser ochi nung menoktaker kechiaser pa dak ochi mali. Pai kodang tiyazü jembidir, pai pei temulung nungi jembir; kechiaser pa tiyazü tebu. 45Saka ni ochi jembi nung nenoki kü dak mamanger. 46Nenok rongnung shibai ni temenen nisung ta kuli agütsütet? Ni ochi ashi nung nenoki kechiba kü dak mamanger? 47Shiba Tsüngrem meyong lir, pai Tsüngrem o angar, nenoki aji mangar kechiaser nenok Tsüngrem meyong masü.”

Abraham Masodang Ni Lir

48Yihuda nungeri pa dang ashi, “Na Samaria nunger ka aser ne dak temenen tanela lir ta ashibato onok shitak masü ama?” 49Yisui langzü, “Kü dak temenen tanela mali, saka ni kü Bu akhüm tsübur aser nenoki ni akhüm metsübur. 50Ni pei nüngsang mebushir, aji bushitsü aser o bendangtsü ka lir. 51Atangji züngpong ni nenok dang shidi, kari kü o benshira, pai kodanga tasüba mangutsü.” 52Yihuda nungertemi pa dang ashi, “Ne dak temenen tanela ka lir ta onoki metetogo. Abraham aser ainkartem süogo, aser nai ashir, ‘Kari kü o benshira, pai kodanga tasüba mangutsü.’ 53Ozü tebu Abraham, shiba süadokogo, pa dang nungi na tuluba asü? Ainkartema süadokogo. Na-a shiba ta nai ashir?” 54Yisui langzü, “Ni kü sasa sentsüwangshira, kü sentsüwangshibaji kecha nunga. Ni sentsüwangshidaktsübaji kü Bu lir. Shiba dang nenoki ashir, ‘Pa ozü Tsüngrem lir.’ 55Nenoki pa memetet, saka ni pa metet; aser ni pa memetet ta shira nia nenok ama tiyazür alitsü. Saka ni pa meteta lir aser pa o benshir. 56Nenok tebu Abrahami kü anogo angutsü pela-a liasü; pai aji angu aser pela.” 57Yihuda nungertemi pa dang ashi, “Na tasoba küm tenema masü, aser naibo Abraham angu asü?” 58Yisui parnok dang ashi, “Atangji züngpong ni nenok dang shidi, Abraham masodang nungi Ni liasü.” 59Anungji parnoki pa dak lung agi aontsü lung shia aru, saka Yisui pei sasa atsük aser tenla kidang nungi aenshia ao.

Currently Selected:

YOHAN 8: ANSEBSI

Highlight

Copy