YOHAN 7

Yisu Adianutemi Mamangba

1Iba sülen Yisui Galil lima nung senzü. Pai Yihuda lima nungji mesenzünü, kechiaser Yihuda nungeri pa tepsettsü bushi. 2#Lev. 23.34; Taz. 16.13. Idangji Yihuda nunger Semtu Benjong anasa liasü. 3Anungji pa adianutemi pa dang ashi, “Ne nütsüngtemia nai inyakba mapatem angutsüsa yang nungi meyipa Yihuda limai oang. 4Kechiaser shibai pei sasa odia temai adokdaktsünür, pai kecha miima meinyaker. Nai itemi inyaker süra, alima tsüngdang ne sasa jungkai adokdakjang.” 5Kechiaser pa adianutemia pa dak mamang. 6Anungji Yisui parnok dang ashi, “Kü mapang ano matong, saka nenok mapang teti renema lir. 7Alimai nenok mesempatet, saka yagi ni sempar, kechiaser iba mapatemji majung ta ni iba indang kuli agütsür. 8Benjong jagi nenok tuang, nibo Benjong jagi matutsü; kechiaser kü mapang ano mabensa.” 9Item o parnok dang shir, pa Galil lima nungsa ali.

Yisu Semtu Benjong Nung

10Saka kodang pa adianutem benjong jagi tuadok, idangji odia mesüi oda miima, pa-a benjong jagi atu. 11Anungji Yihuda nungeri benjong nungji pa bushia ashi, “Pa kong ali?” 12Telok rongnungji pa asoshi kanga kangkokangjia liasü, kari, ashi, “Pa nisung tajung ka lir.” Ano tangar kari ashi. “Yamaji masü, telok mashileni anir.” 13Aji saka Yihuda nunger tsübu nung shingaia pa indang odia mejembi.

14Saka benjongji tom ka shi süir külen Yisui tenla kidangi tua sayumeso. 15Anungji Yihuda nungeri süngmanga ashi, “Iba nisungi kodanga mangazük nung kechi koda tazüngba shisatsü metet?” 16Anungji Yisui parnok dang ashi, “Ni sayuba ya kü o masü, saka ni tenyaba o lir. 17Kari pai mulungba inyaktsü mulungra ni sayuba ya Tsüngrem o asü, ni pei sasa nungi jembir, aji pai metettsü. 18Shibai pei sasa nungi jembir, pai pei nüngsang bushir. Joko shibai ni tenyaba nüngsang bushir paji atangji lir, ochi mashiba pa dak mali. 19Mosai nenok nem ozüngji magütsü no? Aji saka nenok shingaia ozüngji mebenshir. Kechiba nenoki ni tepsettsü bushir?” 20Telokti-i langzü, “Ne dak mojing lir. Shibai na tepsettsü bushir?” 21Yisui parnok dang ashi, “Ni mapa ka inyak, aser nenok ajaki süngmanger. 22#Lev. 12.3; Lip. 17.10. Mosai nenok nem temejeptokba agütsü (aji Mosa nungi masü, saka tetsü-teboutem nungi) aser amungnü nung nenoki nisung mejeptoktsür. 23#Yoh. 5.9.Mosa ozüng meraksatsü asoshi amungnü nung nisung mejeptoktsü süra, amungnü nung ni nisung ka jungjunga anebtsü nung nenoki kü dang rasar ama? 24Tema tereprangtsü agi nenoki o tebendang saka ochi obendangba agi bendangang.”

Ya Khristaji Asü?

25Anungji Yirusalem nunger kari ashi, “Parnoki tepsettsü bushibato iba nisung masü no? 26Ajiangjo pai odia dang jembir aser parnoki pa dang kecha mashir. Ibai Khristaji lir ta yimsüsürtemi shitak meteta aküm südi na? 27Aji saka iba nisung ya kong nungiar asenoki metet; saka kodang Khrista arudir pa kong nungiar shingaia memetettsü.” 28Anungji Yisui tenla kidang sayudang ayimtena ashi; “Nenoki ni metet aser ni kong nungiar ajia metet; saka ni kü sasa agi maru, saka shibai ni yok pa atangji aser nenoki paji memetet. 29Ni pa metet kechiaser ni pa nungi lir; aser pai ni yok.” 30Anungji parnoki pa aputsü bushi, saka pa dak teka mai, kechiaser pa mapang ano matong. 31Kechiaser telok rongnung aikati pa dak amang aser parnoki ashi. “Kodang Khristaji arudir, iba nisungi inyakba temaitsütem dang tali inyakdi ma?”

Yisu Aputsü Yokba

32Teloki Yisu indang aji oda kangkokangjiba Farisitemi angashi; aji asü nung puti-ungertemi aser Farisitemi pa aputsü sosangtem yok. 33Anungji Yisui ashi, “Joko ni nenok den kenpiga dang lirbo ni tenyaba dangi aotsü. 34Nenoki ni bushitsü aser ni mangutsü aser ni kechi nung lir ajagi nenok arutsü makok.” 35Anungji Yihuda nungeri parnok o parnok na jembitepa ashi, “Asenoki pa mangutsüsa pa kongi aotsü? Pai Yihuda nunger prokshia Grik nunger den aliba dangi oa Grik nunger dang sayutsü asü? 36‘Nenoki ni bushir, aser ni mangutsü, aser ni kechi nung lir ajagi nenok arutsü makok’ ta pai ashiba o ya kechi?”

Taküm Tzü Ayongtem

37 # Lev. 23.36. Benjong tendinü Yisui noktak aser ayimtena ashi, “Kar tzürara, pa kü dangi arudakjang aser jemdakjang. 38#Ezk. 47.1; Zek. 14.8. Laishibai ashiba ama, ‘Shibai kü dak amangdir, pa dak nungi takümtzü ayongtem ayimtsü.’ ” 39Pa dak amangertemi agizüktsüba Tanela indang pai ya shia liasü. Kechiaser ano Tanelaji magütsüi liasü, kechiaser Yisu ano sentsü mewangshidaktsüi liasü.

Telok Rongnung Telemsa

40Kodang parnoki item o angashi, kari ashi, “Atangji ya ainkarji lir.” 41Tangartemi ashi, “Ya Khristaji lir.” Saka kari ashi, “Khristaji Galil nungi adoktsü ama? 42#2 Sa. 7.12; Mik. 5.2. Dawid kidong nungi aser Dawid aliba Bethlehem nungi Khristaji arutsü ta Laishibai meshika ma?” 43Anungji pa indang telok rongnung telemsa adok. 44Parnok rongnung kari pa pua arunü, saka shingaia pa dak teka mai.

Bangdak Alirtemi Mamangba

45Idangji sosangtemi putiungertem aser Farisitem dangi aru shirnoki parnok dang ashi, “Nenoki kechiba pa anir maru? 46Sosangtemi langzü, “Iba nisungi ama kodanga nisung shingaia mejembika.” 47Anungji Farisitemi parnok dang ashi, “Nenoka mashileni anitaktsür asü? 48Yimsüsürtem mesüra Farisitem rongnung kari pa dak amang asü? 49Saka iba telok kobai ozüngji memetet parnok atakatem sang.” 50#Yoh. 3.1,2. Parnok rongnung kabo Nikodima shiba akhidang pa dangi aruogo, 51pai parnok dang ashi, “Tamasa nisungba memeteti asen ozüng agi pa bendanger asü?” 52Parnoki pa dang langzü, “Na-a Galil nunger asü? Bushiang aser ajiang, Galil nungi ainkar madoker.” 53Aser parnok nisung shia pei kidangi ao.

Currently Selected:

YOHAN 7: ANSEBSI

Highlight

Copy