YOHAN 14
14
Tebu Dangi Aoba Lenmangji Yisu
1“Nenok temulung teraksa. Nenoki Tsüngrem dak amanger; kü daka amangangma. 2Kü Bu kidang talidak jenti lir. Yamaji masü asübo ni nenok dang shila, kechiaser ni nenok asoshi talidak renemi aotsü. 3Aser kodang ni or nenok asoshi talidak renemdir, ni kong lidir nenoka yangji alitsü asoshi ni tanaben nenok dangi arutsü. 4Ni kongi aotsü nenoki lenmangji metet.” 5Tomai pa dang ashi, “Kibuba, na koleni aotsü onoki memetet; ajangla onoki koda sür lenmangji metettsü?” 6Yisui pa dang ashi, “Lenmang atangji aser Taküm ni lir. Ni ajanga mesüra shingaia kü Bu dangi marur. 7Nenoki ni metet asübo, nenoki kü Bua metetla. Tang nungi nenoki pa metet aser pa nguogo.” 8Filipi pa dang ashi, “Kibuba, onok dang Tebuji sayuang, ajagi onok teperi.” 9Yisui pa dang ashi, “Filip, ni nenok den papigati liaka, nai ni memetet no? Shibai ni nguogo, pai Tebu nguogo. Onok dang Tebu sayuang ta nai koda ashir? 10Ni Tebu dak lir aser Tebu kü dak lir ta nai mamanger no? Ni kechi o nenok dang ashir, aji kü sasa nungi jembir masü, saka Tebu kü dak lia, pai pei mapatem inyaker. 11Ni Tebu dak lir aser Tebu kü dak lir ta kü o ya amangangma; aji mesüra mapatem atema ni amangang. 12Atangji züngpong ni nenok dang shidi; shibai kü dak amanger, kechi mapatem ni inyaker, paia aji inyaktsü aser item mapatem dang nungi tuluba pai inyaktsü; kechiaser ni Tebu dangi aotsü. 13Aser nenoki kü nüng nung kechisa meshidir aji ni inyaktsü, anungji Techir dak Tebu sentsüwangshitsü. 14Nenoki kü dang kü tenüng nung langka meshira aji ni inyaktsü.
Tanela Temeshi Nangzükba
15“Nenoki ni meimra, nenoki kü Ozüngtem benshitsü; 16aser nenok den teti alitsü asoshi tangar Teyarir ka nenok dangi yokang ta ni Tebu dang asüngdangtsü. 17Paji Ochi Tanela shiba alimai magizüker, kechiaser alimai pa mangur aser memeteter. Nenoki pa metet kechiaser pa nenok den dena lir aser nenok dak alitsü. 18Ni nenok ala-ashia metoktsütsü; Ni nenok dangi arutsü. 19Tatsüka lir külen, joko alimai ni mangutsü, saka nenokibo ni angutsü: Ni taküm lir, ajagi nenoka taküm alitsü. 20Iba anogo nungji ni kü Bu dak lir aser nenoka kü dak lir aser ni nenok dak lir ta nenoki metettsü. 21Shiba kü ozüngtem aka, aser itemji kü Bui pa meimtsü aser ni pa meimtsü aser kü sasa pa dangi jungkai adoka sayutsü.” 22Yihudai (Iskariot masü) pa dang ashi, “Kibuba, kechisünung alima madang nai pei sasa jungkai madoki, onok madang ang jungkai adoktsü?” 23Yisui langzü, “Kari ni meimra pai kü o angatsü, aser kü Bui pa meimtsü aser onok pa dangi arutsü aser pa den alitsü. 24Shibai ni memeimer pai kü o mangar aser nenoki kechi o angashir aji kü o masü, saka ni tenyaba Tebu o.
25“Ano ni nenok den alidang ni item o nenok dang jembiogo; 26Saka Teyarir, paji Tanela Temeshi, shiba Tebui kü nüng nung yoktsü, pai nenok dang ashiba ajak bilemtetdaktsütsü. 27Ni nenok den tesünep toktsür; kü tesünep ni nenok nem agütsür. Alimai agütsüba ama ni nenok nem magütsür. Nenok temulung teraksa aser tsübua teli. 28Ni aotsü aser nenok dangi arutsü ta ashiba nenoki angashiogo. Nenoki ni meim asübo nenoki pelala, kechiaser ni Tebu dangi aor, kechiaser Tebu kü dang tuluba. 29Kodang mapang tongdir nenoki amangtsü asoshi anojungi ni nenok dang shiogo. 30Nenok den ni joko aika mejembitsü, kechiaser ali chuba arudagi. 31Pa kü madak kecha ain maka, saka ni Tebu meimer, aser Tebui kü dang melaba ama ni aji inyaker ta alimai metettsü.
“Aramesoang, asenoki yang nungi odi.
Currently Selected:
YOHAN 14: ANSEBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
