ÂTHAONA 34

Dinâ papuapaleina vâta viarithôna

1Noh kha cha, Liah ta Zakaw châta a sapa a sawchanô Dinâ cha, cha râh laihsazy charei awpa ta pua ta. 2Cha râh bei Hivi chyhsa Hamô sawchapawpa Sekhe ta vaw hmô ta, patu ta, a ziakhei ta, a noh pazao ha ta. 3Sekhe palôh cha Zakaw sawchanô Dinâ liata khâchâ y ta. Laihsa cha kyhpachâ kaw ta, reikah phapa ta bie a chho ta. 4Sekhe ta a paw Hamô hnohta, “He laihsa he lapinô châta na hiapa mah y,” tah ta.

5Zakaw ta a sawchanô Dinâ Sekhe ta a papuapaleipa thâtih cha thei ta. A sawchapawzy cha a sahroh zaw chhaota râh liata ama y chhôh châ ta, ama vaw tlô hlâlei Zakaw cha a thlih thlâh ha ta. 6Sekhe paw Hamô ta Zakaw lâ lyuh kei châ ta. 7Thâtih ama pahnopa nahta, Zakaw sawchapawzy cha râh lâ tawhta vaw tlô ei ta. Sekhe ta Zakaw sawchanô a ziakhei ta, Izarei sahlao chô liata hmo molei ngaitapa, hmo tao chachei lei awpa a taopa vâta, ama palôh pasapa ta, ama hiehâh ngaita ta.

8Hamô ta ama hnohta, “Ei sawchapawpa Sekhe palôh cha, nama sawchanô chô liata khâchâ y ha ta, ngiachhiepa ta lapinô ta pahneisa teh u. 9A hnei pahlao ei suh u. Nama sawchanôzy miah pie u la, eima sawchanôzy hnei teh u. 10Eima hnohta pahrâ aw ei chi ta, nâmo châta râh he pahypa a châ. He râh liata pahrâ u la, sôh zy palie u la, râh he ryuto châta hnei teh u,” tah ta. 11Sekhe chhao ta laihsa paw nata a rilâhpazy hnohta, “Na ngiachhie teh u, ei hnohta nama reipa maih ei cha pie aw ei. 12Mâ nata chhao nata hmosaipa cha, khazie rai haw u la, nama reipa hawhta ei cha pie aw ei. Khâpa rai châ sala, laihsa he lapinô ta na pahneisa teh u,” tah ta.

13Sekhe ta ama sietanô Dinâ a papuapaleipa vâta, Zakaw sawchapawzy ta Sekhe nata a paw Hamô cha dôveipa ta a chhy ei ta. 14Ama hnohta, “Paryhsa thei ma pi. Chopawtaileipa chyhsa lâ eima sietanô soh thei ma pi. Cha hawhta taopa cha keimo châta nohzaona a châ aw. 15He hawhta bie namâ taih khiah deikua cha, nama bie hawhta eima châ ryh thei aw. Keimo hawhpa nama châ thei hra nawpa ta, nama hry liata chapaw zydua chopaw namâ tai khai awpa a châ. 16Chatanachata eima sawchanôzy cha pie aw pi ta, keimo chhao ta nama sawchanôzy hnei hra aw pi ta, nama hnohta y aw pi ta, chi khapa eima châ ha aw. 17Chopawtaina kyh liata eima bie nama zyh leipa khiahta deikua cha, eima sawchanô he a chhi aw pi ta, eima sie syulyu ha aw,” tah ei ta.

18Ama biezy chata Hamô nata Hamô sawchapawpa Sekhe cha palysa ta. 19Sekhe cha Zakaw sawchanô chô liata a palôh a tlâh ngaitapa vâta, cha hmo cha pahawh pasâh leipa ta thlai ta tao awpa khoh ta. Sekhe cha a paw o liata a ypa zydua hry liata palyupalih chaipa a châ. 20Chatanachata Hamô nata a sawchapawpa Sekhe cha, ama khih thokhy chhikao lâ a vy ei ta, ama khihsawzy bie reikhei ei ta, ama hnohta, 21“He chyhsazy he miah a dyh kaw ei ta, chavâta râh liana he pahrâ ei sala, sôh zy palie mawh ei sy. Pachâ teh u, âmo châta chhao râh he â daih thlâh haw. Ama sawchanôzy lapinô ta hnei sih la, eima sawchanôzy pahneisa hra ei suh u. 22Châhrasala he hawhta eima tao khiah deita ta eima hnohta pahrâ aw ei ta, chi khapa eima vaw châ aw. Âmo cha chopawtaipa ama châpa hawhta, keimo chhao chapaw zydua chopaw eimâ tai khai awpa a byuh. 23Ama sahrohzy, ama sôhzy nata ama sa zydua keimo eih ama vaw châ khai nawpa mah a châ tâh. Chavâta amâ hnawpa hawhta paryhsa sih la, chatanachata eima hnohta ama pahrâ aw,” tah ei ta. 24Khihpi thokhy chhikao liata a hmaohpa zydua ta Hamô nata a sawchapawpa Sekhe bie cha paryhsa ei ta. Khihpi thokhy chhikao liata a hmaohpa chapaw zydua cha ama chopaw tai khaipa a châ.

25A noh thôhna noh liata, ama pasa locho nota, Zakaw sawchapaw pano, Dinâ rilâhpa Simeôna nata Livai cha, ama zaozi chyu a chabapa ta arulâta khihpi a dyuh ei ta, chapaw zydua ama thie khai haw. 26Hamô nata a sawchapawpa Sekhe chhao zaozi tiahpa ta thie ei ta, Dinâ cha Sekhe o tawhta puakhei ei ta, amâ chhi haw. 27Zakaw sawchapawzy cha ama thiepazy lâ vawh ei ta, ama sietanô ama papuapaleipa vâta, khihpi cha hrao ei ta. 28Ama mietaku zawzy, ama viahchao hrizy, ama alâzy, ama khih liata hmo a ypa nata ama lyu liata hmo a ypa zydua la khai ei ta. 29Ama sôh nata thih zydua, ama saw hawtipa zydua nata ama lapinô zydua, o liata a ypa zydua patu ei ta, ama hrao khai haw.

30Zakaw ta Simeôna nata Livai hnohta, “Nâmo vâta rairuna ei tyh ha hih. Râh liata a pahrâpa, Kâna mo nata Perizi mo hmia liata ei roh nama pachhie haw. Kei cha chyhsa chyhta dei ei hnei hih. A awpakhy ei sala, einâ dyuh khiah ei ta cha, kei nata ei o liata a ypa zydua pahleipadiapa eima châ aw,” tah ta. 31Âmo ta, “Eima sietanô he âzuahnô hawhta a tao awpa a châ rai ma?” tah ei ta.

Currently Selected:

ÂTHAONA 34: MARVBSI

Highlight

Copy