ÂTHAONA 32

Esaw dy awpa ta Zakaw â pachhuahpanoh

1Zakaw cha sie lymâ ta, Khazohpa vâlyuhchâpazy ta a vaw tyh ei ta. 2Zakaw ta âmo cha a hmô nahta, “He he Khazohpa riehmo a châ hih” tah ta, chavâta cha su cha Mâhanai#32.2 “Mâhanai” tahpa cha, “riehmo miano” tahna a châ. tahpa ta a moh a bi.

3Zakaw ta Edômâ râh Seirâ tlâh liata a pahrâpa a uhta Esaw lâta lyuhchâpazy pasiesa chhielie ta. 4Lyuhchâpazy cha biepie ta, ama hnohta, “Ei zibeipa Esaw hnohta, ‘Châ chakaotuhpa Zakaw ta hetana heta a tah: Lâbâ o liata khichhaipa châpa ta, tahmâ taihta y na ta. 5Viahchao tôhpazy, alâzy, mietaku nata mie zawzy, seichapaw nata seichanôzy ei hnei. Na modypa ei châ thei nawpa ta, cha bie cha ei zibeipa chho awpa ta, chyhsa ei vaw tuah,’ tahpa ta nama chho aw,” tah ta.

6Lyuhchâpazy cha Zakaw lâ vaw kua ei ta, a hnohta, “Na uhta Esaw kô kei tlô pi ta, cha dy awpa ta â vy hai. Chyhsa za palih a hnohta â vaw chhi ei,” tah ei ta. 7Zakaw cha chipa ta a nôpo ngaita ta. A hnohta chyhsa a ypazy, mietaku zawzy, viahchao zawzy nata râraoseihpazy cha py no ta pachhaih ta. 8“Esaw ta py kha a vaw tyh sala, a thie ha khiah ei ta cha, py kha lâta a ypazy chhâ cha amâ râ thei aw,” tahpa ta pachâ ta.

9Zakaw cha thlahchhâ ta, “Hy ei paw Abarahâ Khazohpa, ei paw Aisika Khazohpa, Hy Abeipa, ‘Na râh lâ a lie la, na chiheihzy yna lâ a lie mah y, a phapa ta ei cha tao aw,’ nâ tahtuhpa y, 10châ chakaotuhpa chô liata ngiachhiena nata ngâchhihna na palâsapa zydua hry liata a chyh chaipa chhao a phuh va na. Ei chôchahrei deita a chhypa ta Zawdâh he vaw chaka na ta, tahmâ cha py no eima vaw châ haw. 11Ngiachhiepa ta ei uhta Esaw ku tawhta na pachha mah y. A vy aw ta, nôzy nata sawzy chhaota miah a thie khai aw tahpa ei chi ngaita. 12#Âtn 22.17Nâma ta, ‘A phapa ta cha tao tlai aw na ta, na pathlazy cha tilaipi sadi rei tiah leipa tlu ta hluhpa ta ei cha tao aw,’ tah chi ta,” tah ta.

13Cha zâ cha, cha liata a rie ta. A uhta Esaw kuhria pie awpa ta, a hneipa hry tawhta, 14mie panô za no nata mie tôhpa pô kih, mietaku panô za no nata mietaku tôhpa pô kih, 15râraoseihpa sâhpi saoh haipa sythôh nata ama tawzy, viahchao panô sypalih nata viahchao tôhpa pô hrawh, alâ panô pô kih nata alâ tôhpa pô hrawh a tlyh ta. 16Chazy cha a chakaotuhpazy ku liata a hri hri ta pie ta, a chakaotuhpazy hnohta, “Ei hmia lâta sie u la, a hri hri ta ama likawh â hlapa ta pasiesa muh vy,” tah ta. 17Hmia a sahpa hnohta, “Ei uhta Esaw ta châ tyh sala, ‘Ahy eih na châ? Khataih lâ na sie aw? Na hmia lâta a siepazy he ahy eih ama châ?’ tahpa ta a cha hiahri tita, 18‘Châ chakaotuhpa Zakaw eih a châ. Hezy he ei zibeipa Esaw châta kuhria a cha paphaopazy a châ. Ano chhao eima hnôh lâta a vaw sie,’ na tah aw,” tahpa ta biepie ta. 19Cha hawhna chata, a panona nata a pathôhna nata sahroh hrizy a pazituhpa zydua hnohta, “Nâmo chhao, Esaw namâ tyh tita, cha hawhta reih hra aw ei chi ta, 20‘Châ chakaotuhpa Zakaw cha eima hnôh lâta a vaw sie,’ nama tah aw,” tahpa ta biepie ta. Zakaw ta, “Kuhria ei hmia lâta a siepa ta a palôh patlâh aw na ta, cha khai tawhta a hmia ei hmô aw. Cha hawhta ei tao khiahta cha, einâ pyh thei ngyu aw,” tahpa ta pachâ ta. 21Chatanachata kuhria cha a hmia lâta sie ta, ano pôhpa deikua, cha zâ cha riehmo liata a rie ta.

Zakaw ta Khazohpa châhpia â pia

22Cha zâ ta thyu ta, a lapinô pano, a seichanô pano, a saw pahrawh hleikhazy a chhi ta, Zabaw tihra chakana liata haosâ kiah ha ta. 23Âmo cha a chhi ta, a hneipa zydua chhaota chavah chakasa khai ta. 24#Hôs 12.3,4Zakaw cha ano dei ta siesaipa châ ta. Chyhsa pakha ta ano cha azozâkhihdei ta a pia ta. 25Cha chyhsa chata Zakaw cha a pahnie thei lei awpa a pahno nahta, a chakhai liata hria ta, â pia hai nota, Zakaw cha a chakhai a pahleih ha ta. 26Chyhsa chata, “Na pathlie teh, khih a deih haw hih,” tah ta. Zakaw ta, “Byhnâ eina awpa ha tua leipa chi ta la, cha pathlie aw va na,” tah ta. 27Chyhsa chata a hnohta, “Na moh ahy?” tah ta. Ano ta, “Zakaw ei châ,” tah ta. 28#Âtn 35.10Chyhsa chata, “Na moh Zakaw cha tah khao aw veih ei, Izarei#32.28 “Izarei” tahpa cha, “Khazohpa â chatôh” tahna tlyma, “Khazohpa ta â chatôh” tahna tlyma a châ. na châ ha aw, Khazohpa nata chyhsapa a pia chi ta, na pahnie hapa vâta,” tah ta. 29#Rrt 13.17,18Zakaw ta, “Ngiachhiepa ta na moh na chho teh,” tah ta. Ano ta, “Khazia ei moh eina hiahri chi?” tah ta. Cha liata byhnâ awpa ta. 30Zakaw ta, “Khazohpa cha hmiachhypa ta hmô na ta, chatanachôta ei hrona pahlôhpa ta a y,” tah ta, cha su moh cha Penia#32.30“Penia” tahpa cha, “Khazohpa hmia” tahna a châ. a bi. 31Penia a khô nahta, a chô liata noh vaw chhi pâ ha ta. A chakhai â pahleih hapa vâta chabiah laih ta. 32Zakaw byhpi ru apazaona a chakhai thari liata a hriapa vâta, tanoh taihta Izarei sawzy ta byhpi ru a pazaopa chakhai thari nie veih ei.

Currently Selected:

ÂTHAONA 32: MARVBSI

Highlight

Copy